Helen Budge nya seiku Saksi Jehovah ti buta ari Edinburgh, Scotland. Baka ke diasaika semua Saksi-Saksi Jehovah di serata dunya, ketegal penusah penyakit berampit, Helen enda ulih bejalaika pengawa nginjil enggau chara betunga mua. Tang penanggul tu enda nagang Helen ari naka ulih mai orang datai ke Pengawa Ngingatka Pemati Jesus.

Ngambika iya ulih ngemai orang datai, iya dulu nuliska nota diri empu ba siti perengka ke dikumbai braille notetaker. Ku Helen nerangka: “Perengka nya baka keretas enggau pinsil ba aku.” Udah nya, Helen macha nota braille diri empu, lalu ari tu iya nyebut utai ke deka ditulis iya ngagai anak menyadi iya ke nuliska surat ngarika Helen.

Indai enggau ini Helen suba pan Saksi-Saksi Jehovah. Nya kebuah Pengawa Ngingatka Pemati Jesus nya semampai nyadika pengawa ti amat spesial ba pengidup Helen. Iya madahka diri gagit ati tiap taun lebuh iya ngemai orang bukai datai. Ku iya: “Tu kali ke-70 aku ngintu Pengawa Ngingatka Pemati Jesus. Tiap taun aku amat gaga ati nerima surat mai datai dalam braille. Aku macha surat nya ngambika aku nemu penerang pasal ni maya sereta dini endur pengawa nya diintu. Udah nya aku berengkah merambu sapa ke deka dibai aku datai.”

Enda ngira nama penekul ke ditapi sida, ketegal pengerindu, orang Kristian ti tetap ati di serata dunya mai orang ke berimbai pendiau enggau sida Ngingatka Pemati Jesus kena Hari Enam, 27 Mac 2021.—Luke 22:19.