5 NOVEMBER 2021
VENEZUELA
Dua Iti Bup Mit ba dalam Bup Kudus Dikeluarka ba Bansa Jaku Bengal-Bisu Venezuela
Kena 30 Oktober 2021, bup Matthew enggau John dikeluarka ba bansa jaku Bengal-Bisu Venezuela. Lebih ari 2,200 iku bala menyadi meda program ke udah dirikut dulu lalu dipandangka nengah online. Menyadi Miguel Guillén, seiku ari Komiti Pampang Opis Venezuela, ngeluarka dua iti bup mit nya. Kenyau ari 2006, nyauka 7,000 iti ayat Bup Kudus disalin ngagai jaku Bengal-Bisu Venezuela. Tang tu meh kali ti keterubah bup mit ba dalam Bup Kudus tembu disalin ba bansa jaku tu.
Opis penyalin
Sida ke nyalin Bup Kudus Salin Dunya Baru berengkah enggau bup mit Matthew enggau John ke ngundan cherita pasal pengidup Jesus ke dikelala orang mayuh, laban senang agi disalin enti dibanding enggau bup mit ba Bup Kudus ke bukai, laban ditusui penyerita.
Kena 2003 eklisia ke ngena jaku bengal-bisu ti keterubah ditumbuhka ba nengeri Cabimas di Venezuela barat. Diatu bisi 1,204 iku penginjil ba dalam 53 buah eklisia ke ngena jaku bengal-bisu ba Venezuela. Mayuh orang ke bengal rindu belajarka Bup Kudus tang bansa jaku Bengal-Bisu Sepanyol amat tusah deka mereti laban bebida ari jaku Bengal-Bisu Venezuela.
Seiku tuai ti ngabas madahka: “Seiku orang ke bengal tetemuka Bup Kudus ba bansa jaku Sepanyol, tang lebuh iya macha nya iya enda ulih mereti nama-nama. Iya bebendar minta tulung ari Petara. . . . Lebuh bisi orang madahka ngagai iya, iya ulih belajarka Bup Kudus ngena bansa jaku Bengal-Bisu Venezuela, iya terus deka belajarka Bup Kudus.”
Bisi enam iku penyalin bekereja pengelama sepuluh bulan kena nembuka projek tu. Sida ditulung tujuh iku menyadi ke bengal ari endur ti bebida kena meresa utai ke disalin sida. Utai tu nulung bala penyalin nentuka semua orang ulih mereti enda ngira dini endur sida.
Ketegal pandemik COVID-19, bala penyalin patut gawa ba endur ti bebida nengah konferen video. Ketegal sida bisi penanggul ba internet, tu ngasuh sida tusah gawa. Seiku penyalin madahka: “Utai tu enda senang, tang enggau bantu ari Jehovah kami ulih napi penekul tu.”
Kitai besampi ngambika bala menyadi ba Venezuela bulih penguntung ari Jaku Petara, “baka pirak ti tulin,” dalam bansa jaku sida empu.—Masmur 12:6.
Nuan Engka Rindu Meda Tu
UTAI KE SUAH DITANYA
Kati Saksi-Saksi Jehovah Ngembuan Bup Kudus ti Enda Sama enggau Orang Bukai?
Ngena mayuh bengkah salin Bup Kudus ulih ngemanahka agi penemu nuan pasal Bup Kudus. Bisi tiga iti poin ke nerangka pemanah Bup Kudus Salin Dunya Baru, lalu nya amat beguna lebuh nuan belajarka Bup Kudus.
CHARA DUIT PEMERI DIKENA
Ngeluarka Bup ti Pemadu Beguna ba Dunya
Nuan engka enda kala nyadang pengawa nyalin Bup Kudus Salin Dunya Baru nya nyengkaum nyalin, nyelak, sereta nanggam.