Penyarut sereta penanggul ba ekonomi majak nyadi ba Venezuela. Mayuh orang tusah ngiga pemakai, ai irup, minyak sereta perengka berubat ketegal enda chukup tauka rega ti tinggi. Pia mega, suah nadai karan, lalu tu ngasuh rayat tusah deka ngiga pemakai. Penanggul ba jenayah mega majak ngirauka ati mayuh orang.

Taja pia, lebih ari 136,500 iku penginjil ba Venezuela mengkang ransing bejalaika pengawa nginjil. Chunto iya, kena bulan Januari 2019, nyauka 7,000 iku penginjil ba menua nya dibandingka enggau taun nyin kemari. Sida udah ngena lebih ari 90,000 jam ba pengawa nginjil. Kena bulan April 2019, lebih ari 195,600 iku orang belajarka Bup Kudus. Pia mega, penyampau pengerintis tetap nambah ngagai 30,000 lebih. Sepemanjai kimpin mai mayuh orang datai Ngingatka Pemati Jesus, penyampau pengerintis sukung mega niki ngagai 20,400. Ketegal pengeransing bala penginjil, nyauka 471,000 iku orang datai. Penyampau tu tiga kali ganda mayuh agi ari penginjil. Nambahka nya, mayuh orang datai ngagai gempuru ninting minggu, laban menyadi kitai terus nyediaka penerang ari Bup Kudus ngagai orang ke ngiga chara mutarka penanggul sida.

Pampang opis Venezuela terus meri bantu ngagai bala menyadi, kelebih agi ba pemakai. Ninting bulan, bantu ari pampang opis bukai ke semak sereta pemeri sukarela ba serata dunya, pampang opis ba Venezuela ulih meri beratus iti tan pemakai ngagai 75,000 penginjil ba 1,595 iti eklisia.

Taja pan bala menyadi kitai ba Venezuela napi mayuh macham penanggul, tang kitai amat diperansang meda sida ‘mengkang gaga ati sereta lantang laban Jehovah endang Juruselamat sida.’—Habakuk 3:17, 18.