“Tunduk meh ngagai Aku. Aku dekaka kita nemu Aku tu Petara. Semua bansa deka ngeninggika Aku, lalu deka ngemuliaka Aku di serata dunya.”—Masmur 46:10, Salin Dunya Baru.

 ‘Badu agi beperang; Aku dekaka kita nemu, Aku tu Petara. Aku ditinggika ulih semua bansa, ditinggika di serata dunya!’—Masmur 46:10, Bup Kudus Baru.

 Petara ngasuh semua orang nyembah Iya lalu ngaku Iya bisi hak merintah dunya. Barang sapa ke deka idup belama iya enda tau enda ngaku Iya ke pemadu bekuasa.—Pemandang 4:11.

 “Tunduk meh ngagai Aku. Aku dekaka kita nemu Aku tu Petara.” Dalam jaku Hebrew, rambai jaku tu mai reti Petara Jehovah a Empu ngasuh semua orang ari semua bansa badu ngelaban Iya lalu ngaku semina Iya aja ke layak disembah.

 Masmur 2 mega ngasuh kitai ngereja utai ti sama. Ba masmur tu Petara besemaya Iya deka ngukum sida ke ngelaban Iya. Tang orang ke ngaku hak Iya merintah patut bepanggai ba iring, pengering sereta penemu-dalam ari Iya. ‘Orang ti ngadap minta intu Iya’ berasai lantang ati sereta likun, kelebih agi lebuh sida dituntung penusah.—Masmur 2:9-12, Bup Kudus Ka Rebak Diatu.

 “Semua bansa deka ngeninggika Aku, lalu deka ngemuliaka Aku di serata dunya.” Kelia menya, Petara Jehovah mandangka pengering Iya ti besai lebuh ngelindung bala nembiak Iya. Ketegal tu, Iya dimuliaka. (Pemansut 15:1-3) Ba jemah ila, lebuh semua orang ba dunya nunduk sereta nyembah Iya, Iya deka lebih agi dimuliaka.—Masmur 86:9, 10; Isaiah 2:11.

 Siti bup pansik madahka Masmur 46 nya “siti lagu ti muji kuasa Petara ti nyelamatka bala nembiak Iya.” Lebuh nembiak Petara belaguka Masmur 46 sida ngayanka pengandal Jehovah deka ngelindung sereta nulung sida. (Masmur 46:1, 2) Leka lagu nya mega ngingatka sida pasal Jehovah seruran bisi enggau sida.—Masmur 46:7, 11.

 Kena nulung sida andal agi Jehovah bisi kuasa nulung sida, masmur tu ngasuh sida belematika utai ti ngalitka ati ke udah digaga Petara. (Masmur 46:8) Masmur tu pan ngasuh sida ngenang baru pasal chara Jehovah ngujungka perang. (Masmur 46:9) Jehovah ulih disebut ngujungka perang maya jeman Bup Kudus lebuh Iya ngelindung nembiak Iya ari munsuh sida. Taja pia, Bup Kudus besemaya enda lama da agi Petara deka lebih agi ngereja tu lebuh Iya ngujungka perang di serata dunya.—Isaiah 2:4.

 Kati Jehovah agi nulung nembiak Iya kemayaharitu? Au. Indah rasul Paul bebendar ngasuh orang Kristian bepanggai ba tulung ari Jehovah. (Hebrew 13:6) Ayat ba Masmur 46 ngasuh kitai andal agi ngagai pengering Jehovah ke ulih ngelindung kitai. Nya nulung kitai ingat Petara nya “pengelindung enggau pengering kitai.”—Masmur 46:1.

 Peda video pandak tu ti ngelansa utai ke bisi dalam bup Masmur.