“Giga pengelantang kita ari Tuhan, lalu iya deka meri kita utai ti lebih dikingin ka kita.”—Masmur 37:4, Bup Kudus Ka Rebak Diatu.

 “Gaga ati ke TUHAN, lalu Iya deka meri nuan utai ti dikinginka nuan.”—Masmur 37:4, Bup Kudus Baru.

 Penulis masmur tu meransang orang ke nyembah Petara ngiga pengaga ati ari kaul sida ti rapat enggau Iya. Semua orang ke ngembuan kaul ti rapat enggau Petara Jehovah a ulih andalka Iya deka meri utai ti badas ke dikinginka sida.

 ‘Giga pengelantang kita ari Jehovah.’ Rambai jaku tu ulih disalin ngagai “gaga ati ke Jehovah,” “gaga ati meh nyembah Jehovah,” tauka “gaga ati ke utai ti udah disemayaka Jehovah.” Pandakka jaku, kitai patut bulih pengaga ati ti pemadu besai ari nyembah Petara ti bendar. (Masmur 37:4) Nama kebuah kitai ulih madah baka nya?

 Orang ke nyembah Jehovah nguji ngembuan runding ti sama enggau Iya baka ke udah dipelajar sida ari Bup Kudus. Sida ukai semina ngelala Petara tang sida pan nemu sida patut ngasika Iya. Asil iya, sida bisi ati ti beresi sereta ulih nyeliahka diri ari ngereja penyalah enggau ngaga pemutus ti enda manah. (Jaku-Dalam 3:5, 6) Ambika chunto, lebuh meda orang ke amu tauka enda jujur baka ke mujur ba pengidup sida, orang ti nyembah Petara enda pedis ati tauka ngining pasal pengidup sida, tang mengkang tenang. (Masmur 37:1, 7-9) Nembiak Petara gaga ati laban sida nemu enda lama da agi Petara deka muai orang ke enda lurus lalu ngupah sida ke tetap ati ketegal ulah sida ti manah. (Masmur 37:34) Sida mega gaga ati laban nemu diri udah ngelantangka ati Apai sida ti ba serega.—Masmur 5:12; Jaku-Dalam 27:11.

 “Iya deka meri kita utai ti lebih dikingin ka kita.” Rambai jaku tu ulih disalin ngagai “Iya deka nyaut sampi nuan” tauka “Iya deka meri utai ti pemadu dikinginka nuan.” Endang amat, Jehovah enda meri tiap iti utai ke dipinta kitai. Baka apai indai ti manah, Jehovah nemu utai ti pemadu manah ba bala anak Iya. Kelimpah ari nya, utai ke dipinta kitai sereta gaya pengidup kitai patut sejalai enggau peneka Petara sereta standard Iya. (Jaku-Dalam 28:9; James 4:3; 1 John 5:14) Enti kitai ngereja nya, kitai ulih andal Petara deka ninga sampi kitai.—Masmur 65:2; Matthew 21:22.

 Masmur 37 ditulis David, raja orang Israel kelia. Iya nulis masmur tu nitihka tusun abjad. b

 David suah napi utai ti enda lurus ba pengidup iya. Iya patut ngerarika diri ari Raja Saul sereta orang bukai ke deka munuh iya. (2 Samuel 22:1) Tang David seruran arapka Petara enggau pengabis ati. David nemu nyau kelama Jehovah deka ngukum orang ke jai. (Masmur 37:10, 11) Taja sida ngerembai baka “rumput” tang sida deka lesap.—Masmur 37:2, 20, 35, 36.

 Masmur 37 mandingka pengujung orang ke ngasika standard Petara enggau orang ke ngelaban Iya. (Masmur 37:16, 17, 21, 22, 27, 28) Jaku lalau ba masmur tu nulung kitai nyadi orang ke bepenemu-dalam sereta diterima Petara.

 Peda video pandak tu ti ngelansa utai ke bisi dalam bup Masmur.