Kaban nuan, mai nuan beparti ujung minggu tu. Nuan nanya apai indai sekalika ulih enggau tauka enda, tang saut sida “Enda ulih.” Nuan enda tekenyit, laban sida meri saut ti sama baka selama.

Ba artikel tu

•  Nama kebuah apai indai aku seruran madah enda ulih?

•  Nama chara ke ulih ngasuh apai indai ngemendarka aku enjoy?

•  Nama ku nembiak serambau nuan

 Nama kebuah apai indai aku seruran madah enda ulih?

 Enti apai indai nuan seruran nagang peminta nuan, nuan engka ngasaika sida enggai meda nuan enjoy.

 Siku nembiak ke benama Marie ngasaika utai tu lebuh iya bulih handphone. Iya madah, “Apai aku meri mayuh syarat pasal ni bagi aplikasi ke ulih didownload aku, sapa ke ulih enggau aku bemesej, sereta ni pengelama aku ulih bejaku enggau sida. Tang, bala kaban aku ulih ngereja sebarang utai ke dikedekaka sida!”

 Perundingka: Kati apai Marie amat nguji nagang iya ari enjoy? Nama utai ke engka dikeirauka iya?

 Uji tu: Gambarka nuan empu nyadi apai indai, lalu nuan bisi siku anak ke nembiak ti baru ngembuan handphone. Nama utai ke dikeirauka nuan? Nama syarat ke engka digaga nuan kena nyaga iya? Nama deka dipadahka nuan enti iya ngumbai nuan enggai meda iya enjoy?

 “Apai aku seruran madah, ‘Uji gambarka nuan empu nyadi apai indai.’ Lebuh aku ngereja tu, tu nulung aku ukai semina meda pemanah syarat ke ditetapka iya, tang mega kebuah syarat nya digaga. Enti aku bisi anak, asai aku, aku pan ngarapka utai ti sama ari sida baka apai aku.”—Tanya.

 Nama chara ke ulih ngasuh apai indai ngemendarka aku enjoy?

 “Kesuah iya, apai indai aku bisi kebuah ti manah ba tiap iti syarat ke ditetapka sida. Apai indai aku ukai enda ngemendarka aku enjoy, tang sida semina dekaka aku enjoy enggau chara ti betul, iya nya pekara ke enda ngemediska aku.”—Ivy.

 Prinsip Bup Kudus: “Orang ke beli ngayanka pengeringat diri di mua orang mayuh, tang orang ke mereti, nemu liat ati lalu nagang diri ringat.”—Jaku-Dalam 29:11.

 “Sabar. Apai indai nuan engka begunaka awak kena ngubah siti syarat, tang enti sida meda nuan ngasika syarat ke udah diberi sida ngagai nuan, sida engka deka meri nuan mayuh agi kebibasan.”—Melinda.

 Prinsip Bup Kudus: “Ngasika apai indai kita dalam semua pekara.”—Kolosi 3:20.

 “Apai indai deka meda nuan ulih ngaga pemutus ti betul. Nyadi, lebuh aku bejaku enggau apai indai, aku nguji madahka utai ti betul ari ke nitihka emosi aku. Ketegal tu, apai indai ngemendarka aku ngereja utai ke dipinta aku.”—Joseph.

 Prinsip Bup Kudus: “Bebasaka apai enggau indai nuan.”—Epesus 6:2.