•  Utai ke patut ditemu nuan

•  Utai ke ulih dikereja nuan

•  Nama ku nembiak serambau nuan

 Apai indai deka pechayaka nuan agi enti nuan nunjukka diri ulih dipechaya. Ngasika pesan apai indai nya sempama baka nuan mayar utang. Nuan berutang ba apai indai, lalu chara mayar iya nya enti nuan ngasika sida. Enti nuan selalu ‘mayar,’ nuan deka bulih ‘bonus’ (tauka bibas agi) ari sida. Tang, enti nuan enda ulih dipechaya, apai indai nuan tentu enda meri ‘bonus’ tauka nuan enda ulih bibas pilih.

 Begunaka awak ngambika nuan ulih dipechaya. Enti nuan nunjukka diri ulih betanggungjawap, apai indai nuan deka pechayaka nuan lalu meri nuan mayuh agi pilih.

 CHERITA AMAT: “Ketegal agi biak, taja pan aku udah nemu nama kedeka apai indai, aku pepura ngasika sida, tang iya ke amat, aku belalai ngereja utai kedeka aku. Tu ngujungka apai indai aku tusah deka pechayaka aku. Nyau kelama, aku nemu ulah ti baka tu nadai mayuh pilih. Enti nuan dekaka orang bukai pechayaka nuan, nuan patut nunjukka diri ulih dipechaya.”—Craig.

 Anang bula taja pan tusah. Semua orang ngereja penyalah, tang enti nuan bula (tauka ngelalaika sesiti pekara), nuan ngasuh apai indai asa sereta enda pechayaka nuan agi. Tang, enti nuan enda bula, apai indai nuan ulih meda nuan nya orang ti nemu berunding sereta deka ngaku penyalah diri. Orang ke baka tu ulih dipechaya.

 “Ukai reti iya orang enda ulih pechayaka nuan agi enti nuan ngereja penyalah. Tang, nuan ulih enda dipechayaka agi enti nuan nguji belalaika penyalah diri.”—Anna.

 Bup Kudus madahka, ‘Kami deka ngereja utai ti badas berari.’—Hebrew 13:18.

•   Perundingka: Lebuh apai indai nanya kini ke penunga nuan enggau nama digaga nuan, kati nuan bejaku amat ngagai sida? Tauka nuan nguji meri saut ti ngasuh sida salah runding??

 Betanggungjawap. Ngasika semua atur ba rumah. Ngereja pengawa ba rumah enggau enda betangguh. Enda bulaka semaya. Tembuka kereja sekula. Pulai ba jam ti udah ditetapka apai indai.

 “Enti apai indai nuan udah ngemendarka nuan pansut enggau bala bakih lalu ngasuh nuan pulai jam 9:00 malam, tang nuan pulai 10:30 malam, anang meh nuan ngarapka diri pansut agi udah nya!”—Ryan.

 Bup Kudus madahka, ‘Genap iku kitai enda tau enda mai ma diri empu.’—Galatia 6:5.

•   Perundingka: Kati nuan selalu ngamatka semaya? Kati nuan bebendar nembuka pengawa nuan? Kati nuan seruran ngasika atur, taja pan atur nya enda dikerinduka nuan?

 Sabar. Enti apai indai lenyau asai ati ti pechayaka nuan, sabar meh nganti maya sida ulih pechayaka nuan baru.

 “Aku berasai tusah ati laban apai indai enda meri aku mayuh agi tanggungjawap taja pan aku udah besai umur. Aku enda nemu umur seseiku orang nya enda ulih nentu sekalika iya udah nemu berunding tauka enda. Aku minta ngagai apai indai ngambika meri aku peluang ti ulih nunjukka diri ulih dipechaya. Taja pan pekara nya begunaka awak, tang nyau kelama sida ulih pechayaka aku. Aku mega belajar, pengawa ke dikereja kitai nya ulih ngasuh orang pechayaka kitai ukai bepanggai ba umur.”—Rachel.

 Bup Kudus madahka: “Peresa diri empu, kena nentuka kita amat idup ngena pengarap tauka enda.”—2 Korint 13:5.

•   Perundingka: Kati ‘pengawa badas’ nuan ulih ngasuh apai indai nuan pechayaka nuan?

 CHARA: Tetapka meh juluk ati enda ngira dalam ngamatka semaya, nembuka pengawa ba rumah, pulai ba maya ti udah ditetapka, tauka dalam semua utai. Padahka apai indai nuan pasal juluk ati nuan nya, lalu tanya sida utai ke patut dikereja nuan ngambika sida lebih pechayaka nuan. Udah nya, uji titihka lalau ari Bup Kudus tu, ‘buai jalai pengidup kitai ti lama.’ (Epesus 4:22) Apai indai tentu ulih meda pemansang nuan!