•  Nama utai ke patut ditemu nuan

•  Nama utai ke patut digaga nuan

•  Nama ku bala serambau nuan

•   Ba entara mensia, endang sigi bisi penanggul enggau pangan diri. Ketegal semua kitai enda sempurna, bakih nuan ti rapat tauka orang ti dikumbai nuan bakih ti pemadu manah pan tentu ngereja tauka nyebut jaku ti ulih ngemediska ati nuan. Pia mega, nuan empu enda sempurna. Nya alai, tanya diri empu enggau lurus, “Kati aku enda kala ngemediska ati orang bukai?”​—James 3:2.

•   Orang deka senang agi enda nyamai ati nengah internet. Ngambika chunto, seiku nembiak lelaki ke benama David madah, “Lebuh nuan online lalu meda gambar bala bakih nuan dibai ngagai sesiti parti, tang nuan engka berunding, nama kebuah nuan enda dibai. Udah nya, nuan berengkah ngasaika diri dikelaungka orang bukai sereta tusah ati.”

•   Nuan ulih mutarka penanggul tu.

 Meresa diri empu. Bup Kudus madah: “Anang lengkar. Nuan beli enti nuan bedendam.”​—Pengajar 7:9.

 “Kekadang, nyau kelama, baru meh nuan nemu diri enda nyamai ati enggau utai ti mit aja.”​—Alyssa.

 Perundingka: Kati nuan jampat berasai enda nyamai ati? Ulih nuan belajar sabar agi enggau orang bukai ti enda sempurna?​—Pengajar 7:​21, 22.

 Perundingka penguntung iya enti ngampun. Bup Kudus madah: “Nuan deka dipuji orang enti nuan enda bedulika penyalah nya.”​—Jaku Dalam 19:11.

 “Taja pan nuan bisi kebuah enda nyamai ati, tang belajar meh ngampun orang nya enggau ati ti deka. Reti iya, nuan enda majak ingatka utai ti lama lalu ngasuh iya majak minta ampun tiap kali nuan bejaku pasal pekara nya. Enti nuan udah ngampunka iya, anang ingatka pekara nya agi.”​—Mallory.

 Perundingka: Kati penanggul nya bangat besai? Ulih nuan ngampunka iya ngambika bisi pemaik?​—Kolosi 3:​13.

 Perundingka pasal orang bukai. Bup Kudus madah: “Anang semina berundingka diri empu aja, tang berundingka mega ke orang bukai.”​—Pilipi 2:4.

 “Enti kaul nuan bisi basa sereta pengerindu, nuan tentu bisi kebuah deka mutarka penanggul nya enggau jampat. Tu ketegal nuan udah bebendar ngetanka kaul nya. Lalu nuan enggai ngelebuka utai ti udah digaga nuan nya.”​—Nicole.

 Perundingka: Ulih nuan ngiga utai ti manah ba jaku tauka runding orang bukai?​—Pilipi 2:3.

 Nyadika simpul: Mutarka asai ati ti enda nyamai nya siti chara ti ulih meri nuan pengelandik lebuh nuan mansang besai.