Lebuh nemu tetemuka siku orang, nuan engka tekait ati enggau iya, lalu seduai berengkah berunding deka dating kena nemu sekalika seduai ulih nyadi kaling pengidup ti ngam. Bisi sekeda utai ke deka nyadi lebuh seduai dating, ke patut disadang seduai.

Ba artikel tu

•  Kingatka, seduai patut beterus terang enggau pangan diri

•  Kingatka, seduai enda selalu sepenemu

•  Kingatka, dating ulih mai stress

 Ketegal seduai ngena mayuh awak begulai, seduai deka belajar mayuh pasal pangan diri. Nuan deka belajarka sekeda utai lebuh nuan beratika ulah iya.

 Tang bisi sekeda pekara ke bukai seduai patut berandau enggau jujur. Seraya seduai berandau, seliahka ari ngaga kesimpulan pasal pangan nuan nitihka asai ati, tang gaga pemutus bepelasarka fakta.

 Peratika sekeda topik ke patut dikerandau seduai:

•   Belanja. Kati nuan bisi utang? Kati nuan tusah deka ngatur belanja? Enti seduai deka kawin, baka ni seduai ngaga pemutus pasal kereja enggau belanja?

•   Pengerai. Kati nuan bepengerai? Kati nuan kala bisi penanggul ti serius ba pengerai?

•   Juluk ati. Nama utai ke deka digaga nuan ba pengidup? Kati juluk ati nuan sebaka enggau pangan nuan? Pengudah seduai kawin, enti situasi berubah lalu juluk ati nuan enda ulih dijapai, kati nuan agi ulih gaga ati?

•   Ruang bilik. Kati nuan bisi ngibun siku ari ruang bilik nuan? Kati nuan nyangka ba dudi hari nuan deka megai tanggungjawap tu? Kati nuan ka bisi anak? Enti au, berapa iku?

 Lebuh seduai berandauka topik ke baka tu, berandau meh enggau jujur. Anang ngelalaika tauka mutarbelitka fakta pasal diri empu semina ketegal deka narit ati orang nya.—Hebrew 13:18.

 Tanya diri empu: Nama utai ke patut ditemu nuan pasal pangan nuan? Nama utai ke patut ditemu iya pasal nuan? Enti seduai mutus deka kawin, baka ni randau ti jujur diatu ulih nulung seduai berandau enggau manah dudi hari?

 Prinsip Bup Kudus: “Kita patut nyebut utai ti amat ngagai pangan diri.”—Epesus 4:25

 “Indu nya engka berunding, ‘Kami engka deka betunang dalam enam bulan,’ tang lelaki nya engka berunding nya deka ngambi awak dalam setaun. Dalam situasi baka tu, indu nya engka asa ati laban lelaki nya deka ngambi awak ti panjai agi ari ke disangka iya. Amat penting enti kedua-dua piak nemu nama utai ke diperundingka pangan diri.”—Ariana, ke udah jadi pengelama setaun.

 Semua orang bebida ari pangan diri. Nya alai, anang ngumbai nuan enggau pangan nuan deka setuju pasal semua utai tauka ngembuan asai ati enggau runding ti sama. Ambika chunto, runding nuan engka tepengaruh enggau budaya nuan tauka chara nuan dibesaika.

 Tanya diri empu: Lebuh seduai enda sepenemu pasal siti pekara ti enda penting, lalu nya enda ngelanggar standard Bup Kudus, kati seduai sanggup ngalahka diri ngambika enda belaya lalu ulih ngetanka kaul ti rapat enggau pangan diri?

 Prinsip Bup Kudus: “Awakka semua orang nemu, kita ukai orang ke enda masuk akal.”—Pilipi 4:5.

 “Taja pan nuan ngumbai nuan enggau pangan nuan amat ngam, tang tentu bisi utai ke ngasuh seduai enda sepenemu. Ngembuan minat ti sama nya penting. Tang, ulah ke diayanka seduai lebuh enda sepenemu nya penting agi.”—Matthew, ke udah jadi pengelama lima taun.

 Dating begunaka mayuh awak lalu nya ulih ngasuh nuan stress. Nama utai ke ulih nulung?

 Nuan patut seimbang. Anang kelalu befokus ngagai pangan nuan nyentukka nuan enda ingat tanggungjawap nuan tauka bala kaban nuan ke bukai. Alana, ke udah kawin pengelama lima taun madahka: “Taja pan nuan udah kawin, nuan agi begunaka bala kaban nuan, lalu sida mega begunaka nuan. Anang ngelaungka sida diatu ketegal nuan benung dating.”

 Kingatka, lebuh nuan udah kawin, nuan agi patut seimbang lebuh magi awak enggau pengering ngagai mayuh macham pengawa ba pengidup. Endaka manah ngemansangka sifat tu lebuh nuan dating?

 Tanya diri empu: Kati nuan minta kelalu mayuh perhatian sereta awak ari pangan nuan? Kati nuan ngasaika iya minta kelalu mayuh ari nuan? Enda manah enti nuan tauka pangan nuan berasai ditekan ba emosi tauka enda ulih berundingka utai bukai. Nyadi, baka ni seduai ulih seimbang ngambika nyeliahka utai tu ari nyadi?

 Prinsip Bup Kudus: ‘Semua utai ti nyadi di dunya ti endang nyadi ba maya ti diletak Petara.’—Pengajar 3:1.

 “Enti orang ke dating seruran main-main aja, sida engka tekenyit sereta asa ati enggau pengidup pengudah sida jadi melaki-bini. Manah agi enti lelaki enggau indu ke benung dating ngereja pengawa ke biasa dikereja ninting hari baka shopping, ngereja pengawa ba rumah sereta pengawa sembah. Tu nulung sida nemu chara bekerejasama, lalu nya ulih nyadi siti tebiat ti manah pengudah sida kawin.”—Daniel, ke udah jadi pengelama dua taun.

 Kingatka, nuan enggai dating belama. Dating deka nulung nuan ngaga pemutus sekalika nuan deka jadi enggau orang tu tauka mutuska kaul nya. Begian ketiga ari siri tu deka berandauka utai ke ulih diperundingka nuan lebuh ngaga pemutus.