•  Aku seruran, selalu, kekadang, enda kala . . .

  •  enda bula

  •  ulih dikearapka

  •  datai ba maya ti ditetapka

  •  bagas

  •  teratur

  •  senang meri tulung

  •  enda bechiping

  •  bebasaka orang

  •  ibuhka orang

•   Ari beberapa iti kualiti ba atas, ni bagi nuan?

   Terus meh ngetanka kualiti ti manah nya.—Pilipi 3:16.

•   Ni bagi kualiti ti patut dikemansangka nuan?

 Bacha meh artikel tu, ngambi nuan nemu chara deka ngembuan kualiti nya.

 Orang ke betanggungjawap deka bejalaika semua pengawa iya ba rumah, ba sekula, tauka ba dini-dini endur. Iya nemu patut betanggungjawapka semua pengawa diri. Nya kebuah, enti iya ngereja penyalah, iya ngaku, minta ampun, lalu bebendar ngaduka penyalah diri.

 Bup Kudus madah: “Laban genap iku kita enda tau enda mai ma diri empu.”—Galatia 6:5.

  Orang ke betanggungjawap deka ngena pengelandik iya enggau chara ti manah. Ketegal tu, orang deka agi bebasaka iya, nemu berunding sereta diberi mayuh agi pengawa ke badas.

 Bup Kudus madah: “Kati nuan bisi meda orang ke landik gawa? Iya deka bekereja ke raja; iya enda bekereja ke orang ke sengapa-dia.”—Jaku Dalam 22:29.

  Orang ke betanggungjawap rindu meri, sereta bala kaban iya ulih ngasaika iya seiku kaban ti senang enggau begulai.

 Bup Kudus madah: “Beri, lalu kita deka diberi.”—Luke 6:38.

  Orang ke betanggungjawap ulih berasai puas sereta temegah enggau pengawa ke digaga iya. Ketegal tu, iya ulih pechaya agi kediri empu.

 Bup Kudus madah: “Genap iku kita patut meresa pengawa diri. Nya baru iya tau temegahka diri empu, ukai temegahka orang bukai.”—Galatia 6:4.

 Kena nyaut tanya tu, uji peratika beberapa iti pekara ba baruh tu. Asai nuan, ni bagi ulah ba ditu nyauka baka nuan?

 “Aku enda rindu digaga baka anak mit. Taja pan sejam aja nadai dipeda pan patut madahka apai indai!”—Kerri.

 “Kesuah iya apai indai aku meri pemendar enti aku deka pansut begulai enggau bala kaban.”—Richard.

 “Lebuh aku meda nembiak ke serambau aku ulih ngereja utai ke deka sida, aku pan berunding: ‘Nyamai amat iya! Enti aku, nadai jaku nya!”—Anne.

 “Kesuah iya apai indai enda nagang aku ngereja utai kedeka aku. Aku amat beterima kasih laban sida meri aku peluang bibas.”—Marina.

 Tanya ti diperundingka: Nama kebuah bisi sekeda nembiak bibas lalu bisi sekeda enda? Nama kebuah enda sama?

 Fakta: Enti apai indai ulih pechayaka nuan, sida deka meri nuan mayuh agi peluang bibas milih kediri.

 Chunto, uji peratika nama ku dua iku nembiak ke tadi.

 Richard: “Keterubah iya, apai indai kakang ati deka ngasuh aku bibas agi. Tang ketegal sida meda aku lebih agi betanggungjawap, sida pechaya agi ke aku. Aku enda kala bula pasal kini ke penunga aku tauka enggau sapa aku begulai. Aku mega deka madahka nama pengawa ke deka dikereja aku sebedau sida nanya.”

 Marina: “Sepemanjai pengidup aku, udah dua kali aku bula ke apai indai. Lalu dua iti penyalah nya pan ditemu sida. Tang, kenyau ari nya, aku enda bula agi. Chunto, aku selalu madahka enggau silik pasal utai ke deka dikereja aku, lalu enti sema aku nadai ba rumah, sida tentu udah dipadah dini endur aku. Diatu, sida pechaya agi ke aku.”

 Kati nuan deka neladan Richard enggau Marina? Uji saut tanya tu enggau lurus:

PENGAWA BA RUMAH

•   Enti apai indai meri nuan pengawa, kati nuan ngereja nya enggau manah?

•   Kati nuan udah datai ba rumah ba jam ti udah ditetapka apai indai?

•   Kati nuan bebasaka apai indai sereta bala menyadi?

 Ari tiga iti tanya tadi, ni bagi ke patut dikemansangka nuan?

 Bup Kudus madah: “Ngasika apai indai kita.”—Epesus 6:1.

PENGAWA BA SEKULA

•   Kati nuan nembuka kereja sekula ba maya ti udah ditetapka?

•   Kati markah peresa nuan majak mujur?

•   Kati nuan bagas belajar?

 Ari tiga iti tanya tadi, ni bagi ke patut dikemansangka nuan?

 Bup Kudus madah: “Penemu-dalam deka ngasuh nuan likun.” (Pengajar 7:12) Enti nuan belajar enggau manah, nuan deka bulih penemu.

ULAH NUAN

•   Kati nuan enda kala bulaka apai indai sereta bala kaban nuan?

•   Kati ulih nuan ngatur belanja enggau betanggungjawap?

•   Kati orang bukai ulih ngasaika nuan ulih ngidupka diri?

 Ari tiga iti tanya tadi, ni bagi ke patut dikemansangka nuan?

 Bup Kudus madah: “Nyadi mensia ti baru.” (Epesus 4:24) Nuan ulih ngemansangka agi ulah ti manah.