“Nuan enda tau nyelai ari orang bukai. Enti enda, nadai orang deka bekaban enggau nuan. Pengidup nuan tentu puang, lalu nuan nadai tuju pengidup.”—Carl.

 Nuan engka ngasaika jaku nya kelalu dilangkungka. Tang, bisi sekeda orang sanggup ngereja sebarang utai, ngambika bulih kaban. Baka ni enggau nuan? Artikel tu deka nulung nuan ngiga chara ti manah agi.

•  Nama kebuah orang enggai enda bisi kaban?

•  Utai ke patut ditemu nuan

•  Nama ku nembiak serambau nuan

•   Sida enggai enda dikeibuhka. “Ba media sosial, aku meda gambar bala kaban ba sekula aku pansut begulai enggau pangan diri. Tang, sida nadai mai aku. Udah nya aku alit ati, nama penyalah aku nyentukka nadai orang mai aku? Kati aku enda chukup manah nyadi kaban sida? Tusut runding aku.”—Natalie.

   PERUNDINGKA: Kala nuan berasai enda dikeibuhka? Enti kala, nama patut digaga nuan ngambika ulih nyadi kaban sida?

•   Enggai dikumbai nyelai. “Apai indai enda ngemendarka aku ngembuan handphone kediri empu. Nembiak bukai selalu tekenyit lebuh sida nemu aku nadai handphone. Sida nanya, ‘Apu! Berapa umur nuan?’ Aku madahka diri 13 taun, lalu mua sida baka ke sinu meda aku.”—Mary.

   PERUNDINGKA: Nama atur ari apai indai ke ngasuh nuan baka ke nyelai ari orang bukai? Nama digaga nuan?

•   Enggai dikachau. “Nembiak ba sekula enda rinduka nembiak bukai ke tampak nyelai, chara bejaku ti nyelai, tauka ngembuan pengarap ti nyelai. Enti nuan enda sama baka sida, nuan tentu nyadi tagit kena kachau.”—Olivia.

   PERUNDINGKA: Kala nuan dikachau ketegal nuan nyelai ari orang ke ngelingi nuan? Nama digaga nuan?

•   Enggai lenyau kaban. “Aku bebendar ngubah personaliti diri ngambika diterima orang bukai. Aku nitihka stail sida bejaku, sama ketawa taja pan aku ngasaika nya enda luchu, lalu enggau sida ngeleseka orang bukai taja pan aku ngasaika pengawa nya enda manah.”—Rachel.

   PERUNDINGKA: Ba runding nuan, kati nya beguna bendar enti nuan diterima bala kaban nuan? Kala nuan ngubah personaliti diri ketegal deka diterima sida?

•   Orang nemu nuan semina pepura aja. Kesuah iya, orang nemu enti nuan pepura tauka enda. Brian ke beumur 20 taun madah, “Majak aku pepura ketegal deka diterima orang ke sama sekula, majak sida ngenyauhka diri ari aku. Aku ngasaika, manah agi aku enda nitihka chara orang bukai, laban nya meh ngasuh orang ka agi ngenyauhka diri ari aku.”

   CHARA TI MANAH: Nuan patut nemu nama utai ke dikemeratka nuan empu. Bup Kudus madahka, “nemu milih utai ti pemadu badas.” (Pilipi 1:10) Tanya diri empu, “Ni beguna agi, diterima orang bukai tauka nemu utai ke diguna diri empu?”

   “Nadai guna enti nuan semina pepura baka orang bukai. Nya ukai ngasuh orang rinduka nuan, nambahka nya, nuan mega enda ulih nyadi orang ke manah agi.”—James.

•   Nuan deka lenyau pemanah ke dikembuan diri empu ketegal kelalu nitihka chara orang bukai. Nuan nyadi orang ke kelalu deka ngelantangka ati orang bukai, lalu kelalu nitihka pengingin sida. Seiku nembiak lelaki ke benama Jeremy madah, “Suba, aku sanggup ngereja sebarang utai ngambi diterima orang bukai. Nyentukka aku lenyau pemanah diri empu. Aku ngemendarka sida nguasa aku, nyentukka aku sempama baka anak patung ba sida.”

   CHARA TI MANAH: Anang baka jelu kameleon ke betukar kala nitihka utai ti ngelingi iya. Nuan patut sapa diri empu. Bup Kudus ngelalau kitai, “Anang nitihka orang mayuh.”—Pemansut 23:2.

   “Aku bebendar nguji rinduka semua utai ke dikerinduka sida baka musik, main, chara begari, cherita wayang, chara nganta . . . Aku nguji deka baka sida. Tang sayau, sida nemu aku semina pepura aja, lalu aku empu pan ngasaika nya. Udah nya, aku ngasaika diri lebih agi kediri sereta puang. Aku nyau enda ngelala sapa diri empu. Ari utai ke nyadi, aku belajar, ukai semua orang deka nerima tauka rinduka nuan. Tang nya ukai reti iya nuan enda ulih ngiga kaban baru. Nuan begunaka awak ngambi ulih nyadi orang ke nemu berunding sereta enda kelalu nitihka ati.”—Melinda.

•   Nuan senang nitihka orang ketegal deka diterima. Seiku nembiak lelaki ke benama Chris madah, utai tu kala nyadi ba petunggal iya. Chris madahka, “Iya berengkah ngereja utai ti salah. Chunto iya, iya belabuh makai dadah ketegal deka diterima orang bukai. Tu ngujungka iya gian makai dadah, lalu pengidup iya nyauka anchur.”

   CHARA TI MANAH: Seliahka orang ti ngembuan chara bejaku tauka bisi pengawa ke enda tentu bemoral. Bup Kudus madah, “Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida. Enti nuan bepangan enggau orang ke beli, nuan deka rusak.”—Jaku Dalam 13:20.

   “Kekadang nuan endang patut ngelantangka ati orang bukai. Tang, ukai reti iya nuan patut ngemaruhka standard moral diri empu, ketegal deka diterima orang bukai. Kaban ti bendar deka nerima sapa nuan ti bendar, lalu enda mejal nuan berubah nitihka chara sida.”—Melanie.

   Chara: Maya ngiga kaban ti baru, anang ngiga kaban ke ngembuan minat ti sama enggau nuan. Giga meh orang ke ngembuan standard pengarap ti manah sereta standard moral ti sama.