Nama patut digaga nuan lebuh utai tu nyadi?

1.   Pengajar nganu nuan ba mua orang ke sama sekelas, laban nuan manchal.

    Kati nuan patut minta ampun, taja pan nuan ngasaika iya kelalu balat nganu?

2.   Nuan nyebut utai ti enda manah pasal kaban nuan, lalu iya pan nemu.

    Kati nuan patut minta ampun, taja pan nuan ngasaika utai ti disebut nuan nya enda salah?

3.   Nuan ringat enggau apai nuan, nya kebuah nuan bejaku kasar enggau iya.

    Kati nuan patut minta ampun, taja pan nuan ngasaika iya ngemediska ati nuan?

 Au, nuan patut minta ampun. Tang, nama kebuah patut minta ampun, taja pan nuan enda salah?

•  Kebuah minta ampun

•  Chara minta ampun

•  Nama ku nembiak serambau nuan

•   Nya tanda iya nuan nemu berunding. Semua kitai patut betanggungjawapka jaku sereta ulah diri empu. Enggau chara nya, kitai belajarka ulah ti amat beguna ke dikena kitai maya mansang besai.

   “Enti kitai baruh ati sereta sabar, kitai senang agi ngampun lalu deka ninga runding orang bukai.”—Rachel.

•   Nuan ulih ngembuan kaul ti manah enggau orang bukai. Orang ke nyebut, “Minta ampun au,” nunjukka iya amat beberatka kaul ti manah enggau orang bukai. Lalu ngasaika nya beguna agi ari ke betatika sapa betul tauka sapa salah.

   “Taja pan kitai ngasaika diri enda salah, tang kaul kitai enggau orang bukai nya beguna agi. Enda rugi minta ampun. Tang nya ulih ngemanahka agi kaul kitai enggau orang bukai.”—Miriam.

•   Nuan deka berasai nyamai agi. Lebuh kitai ngemediska ati orang bukai, kitai berasai besalah. Nya nyadi ma ke kitai. Tang, enti kitai minta ampun, ma nya berasai lempung. a

   “Kekadang, aku bejaku kasar enggau apai indai, udah nya aku nasal. Amat, minta ampun enda senang. Tang lebuh aku minta ampun, aku berasai nyamai agi, lalu kaul diri sebilik kami mega manah agi.”—Nia.

 Kati minta ampun nya senang? Enda. Seiku nembiak indu ke benama Dena patut beberapa kali minta ampun ketegal enda bebasaka indai iya. Iya madah, “Tusah amat ka nyebut minta ampun. Asaika bisi utai lekat ba rekung aku, nyentukka aku tusah deka bejaku.”

•   Enti ulih, betemu enggau orang nya. Enti kitai ulih terus betemu enggau orang nya, orang nya ulih meda sekalika kitai minta ampun ari ati tauka enda. Tang enti kitai minta ampun nengah mesej, orang nya engka berasai kakang. Taja pan mesej nya bisi emoji gamal tusah ati, tang orang nya engka agi tusah pechaya.

   Chara: Enti nuan enda ulih betemu enggau orang nya, nuan ulih betalipun tauka nulis jaku minta ampun ngena kad. Enda ngira nama chara, perundingka enggau dalam leka jaku ke deka dikena.

   Prinsip Bup Kudus: “Orang ke menyana berunding dulu sebedau sida nyaut.”—Jaku Dalam 15:28.

•   Anang betangguh minta ampun. Enti nuan betangguh minta ampun, penanggul nya deka nyadi balat agi. Kaul nuan enggau orang nya mega majak jauh.

   Chara: Gaga pelan, ngambika chunto, ‘Saritu, aku deka minta ampun.’ Tetapka maya nuan patut ngereja nya. Udah nya, terus minta ampun.

   Prinsip Bup Kudus: “Bebaik enggau naka penyampat.”—Matthew 5:25.

•   Minta ampun ari ati. Enti kitai nyebut, “Minta ampun laban nuan berasai baka nya”, nya ukai jaku ti datai ari ati. Seiku nembiak indu ke benama Janelle madah, “Enti kitai amat nesal ati, orang ke dikemediska kitai ati tentu deka ngampunka kitai.”

   Chara: Anang netapka atur. Pandakka jaku, anang nyebut, “Aku deka minta ampun, tang nuan mega patut minta ampun, laban nuan mega salah.”

   Prinsip Bup Kudus: “Aram kitai ngereja utai ti mai pemaik.”—Rome 14:19.