Kati bisi kaban tauka diri sebilik nuan baru udah nadai? Enti au, artikel tu ulih nulung nuan napi asai ati ti balat tusah nya.

Ba artikel tu

•  Kati aku kelalu balat tusah ati?

•  Chara napi asai ati ti balat tusah

•  Nama ku nembiak serambau nuan

 Ba mayuh orang, asai ati ti balat tusah, amat balat sereta ngambi masa ti panjai.

 “Aku selalu berunding pasal aki aku. Taja pan iya udah nadai pengelama dua taun, tang aku agi nyabak lebuh berandau pasal iya.”—Olivia.

 “Ini, selalu meransang aku nyapai juluk ati. Tang iya enda sempat meda aku nyapai semua juluk ati aku. Tiap kali aku ulih nyapai juluk ati aku, aku berasai amat tusah ati laban iya enda meda.”—Alison.

 Lebuh bisi orang nadai, nuan deka napi emosi ti bebida. Chunto iya:

 “Maya aya aku nadai, aku balat tekenyit dalam timpuh ti lama. Aku enda pechaya tu nyadi. Tu meh keterubah, orang ke pemadu rapat enggau aku nadai. Aku asaika dilantak kerita api.”—Nadine.

 “Aku berasai ringat lebuh aki nadai, laban iya enda nyaga pengerai diri taja pan kami udah ngelalau iya.”—Carlos.

 “Entara diri sebilik ke rapat, semina aku enggau kakak aku aja nadai datai maya aki aku nadai. Pengudah nya, aku berasai besalah laban aku enda ngucap selamat tinggal ngagai iya.”—Adriana.

 “Sepasang laki bini ke rapat enggau kami sebilik mati eksiden. Udah nya, tiap kali diri sebilik kami pansut ari rumah, aku takut iya deka mati mega.”—Jared.

 “Lebuh ini aku nadai tiga taun ti udah, aku nesal laban enda meri mayuh agi awak begulai enggau iya.”—Julianna.

 Asai ati ti tekenyit, ringat, besalah, takut, sereta nesal nya, emosi ti biasa ke diasaika lebuh kitai balat tusah ati. Enti nuan ngasaika tu, ingat meh asai ati tu deka majak bekurang. Tang seraya nganti asai ati tu belubah-lubah lenyau, nama utai ke nulung nuan maya balat tusah ati?

 Berandau enggau kaban. Munyi ku Bup Kudus, ‘Kaban endang seruran ngayanka pengerindu sida.’ (Jaku Dalam 17:17) Nuan deka bulih sukung ke diguna lebuh berandau pasal asai ati nuan.

 “Tusah ati enda ulih diseliahka. Kekadang, nuan ngasaika ulih napi penusah ati nya kediri, tang tetiba udah nya, nuan ngasaika utai tu enda ulih nyadi baik agi. Nya kebuah, sigi manah agi ulih berandau enggau orang.”—Yvette.

 Ingat pasal orang ke dikesayau ti udah nadai. Ku Bup Kudus madah, “Orang ke manah mansutka utai ti manah ke disimpan dalam ati iya.” (Luke 6:45) Nuan ulih nuliska pengingat ti manis tauka ngumpul gambar iya.

 “Aku nuliska semua utai ke diajar kaban aku sebedau iya nadai. Enggau chara nya, teladan iya agi nulung aku. Lebuh aku nulis semua tu, aku mega ulih nerima iya udah nadai.”—Jeffrey.

 Nyaga pengerai diri. Bup Kudus mega setuju, sesais nya amat beguna. (1 Timoti 4:8) Tentuka nuan makai pemakai ti manah, sesais, sereta chukup belelak.

 “Maya benung balat tusah ati, nuan engka enda ulih berunding enggau manah. Nya alai, nuan patut nentuka diri mengkang gerai. Anang enda nyaga pemakai, lalu chukup tinduk.”—Maria.

 Nulung orang bukai. Dalam Bup Kudus madahka, “Orang ke meri deka gaga agi ati ari orang ke nerima.”—Surat Kereja Rasul 20:35.

 “Uji meh ngaga sesiti utai ke orang bukai, kelebih agi sida ke lenyau orang ke dikesayau. Tu ulih ngingatka nuan, bisi orang bukai mega benung merinsa.”—Carlos.

 Pansutka asai ati nuan dalam sampi. Dalam Bup Kudus mega bisi madah, Petara Jehovah “nyaut sampi.” (Masmur 65:2) Bisi mega ayat ke bukai madahka, Jehovah deka “ngeraika orang ke tusah ati lalu malut telih sida.”—Masmur 147:3.

 “Pinta meh sukung sereta peransang ke diguna nuan ari Jehovah. Bisi hari ke tusah agi ari hari ke bukai, tang Jehovah seruran tisi nuan.”—Jeanette.

 Ngembuan runding ti betul. Kingatka, chara tiap iku orang napi ati ti tusah enda sama. Bup Kudus bisi nyeritaka, Jakop “enggai diperindang” lebuh iya ngumbai anak lelaki iya udah nadai. (Pemungkal 37:35) Nya alai, anang iran enti nuan enda jampat badu ari penusah ati.

 “Mayuh utai ke agi mengkang ngasuh aku ingatka ibuk aku, taja pan iya udah nadai pengelama 15 taun.”—Taylor.

 Gambarka tulang nuan patah. Nya tentu pedis lalu begunaka awak alai gerai. Pia mega, lutur deka meri lalau pasal utai ke ulih digaga nuan ngambika tubuh nuan gerai.

 Tu sama enggau chara kitai deka gerai ari “telih” lenyau orang ke dikesayau. Begunaka awak ngambika penusah ati ulih majak kurang. Nya alai, sabar meh. Perundingka chara-chara dalam artikel tu, lalu peda ni bagi ke pemadu ngena ba nuan.