Nyauka tiap iti ruang bilik bisi atur sida empu. Chunto, apai indai engka udah netapka pukul berapa nuan patut pulai ke rumah, ni pengelama nuan ulih main perengka eletronik, chara begulai enggau orang bukai, tauka mayuh agi.

 Tang, baka ni enti nuan udah ngelanggar atur ari apai indai? Utai ke udah nyadi, enda ulih diaduka baru. Tang nuan ulih ngereja sesiti utai ngambika utai ke udah nyadi nya enda majak balat. Artikel tu ulih nulung nuan.

•  Utai ke enda patut dikereja nuan

•  Chara ti manah agi

•  Nama ku nembiak serambau nuan

•   Enti apai indai enda nemu nuan udah ngelanggar atur sida, nuan engka deka belalaika penyalah nuan nya.

•   Lebuh apai indai udah nemu nuan ngelanggar atur sida, nuan nguji ngiga kebuah, tauka nyalahka orang bukai.

 Dua iti chara tu salah. Nama kebuah? Ngelalaika utai ti udah nyadi tauka nguji ngiga kebuah, nunjukka nuan enda nemu berunding ba mata apai indai.

 “Pemula enda kala mujur mutarka penanggul. Nyau kelama, pemendar deka pansut. Enti nuan enda tumu madahka penyalah diri, nuan engka diukum enggau balat agi.”—Diana.

•   Ngaku penyalah diri. Ajar Bup Kudus: “Nuan enda ulih mujur dalam pengidup nuan, enti nuan nguji ngelalaika dosa diri.” (Jaku Dalam 28:13) Apai indai sigi nemu nuan ngereja penyalah, laban semua orang enda ulih rari ari pengelemi diri. Tang, sida amat gaga enti nuan enda bula ngagai sida.

   “Apai indai tentu gaga ati ngampunka penyalah nuan enti nuan enda bula ngagai sida. Nambahka nya, dudi hari sida tentu lebih arapka nuan.”—Olivia.

•   Minta ampun. Ajar Bup Kudus: “Kita enda tau enda baruh ati.” (1 Peter 5:5) Nyebut leka jaku “minta ampun” enda senang. Senang agi deka ngiga kebuah. Tang enti nuan ngereja tu, nya nunjukka nuan baruh ati.”

   “Nyau kelama, orang ke selalu ngiga kebuah nadai asai ati ti besalah agi. Nyentukka, maya iya ngereja penyalah pan iya enda ngasaika diri salah agi.”—Heather.

•    Nerima ukum. Ajar Bup Kudus: “Pendingka utai ti diajar ngagai kita.” (Jaku Dalam 8:33) Anang mutap, tang terima meh ukum ke diberi apai indai nuan.

   “Enti nuan mutap nerima ukum ari apai indai, tusah agi apai indai deka andalka nuan. Nyadi, terima meh ukum ari sida, lalu anang majak berundingka utai ti dikeenggaika nuan pasal ukum nya.”—Jason.

•   Ngulihka pengandal ari apai indai nuan baru. Ajar Bup Kudus: “Kita udah diajar muai jalai pengidup kita ti lama.” (Epesus 4:22) Terus meh ngereja utai ti badas. Nyadi orang ke betanggungjawap ngambi apai indai ulih andalka nuan baru.

   “Kitai patut terus ngaga pemutus ti betul. Ayanka ngagai apai indai, kitai enggai ngulang penyalah ti sama. Enggau chara nya, sida deka andalka kitai.”—Karen.

 CHARA KE ULIH DIKENA: Ngambi bulih baru pengandal ari apai indai, kereja meh utai lebih ari ke dipinta. Chunto iya, taja pan nuan enda laun ari jam ke udah ditetapka, nadai meh salah enti nuan madahka diri benung ba rantau jalai deka pulai. Tu baka nuan benung madahka apai indai, ‘Kita ulih andalka aku baru.’