Kekadang, sekeda penyembah Petara berunding, kati nitihka standard Bup Kudus ulih mai penguntung? (Masmur 73:2, 3) Sida nguji ngereja pengawa enda sejalai enggau adat Jehovah, lalu sida mega nguji nipu penyembah ke bukai kena ngelalaika penyalah sida.

 Tuju artikel tu kena nulung sida ke ngereja pengawa tu, tang diatu sida deka ngetu ari ulah ti pepura tu.

Ba artikel tu

•  Nama reti idup enggau pepura?

•  Kati idup enggau pepura nunjukka aku orang ti jai?

•  Baka ni aku ulih ngetu idup enggau pepura?

•  Nama ku nembiak serambau nuan

 Idup enggau pepura reti iya, lebuh nuan begulai enggau orang ke serambau nuan, nuan ngereja utai ke ditemu nuan salah; tang lebuh nuan begulai enggau bala menyadi ba raban gempuru, nuan nyadi baka orang ke deka nyembah Jehovah. Pengidup nuan baka ke ngena dua iti tuping.

 “Enti nuan idup enggau pepura, nuan ngelalaika siti ari pengidup nuan. Nya alai, nadai orang nemu sapa nuan ti bendar. Nya kebuah, enti nuan idup enggau pepura, nuan enda jujur ngagai semua orang.”—Erin.

 Kati nuan nemu? Idup enggau pepura nyengkaum ngereja utai ke ditemu nuan enda dikerinduka Jehovah lebuh nuan kediri.

 “Lebuh aku 14 taun, aku berengkah meda ulah ti enda bemoral ba Internet. Ba mua orang, aku ngaga diri begedika pornografi. Tang dalam ati, aku nemu aku enda begedika nya.”—Nolan.

 Prinsip Bup Kudus: “Nadai orang ulih nyadi ulun dua iku tuan, laban iya deka begedika siku lalu rinduka siku, tauka taluk ngagai siku lalu enda bebasaka siku.”—Matthew 6:24.

 Enda semesti iya. Sekeda orang mutuska, sida enggai idup nitihka standard Bup Kudus. Tang kati nuan amat baka nya? Tauka, nuan bisi kebuah nuan empu idup enggau pepura? Chunto iya:

•   Nuan takut lain ari orang ke serambau enggau nuan.

•   Nuan ngasaika diri, bisi mayuh minat ti sama enggau orang ke sama sekula ari bala menyadi ba raban gempuru.

•   Nuan ngasaika diri, nadai pengering sereta enda ulih nitihka semua pesan ari Petara.

 “Aku ngasaika, sekeda nembiak nyamai agi idup pepura enggau orang ke enda sama pengarap ngambika sida enda bebida enggau orang bukai.”—David.

 Tang tu ukai alasan ti manah alai kitai idup enggau pepura. Tu nulung kitai faham orang ke manah mega ulih ngaga penyalah tu. Enti tu nyadi ba nuan, nama patut digaga nuan?

1.  1. Perundingka chara pengidup nuan diatu. Tanya diri empu, ‘Kati aku amat deka nyadi orang ke baka tu? Enti aku terus idup baka tu, nama asil iya?’

    Prinsip Bup Kudus: “Orang ke mereti deka meda penusah datai, lalu nyeliahka penusah nya, tang orang ke enda berunding deka tetempuhka penusah nya.”—Jaku-Dalam 27:12.

2.  2. Jujur. Padahka situasi nuan ngagai apai indai tauka kaban ti matang ke bebasaka adat Jehovah. Sida tentu gaga ati nuan minta tulung ari sida. Sida mega temegah meda nuan deka ngereja utai ti betul!

    “Ngaku penyalah diri siti ari utai ti pemadu pedis ke kala digaga aku. Tang pengudah aku ngereja nya, aku berasai amat nyamai.”—Nolan.

    Prinsip Bup Kudus: ‘Nuan enda ulih mujur dalam pengidup nuan, enti nuan nguji ngelalaika dosa diri. Tang enti nuan ngaku dosa diri lalu badu agi bedosa, nya baru Petara deka kasihka nuan.’—Jaku-Dalam 28:13.

3.  3. Nerima kesan. Kingatka, enti nuan bisi belalaika sekeda utai ari apai indai tauka ari bala menyadi ba raban gempuru, nuan deka ngasuh sida tusah pechayaka nuan. Asil ari ulah nuan, apai indai tauka tuai gempuru ba raban gempuru engka enda ngemendarka nuan ngereja sesiti utai dalam sesiti timpuh. Terima meh kesan ari ulah nuan nya, lalu keran “ngereja semua utai enggau lurus” berengkah ari diatu.—Hebrew 13:18.

    Prinsip Bup Kudus: “Pendingka jaku lalau, lalu terima jaku ajar, ngambika nuan bulih penemu-dalam kena nuan idup jemah ila.”—Jaku-Dalam 19:20.

4.  4. Andal meh Petara rinduka nuan. Laban Jehovah rinduka kitai, Iya nemu tiap iti utai ke digaga kitai. Nyadi, enti nuan idup enggau pepura, Iya mega nemu lalu tu ngenusahka ati Iya. Nambahka nya, ketegal Iya ‘ibuhka nuan’ Iya keran deka nulung nuan berubah.—1 Peter 5:7.

    Prinsip Bup Kudus: ‘Jehovah ngemataka semua dunya, lalu meri pengering ngagai orang ke taluk ngagai Iya.’—2 Bansa Israel 16:9.