Bup Kudus bisi madahka, orang ke udu betangguh deka bulih asil ti enda manah. Chunto iya: “Enti nuan nganti hari enggau ribut ti ngena, nuan enda tetanamka utai, lalu nuan nadai utai diketau.”—Pengajar 11:4.

 Peratika kebuah ti ngujungka ulah ke udu betangguh. Udah nya, peda chara ngubah ulah nya.

 Endang amat, sekeda pengawa nya tusah dikereja, nyentukka nuan pan nejuka nya ketisi. Peratika sekeda chara ke ulih nulung nuan.

•   Bagi projek nya ngagai beberapa iti begian. Seiku nembiak indu ke benama Melissa madahka, “Taja pan aku udah jauh tinggal, tang aku nguji nembuka pengawa nya ari siti begian ke siti begian.”

•   Lalu berengkah, anang nganti. “Lebuh nuan nerima sesiti pengawa, lalu berengkah, anang nganti. Engka belabuh enggau nuliska lis semua pengawa tauka nuliska sekeda runding pasal pengawa nya sebedau nuan enda ingat.”—Vera.

•   Minta tulung. Apai indai tauka pengajar nuan engka kala ngasaika utai ti sama. Tanya meh penemu sida. Sida engka bisi chara ti manah kena nulung nuan nembuka pengawa.

 Chara “Ngaga jadual. Reti iya, nuan patut ngatur pengawa enggau manah lalu bebendar deka nitihka jadual ti udah ditetapka. Chara tu amat manah. Nuan ulih nembuka pengawa ba maya ti udah ditetapka.”—Abbey..

 Kesuah iya, nuan ngasaika pengawa ke digaga nuan nya enda best. Nya kebuah, nama patut digaga nuan enti nuan nadai ati deka ngereja pengawa nya? Uji meh sekeda chara tu:

•   Perundingka siti kebuah nuan patut nembuka pengawa nya enggau jampat. Chunto, gambarka asai ati nuan lebuh nuan udah mujur nembuka pengawa ti diasuh. Seiku nembiak indu ke benama Amy madah, “Aku berasai gaga lebuh aku tumu nembuka pengawa ari jadual ke udah ditetapka. Udah nya, baru meh aku ulih relaks.”

•   Seruran ingatka nama penyadi. Enti nuan udu betangguh, nya ngasuh nuan majak berasai ditekan, sereta majak tusah nembuka pengawa. Bup Kudus madah, “Kita deka ngetau utai ti ditanam kita empu.”—Galatia 6:7.

•   Simpan ba runding nuan, nuan patut nembuka pengawa nya tumu agi ari haribulan ke patut. Seiku nembiak indu ke benama Alicia madah, “Enggau chara tu, aku ulih nembuka pengawa aku sehari tauka dua hari tumu agi. Udah nya, aku ulih ngena awak ke tinggal nya meresa baru pengawa ke udah ditembuka.”

 Chara “Chara kitai berunding amat beguna. Nya kebuah, padahka ngagai diri empu, ‘Aku patut ngereja pengawa aku, lalu nadai nama-nama utai ulih nagang aku.’ Lebuh aku munyi nya, aku ulih nembuka pengawa aku.”—Alexis..

 Seiku nembiak lelaki ke benama Nathan madah, “Orang selalu madah, aku udu betangguh. Tang nya enda patut! Sida enda nemu, aku amat kisuk!” Enti nuan ngasaika utai ti sama baka Nathan, uji meh chara tu:

•   Gaga dulu pengawa ke senang. Seiku nembiak indu ke benama Amber madah, “Bisi seiku orang kala madahka aku, enti pengawa nya ulih ditembuka dalam lima minit, aku patut ngereja nya enggau jampat. Chunto iya, meresi bilik, napis gari diri empu, nuchi pinggai mangkuk, tauka betalipun.”

•   Milih utai ke berat agi. Bup Kudus madah, “Nemu milih utai ti pemadu badas.” (Pilipi 1:10) Baka ni nuan ulih nitihka lalau tu ba pengidup ninting hari? Seiku nembiak indu ke benama Anna madah, “Aku nulis lis semua pengawa ke patut digaga. Tang iya ke pemadu beguna, aku netapka awak kena ngereja tiap iti pengawa nya.”

 Kati chara tu ngasuh nuan berasai tepekul? Perundingka baru! Ketegal bisi jadual, nuan empu ke ngatur jam, ukai jam ngatur nuan. Tu enda ngasuh nuan berasai ditekan. Seiku nembiak indu ke benama Kelly madah, “Aku berasai nyamai agi enti bisi jadual ke manah, lalu aku ulih beberat agi deka nembuka pengawa nya.”

•   Anang limpang ngereja utai bukai. Jennifer madah, “Aku dulu madah ngagai semua orang ba rumah pasal jadual aku. Enti sida begunaka tulung, sida patut tumu madah sebedau aku berengkah enggau pengawa aku. Aku mega nutup talipun binching sereta nukar email aku ngagai silent mode.”

 Chara “Pengawa nuan enda ulih tembu seagi nuan enda berengkah. Nya kebuah, ari ke majak irau pasal pengawa nya, gaga meh pengawa nuan. Pengudah nya, baru meh nuan ulih relaks.”—Jordan.