•  Kati aku amat patut nguruska diri?

•  Nama chara ti manah kena nguruska diri?

•  Chara ti betul

•  Nama ku nembiak serambau nuan

 Sekeda nembiak madahka diri deka nguruska tubuh. Tang . . .

•   Mayuh ari sida beberatka gamal diri ari pengerai. Sida engka sengaja enda makai tauka makai pil kurus, ngambi ulih kurus enggau jampat. Suah iya, chara tu enda mujur sereta ulih ngachau pengerai.

   “Bisi nembiak indu sanggup enda makai ngambi jampat kurus. Ketegal tu, pengerai sida dikachau lalu ngambi awak panjai kena suman.”—Hailey.

•   Sida irauka utai ti enda patut dikeirauka. Berat tubuh sida OK. Tang sida ngasaika diri gemu lebuh mandingka tubuh diri enggau orang ke serambau, tauka tubuh orang ke dipeda sida ba media sosial.

   “Maya umur aku 13 taun, aku selalu mandingka diri enggau bala kaban aku ke slim. Ba runding aku, sida tentu rindu agi begulai enggau aku enti aku slim baka sida.”—Paola.

 Taja pia, amat bisi nembiak ke patut nguruska tubuh diri. Nitihka riput ari Gerempung Pengerai Entarabansa (WHO) . . .

•   Ba serata dunya, bisi 340 juta orang ke biak, entara 5 ngagai 19 taun ngembuan berat tubuh ti tinggi.

•   Ba taun 1975, semina 4 peratus entara sida, iya nya entara 5 ngagai 19 taun ke ngembuan berat tubuh ti tinggi. Tang penyampau tu majak niki, iya nya ngagai 18 peratus kena taun 2016.

•   Ba mayuh menua, mayuh agi orang ke betubuh berat ari ke betubuh lempung.

•   Obesiti mega suah agi nyadi ba menua ke kurang pemisi, indah ba ruang bilik ke enda chukup zat pemakai.

 Ni ke dipilih nuan?

1.   Sengaja enda makai.

2.   Sesais lalu milih pemakai ti manah ke pengerai.

3.   Makai ubat kurus.

 Saut ti betul: Chara ke-2: Sesais lalu milih pemakai ti manah ke pengerai.

 Nuan engka jampat kurus enti sengaja enda makai tauka enda makai sekeda ari pemakai. Tang nya ukai chara ti betul lalu ulih ngachau pengerai. Berat tubuh nuan engka ulih niki baru enti nuan ngetu diet.

 Tang, enti nuan ngembuan runding deka nyaga pengerai, nuan deka berasai nyamai agi sereta gaya tubuh nuan pan manah agi. Dr. Michael Bradley nulis, “Ngambi ulih kurus enggau chara ti likun, gerai, sereta tan lama, nuan patut . . . ngubah chara idup ke ulih dikereja nuan seumur idup.” a Nama reti iya? Enti nuan deka nguruska diri, anang semina berunding pasal diet, tang enggau naka ulih ngubah chara idup, baka chara makai, bengkah pemakai enggau utai bukai.

 Bup Kudus ngelalau kitai, “nemu nagang diri.” (1 Timoti 3:11) Tu nyengkaum tebiat makai. Dalam Bup Kudus pan bisi madah, kitai enda tau makai ngelui ari ke patut. (Jaku Dalam 23:20; Luke 21:34) Kingatka meh prinsip nya, lalu uji titihka sekeda chara ba baruh, ngambi chara idup nuan manah agi:

•   Nemu reti tebiat pemakai ti manah.

   Ukai landik, tang manah enti nuan nemu mimit pasal nama pemakai ke manah, ngambi ulih milih pemakai ke betul. Tu siti ari chara kena nguruska tubuh enggau chara ti betul.

•   Sesais enggau tetap.

   Perundingka, nama bengkah pengawa ke ulih ngasuh nuan aktif agi. Chunto iya, ari ke ngena lif, nuan ulih niki tangga. Nuan mega ulih ngurangka jam main video game enggau chara besukan.

•   Tukar pemakai ke enda manah enggau pemakai ke manah.

   Seiku nembiak ke benama Sophia madah, “Aku nguji makai pemakai ti manah, baka mayuh bengkah buah sereta sayur. Enggau tu, aku nadai ati ka makai pemakai ti enda manah lebuh aku lapar.”

•   Anang berumban lalu kunyah enggau belubah.

   Sekeda orang kelalu jampat makai, nyentukka sida enda nemu diri udah kenyang. Nya alai, anang meh berumban maya makai. Sebedau nyengkau mayuh pemakai, ngetu enda lama. Engka nuan enda bangat lapar baka ke dijangka.

•   Peda penyampau kalori pemakai nuan.

   Bacha meh nutrisi kena nuan nemu penyampau kalori pemakai. Chunto: Ai manis, pemakai ringan, sereta utai manis suah iya ngembuan kalori ti tinggi, lalu ulih nikika berat tubuh nuan.

•   Anang kelalu.

   Sara, ke beumur 16 taun madah, “Bisi sekali, aku kelalu berundingka kalori maya makai. Lebuh aku meda pemakai, ba untak aku terus pansut penyampau kalori aja!” Anang ga kelalu berundingka pasal kalori. Kekadang, nuan pan patut makai pemakai ti nyamai, taja pan kalori nya tinggi.

 Chara: Tanya meh lalau ari lutur pasal berat tubuh nuan. Iya ulih nulung nuan meresa, naka ni pengerai nuan lalu madahka nuan chara ti likun nyaga pengerai diri, nitihka bengkah tubuh nuan.