Ba Amerika Serikat, video game nya meri penguntung pemayuh bebiliun dolar. Ba din . . .

1.   Dalam urung umur berapa orang ke rindu main game?

   1.   18

   2.   30

2.   Berapa peratus penyampau pemain lelaki enggau pemain indu?

   1.   55 peratus lelaki; 45 peratus indu

   2.   15 peratus lelaki; 85 peratus indu

3.   Ba dua iti begian di baruh, ni bagi begian ke ngembuan penyampau mayuh agi?

   1.   Indu ke beumur 18 taun enggau ke atas

   2.   Lelaki ke beumur 17 taun enggau ke baruh

 Ari statistik tu, nuan ulih nemu sapa ke rindu agi main game. Tang, nuan enda ulih nemu pemanah enggau utai ke tau ngemedis.

 Ba runding nuan, ni bagi pemanah ba baruh tu pan ngena ba nuan?

•  “Main game amat ngerinduka ati. Kitai ulih ngerapatka kaul ba entara diri sebilik sereta bala kaban.”—Irene.

•  “Tu chara ti manah kena kitai enda kelalu berundingka pasal utai ke nyadi ba pengidup.”​—Annette.

•  “Ngemansangka pengelandik nuan.”​—Christopher.

•  “Nuan ulih ngemansangka chara mutarka sesiti penanggul.”​—Amy.

•  “Game ngemanahka chara nuan berunding; nuan ulih ngaga pelan sereta ngatur pelan nuan nya enggau manah.”​—Anthony.

•  “Game ngajar kitai bekerejasama enggau orang bukai.”​—Thomas.

•  “Sekeda game meransang kitai sesais ngambika kitai bepengerai agi.”​—Jael.

 Kati nuan setuju enggau semua utai ke dipadahka ba atas? Video game endang amat bisi pemanah iya. Baka ke dipadahka Annette, main game “chara ti manah kena kitai enda kelalu berundingka pasal utai ke nyadi ba pengidup” lalu nya ukai utai ti salah.

 ● Bup Kudus madahka, “Semua utai ti nyadi di dunya ti endang nyadi ba maya ti diletak.”—Pengajar 3:1-4.

 Kati main game udah masau mayuh jam nuan?

 “Enti aku udah berengkah main game, tusah amat aku deka ngetu! Aku madahka diri empu, ‘Aku main siti level aja.’ Tang, nyau enda berasai aku udah muai bejam-jam!”—Annette.

 “Nuan enda berasai ngabiska mayuh jam maya main game. Nuan ulih bejam-jam duduk, lalu ngasaika diri amat landik ketegal udah menang ba lima iti game. Tang iya ke bendar, nuan nadai bulih nama-nama utai.”—Serena.

 Nyadika pengingat: Enti nuan lenyau duit, nuan engka bulih duit nya baru. Tang, nuan enda ulih ngulihka jam ti udah dipebasau. Ulih disebut, jam nya jauh berega agi ari duit. Nya alai, anang meh nejuka sebarang utai masau jam nuan!

 ● Bup Kudus madah, “Kita enda tau enda pintar . . . , ngena semua peluang kita.”—Kolosi 4:5.

 Kati video game ngachau runding nuan?

 “Ba video game, nuan diperansang ngereja utai ke patut diukum jil tauka ukum bunuh ba dunya nyata.”—Seth.

 “Mayuh ari game, dekaka nuan menang. Nya kebuah nuan patut ngalahka munsuh nuan enggau chara ti amat ganas.”—Annette.

 “Kekadang, maya nuan main, nuan enda nemu nama utai ke dipadahka bala kaban nuan. Nuan engka madah, ‘Mati ke neh!” tauka ‘Bunuh ku nuan legi!’”—Nathan.

 Nyadika pengingat: Seliahka game ti ngembuan ulah ke dipegedika Petara baka, kasar, pengawa seks ti enda bemoral, enggau pengawa bemanang.—Galatia 5:19-21; Epesus 5:10; 1 John 2:15, 16.

 ● Bisi orang ngasaika enda salah enti sida main game ke kasar, laban ukai sida ke ngereja nya. Tang Bup Kudus madahka, Petara “begedika orang ke mangah.” (Masmur 11:5) Taja pan game ke dipilih engka enda ulih dipeda ba ulah nuan dudi hari, tang nya ulih dipeda ari ulah nuan ke diatu.

 Perundingka: Nitihka bup Getting to Calm, “video game ke kasar senang agi ngachau ulah seseiku orang ari sida meda TV. Tu nyadi laban maya anak mit main game, sida ukai semina meda utai ke kasar sereta jai, tang sida empu ke benung ngereja nya. Ketegal video game ulih ngajar utai ngagai seseiku orang, game ke ngembuan pengasar pan benung ngajar orang nya nyadi kasar.”—Bandingka Isaiah 2:4.

 Mayuh nembiak udah nemu tatak iya. Peratika dua iti chunto tu:

 “Suba, aku main game nyentukka tengah malam. Aku berunding, ‘Aku semina begunaka lima jam aja tinduk, nya alai aku deka main siti level agi.’ Diatu aku udah belajar natak diri. Aku ngumbai game nya hobi aja. Kekadang aja aku main game.”—Joseph.

 “Pengudah aku ngurangka jam main game, aku bisi mayuh jam ke utai bukai! Aku ulih ngemanahka agi chara nginjil enggau nulung orang ba eklisia. Aku mega belajarka perengka musik. Diatu aku nemu, aku ulih ngereja mayuh utai ke ngerinduka ati!”—David.

 ● Bup Kudus madahka, orang ke besai tuai “nemu nagang diri.” (1 Timoti 3:2, 11) Sida rinduka pemerindang, tang sida nemu maya sida patut ngetu laban sida nemu nagang diri.—Epesus 5:10.

 Nyadika pengingat: Main game nya enda bangat jai enti nuan nemu natak diri. Anang nejuka game masau jam nuan, nyentukka nuan nyau enda betatika tanggung pengawa diri. Ari ke muai jam enggau pengering nuan ba dunya game, manah agi jam sereta pengering nya dikena nuan ngulihka utai ba dunya nyata.