Bisi beberapa iti penanggul ba pengerai:

•   Bisi orang napi penyakit ke ulih dipeda. Tang, bisi orang napi penyakit ke enda ulih dipeda.

•   Bisi penyakit kekadang aja pedis. Tang, bisi penyakit seruran pedis lalu patut napi nya tiap hari.

•   Sekeda penyakit ulih diubat tauka ulih diempaka sekeda ubat. Tang, bisi penyakit ti nadai ubat lalu engka ulih ngachau nyawa orang ke sakit nya.

 Bala nembiak engka napi sekeda penyakit baka ke disebut ba atas. Ba artikel tu, nuan deka macha utai ke diasaika empat iku nembiak ke napi penanggul baka nya. Enti nuan mega bisi penanggul ba pengerai, nuan ulih diperansang ari jaku sida.

•  GUÉNAELLE

•  ZACHARY

•  ANAÏS

•  JULIANA

 Utai ti pemadu tusah ba aku iya nya, lebuh aku nemu diri enda ulih ngereja mayuh utai. Aku deka ngereja mayuh utai, tang ninting hari aku semina ulih ngereja utai ke ulih aja.

 Aku bisi penyakit motor neuron (bekaul enggau untak). Penyakit tu nagang untak aku meri penerang ti betul ngagai tubuh. Kekadang, mayuh ari begian tubuh aku gegetar tauka enda ulih engkebut. Ketegal tu, aku tusah deka ngereja pengawa ke biasa dikereja baka bejalai, bejaku, macha, nulis, tauka meretika utai ku orang. Maya aku berasai tusah amat, bala tuai gempuru ba eklisia besampi enggau aku. Udah nya, aku berasai nyamai agi.

 Enda ngira nama utai ke ditapi aku, aku ulih ngasaika Jehovah seruran sedia nulung aku. Aku enggai nejuka penyakit tu nagang aku terus gawa ke Jehovah enggau pengabis ati. Nya kebuah, aku bebendar deka madahka orang bukai pasal semaya Jehovah ti deka nyadika bumi tu nyadi Paradais, lalu ba dia nadai agi pemerinsa.—Pemandang 21:1-4.

 Perundingka: Baka Guénaelle, baka ni nuan ulih ngayanka penyinu ngagai orang bukai?—1 Korint 10:24.

 Maya aku beumur 16 taun, aku bisi penyakit kanser untak ti balat pedis. Lutur madahka, aku semina ulih idup pengelama lapan bulan. Berengkah ari nya, aku selalu belaban enggau nyawa diri kena beridup.

 Tubuh mua ari kanan aku mati ketegal bisi tumor tumbuh ba untak. Aku enda ulih tinggal kediri ba rumah laban aku enda ulih bejalai.

 Penyakit aku ke majak jai ngasuh aku tusah deka bejaku enggau terang. Suba, aku amat aktif. Aku rindu main ngelunsur ai, main bola keranjang sereta bola tampar. Laban aku Saksi-Saksi Jehovah, aku mega ransing ba pengawa nginjil sebedau aku sakit. Mayuh orang enda ulih nemu asai ati orang ke kala aktif tang diatu enda ulih ngereja mayuh utai, kelebih agi utai ke dikerinduka.

 Isaiah 57:15, NWT amat meransang aku, laban ayat tu ngasuh aku andal Petara Jehovah seruran semak orang ke “anchur ati”, lalu Iya amat ibuhka aku. Kelimpah ari nya, Isaiah 35:6 mega bisi semaya, jemah ila Jehovah deka meri aku pengerai ti sempurna, lalu aku ulih bejalai baru.

 Kekadang, aku tusah deka napi penyakit diri. Tang aku pechaya, Jehovah seruran nyukung aku. Nengah sampi, aku ulih mansutka asai ati ngagai Jehovah maya aku berasai asa sereta takutka pemati. Nadai utai ulih nyerara pengerindu aku ari Jehovah.—Rome 8:39.

 Dua bulan pengudah Zachary ngaga interbiu tu, iya tinduk dalam pemati maya iya beumur 18 taun. Iya mengkang tetap ati nyentukka ujung seput. Iya amat andalka semaya Jehovah deka ngidupka orang mati ba bumi Paradais.

 Perundingka: Baka Zachary, baka ni sampi ulih nulung nuan tetap ba baruh pengerindu Petara?

 Pengudah beberapa hari aku diadaka, untak aku bedarah. Ketegal tu, tubuh aku bisi penimpang, kelebih agi ba begian kaki.

 Diatu, aku ulih bejalai mimit ngena sekeda perengka. Tang kesuah iya, aku bekerusi roda enti deka kini-kini. Aku selalu besintak nyentukka aku tusah deka ngereja sebarang pengawa, indah maya aku nulis.

 Kelimpah ari penanggul ba pengerai ti suah ngasuh aku tusah ati, chara berubat ke dikena aku mega enda senang ba aku. Ke temu aku, aku patut enggau fisioterapi beberapa kali dalam seminggu. Maya aku beumur lima taun, aku udah diputung. Lalu udah nya, bisi tiga kali da agi aku patut diputung. Dua iti beputung ke penudi nya amat tusah ba aku, laban aku patut jauh ari diri sebilik pengelama tiga bulan nyentukka aku gerai.

 Kami sebilik mayuh meri aku sukung. Maya kami ketawa begulai, nya nulung aku enda kelalu tusah ati. Indai, menyadi indu aku ke tuai sereta sapit aku, nulung aku nganta laban aku enda ulih ngereja nya kediri. Aku tusah ati laban enda ulih ngena kasut tinggi. Tang maya aku agi mit, aku udah kala ngasaika nya sekali. Aku nepuka dua iti jari aku dalam kasut tinggi lalu bejalai. Semua kami sebilik ketawa ke aku!

 Aku nguji meda ngagai utai ke ulih digaga aku, ukai ngagai utai ke enda ulih digaga aku. Ngambika chunto, aku belajarka bansa jaku ke baru. Taja pan aku enda ulih ngelunsur ai tauka ais, tang aku ulih nyemerai. Laban aku Saksi-Saksi Jehovah, aku rindu nginjil lalu bekunsika pengarap aku enggau orang bukai. Mayuh orang rindu maya aku bejaku enggau sida.

 Kenyau ari mit, apai indai seruran madahka aku, semua utai ke ditapi aku nya mina enda lama aja. Ketegal nya, aku ngemansangka pengarap aku ngagai Jehovah sereta semaya Iya ti deka munaska semua pemerinsa, nyengkaum penyakit aku tu. Tu ngeringka aku ngambi ulih betan.—Pemandang 21:3, 4.

 Perundingka: Baka Anaïs, nama deka digaga nuan ngambika enda kelalu meda pasal penanggul pengerai diri?

 Aku bisi penyakit autoimun. (Sebengkah penyakit ke ngasuh sistem imun seseiku orang nyerang sel tubuh diri.) Penyakit tu ulih ngachau jantung, lempuang enggau darah. Diatu, penyakit tu nyerang buah pinggang aku.

 Aku bulih penyakit lupus maya aku beumur 10 taun. Penyakit tu ngasuh aku berasai pedis, selalu lelak, sereta emosi ti enda tentu. Kekadang, aku ngasaika diri enda beguna.

 Maya aku 13 taun, seiku Saksi Jehovah datai ngagai rumah kami. Iya macha jaku Jehovah ba Isaiah 41:10 ke madah, “Anang takut, Aku bisi enggau kita! . . . Aku deka nyaga kita lalu ngelepaska kita.” Berengkah ari nya, aku belajarka Bup Kudus enggau Saksi-Saksi Jehovah. Kira-kira lapan taun utai nya udah nyadi, lalu diatu aku bekereja ke Jehovah enggau pengabis ati. Aku mega enggai nejuka penyakit aku bekuasa ngagai pengidup aku. Aku ngasaika, Jehovah udah meri “kuasa” ngambika aku terus ngembuan runding ti manah.—2 Korint 4:7.

 Perundingka: Bakal ni Isaiah 41:10 ulih nulung nuan ngembuan runding ti manah baka Juliana?