Kati nuan bisi kaban serambau ke bisi penanggul ba pengerai? Kati nuan bisi penyakit tauka bisi penimpang, nyentukka nuan tusah deka ngereja mayuh utai baka nembiak serambau nuan?

 Enti au, nya tentu ngasuh nuan tusah ati. Tang dalam Bup Kudus bisi madahka dua iti pekara ti ulih ngelantangka nuan.

•   Penempa nuan, Petara Jehovah, meda sereta nemu penanggul nuan. Ukai nya aja, tang “Iya ngibun” nuan.—1 Peter 5:7.

•   Petara Jehovah deka ngeraika semua penyakit! Nuan ulih macha tu dalam Bup Kudus ba Isaiah 33:24 enggau Pemandang 21:1-4.

 Mayuh bala nembiak ke bisi penanggul ba pengerai, ngasaika pengarap sida deka kering agi lebuh sida beratika semaya Petara. Peratika empat iti chunto tu:

•  YEIMY

•  MATTEO

•  BRUNA

•  ANDRÉ

 Maya aku beumur 11 taun, aku patut ngena kerusi ruda kini aja penunga aku. Taja pan ngereja utai ti senang baka ngangkatka utai ti enda berat, pan aku enda ulih ngereja nya enggau manah.

 Aku ngembuan penyakit lemi buah isi (muscular dystrophy) maya aku beumur lima taun. Buah isi aku majak lemi laban aku enda ulih ngereja mayuh utai. Kekadang, aku berasai asa amat, laban aku enda ulih ngereja utai ke patut dikereja bala nembiak baka aku. Tang, apai indai sereta bala menyadi ba eklisia mayuh meri aku sukung ba fisikal, emosi, enggau ba pengarap. Aku mega nyadi penginjil penuh jam. Bala menyadi Kristian selalu enggau aku maya aku belajar enggau orang ke bisi minat.

 Jesus madahka, ninting hari bisi pengirau iya empu. (Matthew 6:34) Nya alai, aku nguji napi pengirau aku nya tiap hari, lalu enda ngarapka mayuh utai ngambi aku ulih ngereja nya. Aku amat nganti maya idup ba dunya baru Petara. Ba dia, aku ulih bibas ari penyakit sereta ngasaika “pengidup ti bendar.”—1 Timoti 6:19.

 Uji perundingka: Yeimy nguji “enda ngarapka mayuh utai.” Tu nulung iya. Nya alai, nama utai ke ulih digaga nuan?—1 Korint 9:26.

 Maya aku beumur enam taun, aku berengkah pedis belakang. Keterubah, lutur madah nya ketegal aku mansang besai. Tang, setaun udah nya, sida tetemuka bisi utai tumbuh ba belakang aku.

 Ketegal nya, aku beputung. Tang lutur ke landik mutung semina ulih mansutka 40 peratus aja ari utai ke tumbuh nya. Dalam dua bulan aja, utai tumbuh nya pulai ngagai pemesai iya ke asal! Kenyau ari nya, aku suah amat berubat sereta ngasaika mayuh amat asa ati.

 Kekadang, aku patut napi pemedis asaika diachuk ngena lunga ba semua tubuh aku, nyengkaum belakang enggau dada aku. Taja pia, aku nguji enda kelalu betatika pemedis nya. Aku selalu ngingatka diri, mayuh agi orang bukai pan ngasaika mayuh agi pemedis, tang sida tetap ngembuan runding ti manah. Utai ke nulung aku meruan bisi runding ti manah iya nya, aku andalka semaya Petara Jehovah ti deka munaska semua pemerinsa.—Pemandang 21:4.

 Uji perundingka: Baka Matteo, baka ni nuan ulih dibantu betan ari beratika semaya Petara ti deka munaska semua pemerinsa?—Isaiah 65:17.

 Aku enda baka orang ke bisi sakit. Nya kebuah, orang ngumbai aku buruk. Tang iya ke amat, aku tusah ngereja semua utai, baka kereja ba rumah, belajar, indah maya angkat ari katil.

 Maya aku beumur 16 taun, aku napi penyakit multiple sclerosis, iya nya penyakit ke bekaul enggau urat ti ulih belubah-lubah ngelemika tubuh. Penyakit tu mega ulih ngachau mata enggau pengelandik kitai bejaku. Lalu ketegal nya, aku tusah deka enggau pengawa Kristian baka ke dikedekaka aku. Aku selalu macha ayat ba 1 Peter 5:7 ke madahka, “Serahka semua pengirau kita ngagai Iya, laban Iya ngibun kita.” Aku bulih pengering lebuh aku nemu Jehovah amat ibuhka tiap iku kitai. Tu meh ayat ke terus meri aku pengering nyentukka seharitu.

 Uji perundingka: Nama pemanah iya enti nuan nyerahka semua pengirau nuan ngagai Jehovah, baka Bruna?—Masmur 55:22.

 Mayuh orang ngaga aku baka anak mit ke beumur 10 taun. Aku enda nyalahka sida, laban aku amat baka anak mit ke beumur 10 taun.

 Maya aku beumur dua taun, aku napi penyakit kanser ke jarang nyadi. Keterubah, penyakit tu ngachau begian urat aku lalu nyau kelama ngelekai ngagai untak aku. Taja pan lutur bisi chara kena ngubat penyakit aku, tang chara berubat nya ngasuh aku enda ulih mansang besai. Diatu, peninggi aku semina 1.37 meter. Maya aku madahka diri beumur 18 taun, orang ngumbai aku bula!

 Menyadi Kristian ba eklisia nunjukka basa ngagai aku. Sida enda ngemelika aku baka orang ke sama sekula enggau aku. Aku bebendar ngembuan runding ti manah pasal pengurang diri. Iya ke amat, aku udah ngasaika utai ti pemadu manah, iya nya ngelala Jehovah! Enda ngira nama nyadi, aku andal Jehovah tentu nyaga aku. Petara Jehovah udah besemayaka dunya baru ti amat manah. Lebuh berundingka semaya tu, aku ulih ngembuan runding ti manah.—Isaiah 33:24.

 Uji perundingka: Nama kebuah André nyebut, ngelala Jehovah baka ke “ngasaika utai ti pemadu manah”?—John 17:3.