Kati nuan orang ke tan ati? Kala nuan . . .

•   balat tusah ati ketegal lenyau orang ke dikesayau?

•   balat sakit?

•   nyadi mansa pengerusak alam?

 Engka nuan berunding, orang ke tan ati tentu ulih napi penusah besai baka ke disebut tadi. Tang nitihka pemansik, seseiku orang begunaka ati ti tan maya napi penanggul taja pan nya mit aja.

•  Baka ni gaya orang ke tan ati?

•  Nama kebuah nuan patut tan ati?

•  Baka ni nuan ulih nyadi orang ke tan ati?

•  Nama ku nembiak serambau nuan

 Orang ke tan ati mega enda ulih nyeliahka diri ari napi pemedis tauka ubah ba pengidup baka orang bukai. Tang sida ulih napi nya. Taja pan nya tentu ulih ngasuh sida labuh, tang sida ulih angkat baru, indah tan agi ati ari ke sebedau tu.

•   Laban semua orang bisi penanggul. Bup Kudus madah: “Orang ke laju belanda di dunya tu enda selalu menang belumba, . . . Orang ke bepenemu-dalam enda selalu bulih pengidup, . . . laban utai ti jai endang tau nyadi ba genap iku orang.” (Pengajar 9:11) Nama dipelajar kitai ari ayat tu? Indah orang ke manah ati pan ditinggang penusah taja pan iya nadai ngereja penyalah.

•   Laban ati ti tan ulih nyaga nuan. Seiku cikgu kauseling ba sekula tinggi madahka: “Mayuh pemelajar datai ngagai opis aku nyabak sereta enda ulih nagang emosi sida, laban enda ulih nerima pemutus peresa ti enda manah tauka ketegal jaku ti enda manah ke diterima sida nengah media sosial.” Ba runding cikgu nya, tu penanggul ti mit aja. Tang iya enda nemu, enti sida enda ulih mutarka penanggul nya, nyau kelama sida engka bisi penanggul ba pengerai iya nya, “ba runding tauka emosi.” a

•   Laban ati ti tan mega ulih meri nuan penguntung ke diatu sereta dudi hari. Lutur Richard Lerner nulis: “Orang besai tuai ke mujur sereta mayuh utai ulih gaga nya, orang ke kala labuh ba pengidup tang udah nya angkat baru. Sida ulih netapka tuju bukai tauka ngiga chara ngulihka utai ti dikedekaka sida.” b

•   Kati penanggul nuan nya mit tauka besai? Nemu bida entara penanggul ti besai tauka penanggul ti mit. Bup Kudus madah: “Orang ke beli ringat, iya lalu tekala nya mandangka pengeringat iya, tang orang ke pintar, nadai ibuhka diri dipechat.” (Jaku Dalam 12:16) Nya alai, enti nuan udah nemu nya penanggul ti mit aja, anang meh kelalu berundingka nya.

   “Orang ke sama enggau aku sekula selalu aja muchau pasal utai ti mit aja, sida baka ke napi utai ti bangat balat. Indah, bala kaban sida ba media sosial mega ngapika agi utai ke nyadi. Tu ngujungka sida majak ngemesaika penanggul ti mit nya tadi. Ketegal tu, sida tusah deka nemu sekalika penanggul nya mit tauka besai.”—Joanne.

•   Belajar ari orang bukai. Bup Kudus madah: “Orang belajar ari pangan diri nya baka besi ti ngansah besi.” (Jaku Dalam. 27:17) Reti iya, enti nuan belajar ari orang ke udah kala napi mayuh penanggul ba pengidup, nuan tentu bulih mayuh penemu ti berega ari sida.

   “Enti kitai selalu bejaku enggau seseiku orang, kitai ulih nemu sida udah napi mayuh penanggul, tang sida agi ulih tan ati. Uji peratika, nama chara ke dikena sida mutarka penanggul diri.”—Julia.

•   Sabar. Bup Kudus madah: “Orang ke lurus ati nyangka rebah tujuh kali, lalu sida angkat baru.” (Jaku Dalam 24:16) Endang amat, deka nerima sesiti utai ke enda nitihka peneka kitai, begunaka awak. Nya kebuah kitai engka berasai tusah ati. Tang iya ke pemadu beguna, kitai patut deka “angkat baru.”

   “Lebuh nuan napi penusah tauka penanggul, ati sereta emosi nuan tentu berasai tusah. Lalu nya tentu begunaka awak kena suman. Nya meh utai ke kala diasaika aku, enda berasai ba sesiti timpuh, asai ati ke baka nya ulih lenyau.”—Andrea.

•   Beterima kasih. Bup Kudus madah: “Seruran beterima kasih.” (Kolosi 3:15) Enda ngira penanggul ke ditapi nuan nya besai tauka mit, tentu bisi utai ke ngasuh nuan beterima kasih. Uji perundingka tiga pekara ba pengidup nuan, ti ngasuh nuan deka beterima kasih.

   “Lebuh kitai bisi penanggul, kitai suah nanya: ‘Nama kebuah aku belama-lama kena penusah tu?’ Tang orang ke tan ati enda kelalu berundingka penanggul ti ditapi. Sida selalu beterima kasihka utai ti dikemisi sereta utai ke ulih dikereja sida. Sida selalu deka ngembuan runding ti manah.”—Samantha.

•   Puas ati. Rasul Paul nyebut: “Aku udah belajar nemu puas ati, nemuka aku suntuk tauka enda.” (Pilipi 4:11) Paul enda ulih nyeliahka diri ari penanggul. Tang iya bisi chara mutarka penanggul nya. Paul enggai semina nemu mutap ke penusah diri, tang puas enggau utai ke ulih iya.

   “Pengelemi aku iya nya, maya aku bisi penanggul aku selalu deka mutap. Nya kebuah, kenyau ari diatu aku deka nguji ngembuan runding ti manah, enda ngira nama penanggul ke ditapi aku. Tu ukai aja meri penguntung ke aku, tang pia mega orang ke ngelingi aku.”—Matthew.

•   Besampi. Bup Kudus madah: ‘Serahka penusah nuan ngagai Jehovah, lalu Iya deka nyaga nuan. Iya nadai kala nejuka orang ke lurus alah.’ (Masmur 55:22) Tuju kitai besampi ukai semina deka bulih pengelantang aja. Tang iya ke amat, kitai benung bejaku enggau Penempa ti deka “ngibun kitai.”—1 Peter 5:7.

   “Maya bisi penanggul, aku nemu diri enda kediri aja. Maya besampi, aku mansutka semua asai ati aku ngagai Petara. Pia mega, aku beterima kasih ngagai semua utai manah ke diberi Petara ngagai aku. Ketegal tu, runding aku nyadi manah agi, lalu aku ulih beberatka berekat ke diasaika aku. Sampi amat beguna!”—Carlos.