Maria Magdalin engkedah ke langit lalu ngendas ai mata iya. Tuan ke dikesayauka iya dia, udah dipantang ba tiang kayu. Tu maya musin bungai, lalu taja pan nyau udah ngalih hari, “semua menua petang magang”! (Luke 23:44, 45) Iya melitka kain ba bau iya, lalu mansang semak ngagai sida bala indu ke bukai ke ngimbai iya. Pemetang tu tentu ukai ketegal gerhana mata panas aja, ti mai pemetang beberapa minit aja. Sehari nya, semua menua petang pengelama tiga jam. Engka Maria enggau sida ke bukai ke bediri semak Jesus ulih ninga bunyi ti nyelai—bunyi jelu ti semina didinga maya malam hari aja. Sekeda orang ke bisi meda berasai ‘takut, lalu ku sida, “Iya amat Anak Petara!”’ (Matthew 27:54) Bala murid Jesus enggau orang bukai engka ngumbai semua tu nyadika tanda, ti nunjukka pemalat penusah ati sereta pengeringat Jehovah ketegal chara Anak Iya diperinsa.

 Maria Magdalin chukup tusah natka diri meda pemerinsa Jesus, tang iya enggai mindah. (John 19:25, 26) Tusah amat ngambarka pemalat pemedis ke diasaika Jesus. Pia mega, indai Jesus pan patut disukung sereta diperindang maya tu.

 Laban pemanah Jesus ngagai Maria enda ulih ditelah enggau leka jaku, ati iya ti beterima kasih meransang iya enggau naka ulih ngereja sebarang utai ngagai Jesus. Suba, Maria balat merinsa sereta dikemaruhka orang, tang Jesus udah ngubah pengidup iya. Ketegal Jesus, diatu pengidup iya bisi tuju, lalu iya dipebasa. Iya udah nyadi indu ke kering ba pengarap. Baka ni? Lalu nama utai ke ulih dipelajar kitai ari pengarap ke diayanka iya?

 Cherita Maria Magdalin dalam Bup Kudus berengkah enggau siti utai ke dikereja Jesus ngagai iya. Jesus ngelepaska iya ari penanggul ke balat nekul. Maya jeman Jesus, bala melikat ti jai suah ngachau sereta nyerang orang. Sida ngerasukka tubuh mensia lalu nguasa orang nya. Kitai enda nemu enggau nyemetak baka ni chara bala melikat ti jai ngachau Maria Magdalin, tang kitai nemu, iya udah dirasuk tujuh iku melikat ti jai ke balat mangah sereta jai. Baik meh, ketegal Jesus Kristus, semua sida diburu magang!—Luke 8:2.

 Nyau kelama, Maria baru bibas ari pengachau nya. Iya berasai baka ngembuan pengidup ti baru. Baka ni iya deka ngayanka terima kasih? Iya nyadi seiku ari murid Jesus ti tetap ati. Iya mega nemu, bisi siti utai ke ulih dikereja iya kena nulung. Jesus enggau bala rasul iya begunaka pemakai, gari sereta endur alai bemalam. Sida tu ukai lelaki kaya, lalu maya nya sida nadai kereja sekular. Enti sida deka ngemeratka pengawa nginjil enggau ngajar, sida begunaka tulung ba belanja enggau utai ke diguna sehari-hari.

 Maria enggau sekeda indu ke bukai nulung nyediaka utai ke diguna nya. Bala indu nya “ngena duit sida empu nulung Jesus enggau sida murid iya.” (Luke 8:1, 3) Sekeda ari sida engka indu ke pemisi. Bup Kudus enda madah enggau terang sekalika sida tu nyediaka pemakai, masu gari bala rasul, tauka nyediaka endur diau ba tiap nengeri ke digagai sida. Sida sanggup ngereja sebarang utai kena meri sukung ngagai raban orang nya—engka kira 20 iku orang. Tentu pemagas bala indu nya, ke nyediaka utai ti diguna Jesus enggau bala rasul iya, nejuka bala lelaki beberatka pengawa nginjil sida. Amat, Maria nemu iya tentu enda ulih malas pemanah Jesus, tang iya gaga ati laban udah nulung Jesus enggau naka ulih.

 Kemayaharitu, orang ti ngereja pengawa sengapa enggau baruh ati ngagai orang bukai, suah dikemaruhka. Tang tu ukai penemu Petara. Uji gambarka asai ati Jehovah lebuh Iya meda Maria nyerahka diri ke orang bukai, lalu enggau naka ulih nyukung Jesus enggau bala rasul iya. Mayuh orang Kristian kemayaharitu, mela orang bukai enggau ati ti baruh sereta gaga. Meri bantu tauka jaku ti meransang ulih mai penguntung ti manah. Jehovah amat beterima kasih ke semua pengawa nya.—Jaku Dalam 19:17; Hebrew 13:16.

 Maria Magdalin entara sida bala indu ke nitihka Jesus ngagai Jerusalem, ngintu Pengerami Paska kena taun 33 M. (Matthew 27:55, 56) Tentu iya balat tusah ati ninga berita pasal Jesus ke udah ditangkap sereta didawa semalam. Berita ti enda manah nya majak balat. Gabenor Pontius Pilate balat ditekan bala tuai pengarap Judah enggau raban orang mayuh ke nitihka sida. Iya enda tan agi ditekan sida lalu ngukum Jesus dibunuh ba tiang kayu. Engka Maria meda enggau mata iya empu, Tuan iya, ke balat pedis sereta bedarah, lalu ngesan tiang perinsa iya nengah jalai ba Jerusalem.—John 19:6, 12, 15-17.

 Ba endur alai Jesus dibunuh, pengudah pemetang nya belabuh kena ngalih hari, Maria Magdalin sama enggau bala indu ke bukai bediri semak [tiang perinsa, NWT] Jesus. (John 19:25) Maria enda nginsit nyentukka ujung, lalu iya empu meda lebuh Jesus nyerahka indai iya dijaga rasul John. Iya mega ninga Jesus, enggau pedis, ngangauka Apai iya. Iya pan ninga lebuh Jesus enggau andal nyebut jaku ti penudi iya: “Udah tembu!” Ati Maria balat anchur. Taja pia, indah pengudah Jesus udah mati, iya mengkang dia. Lemai nya, pengudah Josep ari Arimatea nguburka bangkai Jesus dalam pendam batu galang, Maria pan enda mindah, tang mengkang ngimbai pendam nya.—John 19:30; Matthew 27:45, 46, 57-61.

 Ari chunto Maria kitai ulih belajar nama utai ke patut digaga kitai lebuh orang ke sepengarap enggau kitai napi penusah ti berat. Kitai enda ulih nyeliahka sida ari napi pemerinsa, tauka muai pemedis ke diasaika sida. Tang kitai ulih nunjukka pengasih enggau pemerani. Lebuh orang napi penusah, indah enti bisi kaban ke ngimbai, nya pan udah chukup ngelantangka ati. Lebuh kitai mengkang semak enggau kaban ke benung merinsa, kitai ulih merindang iya sereta ngayanka penetap ati ngagai Petara sereta menyadi kitai.—Jaku Dalam 17:17

 Pengudah bangkai Jesus dikuburka, Maria nya seiku ari bala indu ke nyediaka rempah kena ngintu enggau nata bangkai iya. (Mark 16:1, 2; Luke 23:54-56) Udah bekau hari Sabat, iya dani tumu pagi. Uji gambarka iya enggau bala indu ke bukai, mansang ngagai pendam Jesus, bedarat nengah jalai ti petang. Engka sida berundingka baka ni sida deka maringka batu besai ke nutup penama batu galang nya. (Matthew 28:1; Mark 16:1-3) Tang sida enggai putus pengarap. Sida deka ngereja utai ke ulih dikereja sida, lalu andalka Jehovah deka mutarka sebarang penanggul ke nekul sida.

 Maria engka sangkai dulu agi ari sida ke bukai. Iya balat amat tekenyit nyentukka iya nyau tetegi aja dia. Batu besai nya udah dibaringka, lalu pendam nya kusung! Maria endang bansa orang ke enggai betangguh, nya alai, iya lalu terus belanda mansang ngagai Peter enggau John, kena madahka sida pasal utai ke dipeda iya. Gambarka iya, nyau tusah enseput, nyebut: “Sida udah ngambi Tuan ari kubur, lalu kami enda nemu endur alai sida udah ngengkahka iya!” Peter seduai John lalu laju amat belanda mansang ngagai kubur, meda kubur nya kusung baka ke diriput Maria, lalu pulai ke rumah. a—John 20:1-10.

 Maria pulai baru ngagai kubur nya, iya bediri dia, merening ngagai batu galang ke kusung nya, balat amat tusah ati. Pagi nya amat sunyi, lalu iya kediri. Maria enda ulih tan agi nagang diri ari nyabak. Iya engkenduk lalu nilik ke dalam kubur, agi tusah deka pechaya Tuan iya amat udah nadai. Tang utai ke dipeda iya ngenyitka ati iya. Dua iku melikat ke bepekayan burak duduk dia! Sida nanya, “Nama kebuah nuan nyabak?” Maria, ke agi beba runding, ngulang baru utai ke disebut iya ngagai bala rasul tadi: “Sida udah ngambi Tuan aku, lalu aku enda nemu dini alai sida engkah iya!”—John 20:11-13.

 Maria nguing lalu tepedaka seiku lelaki bediri ba belakang iya. Maria enda ngelala iya, nyadi, iya ngumbai lelaki nya tukang kebun aja, ke benung kereja. Enggau nyawa ti sinu, lelaki nya nanya iya: ‘Endu, nama kebuah nuan nyabak? Sapa digiga nuan?’ Disaut Maria: “Tuan, enti nuan udah mai iya kebukai, padahka ngagai aku endur alai nuan udah ngengkahka iya, ngambika aku ngambi iya.” (John 20:14, 15) Perundingka utai ke dipadah Maria nya. Kati iya, seiku aja indu, amat ulih ngangkat lalu ngangkut bangkai Jesus, lelaki ti kering tubuh? Maria enda nejuka diri berunding lama, iya nemu diri patut enggau naka ulih ngereja sebarang utai ke iya.

 Lebuh kitai napi penusah ati sereta penanggul, lalu kitai ngasaika nya lebih ari ke ulih ditatka, ulih kitai neladan Maria Magdalin? Enti kitai kelalu betatika pengelemi diri, tauka tatak diri, kitai engka kelalu takut sereta charut runding, nyentukka kitai enda ulih ngereja nama-nama utai. Tang kitai engka tekenyit meda naka ni pemayuh utai ke ulih digaga kitai, enti kitai bagas sereta arapka Jehovah ulih mutarka sebarang utai ke enda ulih dikereja kitai. (2 Korint 12:10; Pilipi 4:13) Ke berat agi, kitai deka ngelantangka ati Jehovah. Endang amat, Maria udah ngagaka ati Iya, lalu iya diupah enggau chara ti amat ngalitka ati.

 Kebendar iya, lelaki nya ukai seiku tukang kebun. Iya kala nyadi tukang kayu, lalu udah nya nyadi Pengajar, sereta Tuan ke dikesayauka Maria. Tang Maria enda ngelala iya, lalu iya malik ke bukai. Iya ke amat, Jesus udah diangkat nyadi orang roh, pengawa ajih tu amat ngalitka ati. Tentu Maria enda nyangka tu udah nyadi. Jesus udah pegari dalam tubuh mensia, tang gaya tubuh nya enda baka ke dikembuan Jesus suba. Dalam beberapa minggu pengudah iya diidupka baru, Jesus suah enda dikelala orang ke enggau iya betemu, nyengkaum sida ke udah rapat enggau Jesus.—Luke 24:13-16; John 21:4.

 Baka ni Jesus deka madahka Maria sapa iya ke amat? Ari chara iya ngangau: “Maria!” Maria jejampat nguing lalu, enggau ati ti gagit, nyebut gelar ti suah dikena iya ngangau Jesus—“Rabbouni!” Au, nya meh Pengajar ti dikesayauka iya! Iya lalu penuh enggau pengaga ati. Iya megai Jesus lalu enggai ngelengkaka iya.—John 20:16.

 Jesus nemu nama utai ke diperunding iya. “Anang megai aku,” ku iya. Kitai engka ngambarka iya bejaku enggau sinu, sereta tuchum lebuh iya ngelepaska diri ari jari Maria. Jesus ngasuh iya anang irau, lalu madah “Aku apin niki ngagai Apai.” Hari Jesus deka pulai ke serega bedau datai. Iya agi bisi pengawa ba dunya, lalu iya deka Maria nulung. Maria bebendar mendingka jaku Jesus. ‘Mupuk nuan ngagai sida menyadi aku,’ ku iya madah, ‘lalu padahka ngagai sida, aku niki ngagai Apai aku enggau Apai kita, ngagai Petara aku enggau Petara kita.’—John 20:17.

 Endang basa ti besai Maria diberi pengawa tu ari Tuan iya. Maria nya seiku entara sida ti keterubah meda Jesus ke udah idup baru. Diatu, iya diberi pengawa ti amat berat, iya nya, madahka berita manah tu ngagai orang bukai. Uji gambarka pengagit ati engau pengeransing iya deka ngiga sida bala rasul. Gambarka iya, ke udah lelak belanda, nyebut jaku ti endang meruan lekat ba pengingat iya: ‘Aku udah meda Tuan!’ Enggau ati ti gagit iya jampat madahka semua utai ke disebut Jesus nya ngagai sida. (John 20:18) Bala indu ke bukai udah meri riput ngagai sida bala murid, lalu diatu, riput Maria tu nambahka bukti ti nunjukka Jesus amat udah diangkat.—Luke 24:1-3, 10.

 Baka ni bala lelaki nya nerima riput ari Maria? Keterubah iya, sida enggai nerima. Kitai macha: “Tang sida rasul ngumbai nya cherita ngapa, lalu sida enda arapka utai ti dipadahka sida indu nya.” (Luke 24:11) Sida lelaki nya dibesaika nitihka adat jeman nya, iya nya, lelaki enda entu arapka orang indu. Nitihka adat bala pengajar bansa Judah, orang indu enda tau besaksi dalam kot, laban jaku sida enda ulih dikarapka. Engka bala rasul enda sedarka diri udah ngembuan runding ti salah nitihka penemu orang ke ngelinggi sida. Tang Jehovah enggau Jesus enda bepilih mata baka sida. Naka meh pemesai basa ti diberi seduai iya ngagai Maria ti udah ngayanka pengarap iya!

 Maria enda nejuka jaku sida rasul ngemediska ati iya. Iya udah puas ati nemu Tuan iya ngarapka iya. Semua murid Jesus mega diberi basa ti besai, iya nya, nusui pesan iya. Dalam Bup Kudus, pesan tu dikumbai ‘Berita Manah pasal Perintah Petara.’ (Luke 8:1) Jesus nadai kala madahka semua orang deka nerima jaku bala murid iya, tauka beterima kasih ke pengawa sida. Nya jauh ari pemendar. (John 15:20, 21) Nya kebuah orang Kristian patut belematika chunto Maria Magdalin. Taja pan, keterubah iya, bala menyadi Kristian iya empu enda pechayaka iya, tang iya enda peduli. Iya terus madahka berita manah pasal pengangkat Jesus enggau gaga ati!

 Nyau kelama Jesus pegari di mua bala rasul iya, lalu majak ngayanka diri ngagai bala murid iya. Bisi sekali, iya mandangka diri ngagai lebih 500 iku murid sereta sekali! (1 Korint 15:3-8) Tentu pengarap Maria majak kering tiap kali Jesus dipeda orang, enda ngira sekalika iya empu bisi meda, tauka iya ninga riput ari orang bukai. Engka Maria Magdalin seiku entara bala indu ke bisi ba gempuru di Jerusalem kena hari Pentikos, maya roh kudus dituang ngagai bala murid Jesus.—Kereja Rasul 1:14, 15; 2:1-4.

 Enda ngira sekalika iya bisi sari nya tauka nadai, kitai ulih arapka Maria Magdalin mengkang tegap ba pengarap nyentukka iya mati. Awakka kitai semua neladan iya! Kitai deka neladan pengarap Maria seraya kitai meruan beterima kasih ngagai Jesus, nyerahka diri ke orang bukai enggau ati ti baruh, sereta seruran andalka Jehovah deka nyaup kitai.