Elijah ninga berita tu: Raja Ahap udah mati. Kitai engka ulih ngambarka nabi ti tuai tu murus ragum iya, mata iya meda kin kia, lebuh iya berunding enggau dalam pasal semua pengawa ke ditapi iya ketegal raja ti jai nya. Elijah udah tan napi mayuh utai! Raja Ahap enggau Kuin Jesebel udah suah ngemba sereta muru Elijah nyentuk ke iya nyau deka mati. Raja nya nadai ngereja nama-nama pan kena nagang Jesebel ari munuh mayuh ari nabi Jehovah. Lalu ketegal seduai amu, seduai ngaga pelan kena munuh Naboth, seiku lelaki ke lurus enggau enda besalah, enggau anak iya. Ketegal nya, Elijah pesan ke bekaul enggau pengawa ngukum ari Jehovah ke deka ninggang Ahap enggau semua peturun iya. Diatu, jaku Petara deka dikeamatka. Ahap mati baka ke dipadah Jehovah.—1 Raja 18:4; 21:1-26; 22:37, 38; 2 Raja 9:26.

 Taja pia, Elijah nemu diri patut terus betan laban Kuin Jesebel agi idup. Kuin nya deka terus ngena kuasa iya ba diri sebilik enggau menua ke dipegai iya. Elijah deka napi mayuh agi penanggul, lalu iya mega bisi mayuh utai ke patut diajar ngagai Elisa ke deka nyadi nabi pengudah iya. Nya alai, aram kitai beratika tiga pengawa Elijah ti penudi. Lebuh kitai meda baka ni pengarap nulung iya betan, tu deka nulung kitai peratika chara kitai ulih negapka pengarap kitai empu lebuh idup ba maya ke tusah kemayaharitu.

 Anak Ahap seduai Jesebel, Ahasiah, diatu nyadi raja menua Israel. Iya enda belajar ari utai jai ke digaga apai indai iya, tang iya nitih aja pengawa seduai ti jai. (1 Raja 22:52) Baka Ahap enggau Jesebel, Ahasiah mega nyembah Baal. Pengarap Baal ngasuh orang ngereja utai ke balat jai baka nyundalka diri ba rumah sembiang, indah munuh anak sida nyadika piring. Kati bisi utai ke ulih ngasuh Ahasiah ngubah chara pengidup iya empu sereta rayat iya ari pengawa ti jai sereta enda taluk ngagai Jehovah?

 Enda memukai, penusah ninggang raja biak ti sumbung nya. Iya labuh ari tanju perabung istana iya lalu balat bakal. Taja pan iya nyau deka mati, Ahasiah agi enggai ngiga tulung ari Jehovah. Tang iya nganjung bala seruan betanya ke petara Baal-sebup ke bisi ba nengeri Ekron ba menua Pilistin ke endang munsuh nembiak Petara. Jehovah amat ringat. Iya nganjung melikat ngagai Elijah lalu ngasuh iya mansang ngelampat bala seruan nya. Nabi nya nganjung sida pulai baru ngagai Ahasiah bebaika berita ukum ari Jehovah. Ahasiah balat bedosa lebuh iya ngereja pengawa laban Israel endang udah bisi Petara. Lalu, Petara Jehovah endang enggai Ahasiah gerai ari pemedis iya.—2 Raja 1:2-4.

 Ahasiah enggai nesal ati. Iya enggau ringat madahka: “Baka ni ku gamal orang nya?” Bala seruan nya madahka gaya begari ti pengumbas ke dikena iya, lalu Ahasiah tekala nya madahka: “Orang nya Elijah!” (2 Raja 1:7, 8) Kitai ulih beratika chara pengidup Elijah ti pengumbas iya sereta betumpu ba pengawa ngagai Jehovah nyentukka iya ulih dikelala enggau jampat semina ari gari ke dikena. Tu amat bebida enggau Ahasiah tauka apai indai iya laban sida chukup amu ke reta tengkira. Chunto Elijah ngingatka kitai pasal jaku lalau ke diberi Jesus pasal pengidup ti pengumbas iya, lalu mata kitai patut betumpu ba utai ti ngena.—Matthew 6:22-24.

 Ahasiah deka malas pengawa Elijah. Iya ngasuh seiku pemesai enggau 50 iku soldadu nangkap Elijah. Lebuh sida tetemuka Elijah ke “benung duduk ba bukit sigi,” a pemesai nya lalu ngena nama raja ngasuh Elijah nurun ari bukit nya—engka laban Elijah deka diukum bunuh. Gambarka nya! Taja pan sida nemu Elijah nya nabi Petara, sida ngumbai diri patut ngemba iya. Tu endang utai ti beli! Elijah lalu madahka ngagai pemesai nya: “Enti aku tu nabi, awakka api nurun ari langit lalu munuh nuan enggau bala nuan.” Lalu Petara Jehovah pan ngereja nya! “Api nurun lalu munuh pemesai nya enggau bala iya.” (2 Raja 1:9, 10) Utai ke nyadi ngagai raban soldadu nya ngingatka kitai, Petara Jehovah sigi enda rindu lebuh nembiak iya dikelese tauka enda dipebasaka.—1 Bansa Israel 16:21, 22.

 Ahasiah nganjung seiku agi pemesai enggau 50 iku soldadu. Pemesai ke lumur dua tu beli agi ari pemesai keterubah nya. Siti kebuah nya, laban iya enda belajar ari 51 iku soldadu ke udah mati nya, taja pan iya engka ulih meda abus ari bangkai sida ba tisi bukit nya. Lalu kebuah kedua, iya ukai semina madahka utai ti sama baka pemesai ti keterubah nya, tang iya mega ngena leka jaku “diatu”! Beli amat! Nya alai, iya enggau semua ke nitihka iya mati magang enggau chara ti sama. Lalu ke beli agi, raja nya empu. Iya enda bekinsit pasal runding iya lalu nganjung raban soldadu ketiga. Tang pemesai ketiga tu bepenemu agi. Iya enggau baruh ati mansang betemu lalu bejaku enggau manah ngagai Elijah. Ku iya madahka: “Nabi, kasihka aku enggau bala aku tu. Anang munuh kami!” Elijah ke endang nembiak Petara, tentu belematika pengasih Jehovah lebuh iya meri saut ngagai pemesai ke baruh ati nya. Melikat Jehovah ngasuh Elijah sama enggau pemesai nya. Elijah nitihka pesan melikat nya lalu sekali agi madahka jaku ari Jehovah ke deka ngukum raja ti jai nya. Endang baka ke udah dipadah Petara, Ahasiah amat mati. Iya semina merintah pengelama dua taun.—2 Raja 1:11-17.

 Baka ni Elijah ulih betan taja pan orang ke ngelingi iya chukup kieh sereta balat ngelaban? Tanya tu endang bisi reti kemayaharitu, enda pia? Kati nuan kala asa ati ketegal udah suah meri jaku lalau ngagai seiku orang ke dikeibuhka nuan tang iya enggai ninga lalu deka terus ngereja pengawa iya ti enda manah? Baka ni kitai ulih betan napi utai ke baka tu? Kitai ulih belajar ari endur alai soldadu nya tetemuka Elijah, ba tuchung bukit. Kitai enda tentu nemu nama kebuah Elijah bisi dia, tang kitai nemu, Elijah nya orang ke suah besampi. Nya kebuah iya engka ngumbai endur nya sunyi lalu meri peluang ngagai iya nyemakka diri ngagai Petara. (James 5:16-18) Kitai mega ulih suah ngiga peluang kediri enggau Petara, bejaku enggau Iya ngena nama Iya, sereta madahka semua pengirau tauka penanggul kitai ngagai Iya. Nya baru kitai ulih betan lebuh orang ke ngelingi kitai ngereja utai ke jai tauka ulih ngemediska.

 Diatu udah datai maya Elijah patut nembuka pengawa iya. Peratika utai ke digaga iya. Lebuh Elijah seduai Elisa benung ninggalka nengeri Gilgal, Elijah ngasuh Elisa nganti dia lalu iya deka kediri ngagai Betel, kira 11 kilometer penyauh. Elisah keran deka nitih lalu iya madahka: ‘Aku besumpah atas nama Jehovah ti idup, enggau penaluk aku ke nuan, aku enggai ninggalka nuan.’ Pengudah seduai datai ba Betel, Elijah lalu madahka ngagai Elisa pasal iya ke deka bejalai kediri ngagai Jeriko, kira 22 kilometer penyauh. Elisa enggau keran meri saut ti sama. Lalu ketiga kali, ba Jeriko, utai ke sama nyadi sebedau seduai ngagai Sungai Jordan, kira 8 kilometer penyauh. Sekali agi Elisa keran enggau saut iya. Iya enggai ninggalka Elijah!—2 Raja 2:1-6.

 Elisa ngayanka siti pemanah ti chukup beguna, pengerindu ti meruan. Tu meh pengerindu ti diayanka Rut ngagai Naomi, pengerindu ke diayanka ngagai siti utai tauka seiku orang lalu enggai sekali-kali ninggalka iya. (Rut 1:15, 16) Semua nembiak Petara begunaka kualiti nya, kelebih agi diatu. Kati kitai ulih beratika kebuah kualiti tu amat beguna baka ke diperatika Elisa?

 Elijah tentu diperansang lebuh meda Elisa ngayanka pengerindu iya ti meruan. Ketegal nya, Elisa bisi peluang meda pengawa ajih Elijah ti penudi. Ba tebing Sungai Jordan, Elijah muka kelambi iya lalu maluka kelambi nya ngagai ai Sungai Jordan. Sungai nya kesuah agi deras enggau dalam. Lebuh Elijah ngereja pengawa nya, sungai nya lalu bebagi dua! “Lima puluh iku nabi” ke bukai mega sama meda pengawa ajih tu. Sida nabi tu engka seraban lelaki ke dilatih ngambika ulih nguluka pengarap ti tuchi ba menua nya. (2 Raja 2:7, 8) Elijah engka ngemataka pengawa latih nya. Bisi sekali, beberapa taun ti udah, Elijah ngasaika diri baka semina iya seiku aja ke agi tetap ati ngagai Jehovah ba menua nya. Berengkah ari maya nya, Jehovah merekatka Elijah ke betan. Jehovah nunjukka ngagai Elijah pemansang ba bala penyembah Iya.—1 Raja 19:10.

 Pengudah seduai meraka Sungai Jordan, Elijah madah ngagai Elisa: “Padahka ngagai aku utai ti diasuh nuan kereja aku ke nuan, sebedau aku dibai ari tu.” Elijah nemu, maya udah datai alai iya patut mupuk. Iya enda kepapas ke Elisa tu ketegal peluang sereta pengawa ke deka digaga iya ila. Tang Elijah keran deka nulung iya. Elisa semina minta tu aja: “Beri ngagai aku dua kali lipat kuasa nuan ngambika aku ulih nganti nuan.” (2 Raja 2:9) Ba nota kaki ayat nya, leka jaku “kuasa...nganti nuan” ulih mai reti pemerani ke dikembuan Elijah. Nya alai, Elisa baka benung minta ngambika iya diberi pemerani baka Elijah. Pia mega, lebuh Elisa minta “dua kali lipat kuasa” Elijah, iya tentu bisi berundingka pasal adat ke diberi ngagai orang Israel. Nitihka adat nya, anak ti pemadu tuai deka nerima pesaka dua kali lipat laban iya deka nyadi tuai bilik ti baru. (Ulang Adat 21:17) Nya alai, ketegal iya baka peturun ari Elijah, tauka nabi ke deka nganti Elijah, Elisa tentu bisi beratika kebuah iya begunaka pemerani baka Elijah, ngambika iya ulih nembuka pengawa ke diasuh.

 Elijah, enggau ati ti baruh, ngawakka Jehovah ke nyaut. Enti Jehovah ngemendarka Elisa meda Elijah lebuh iya diambi Petara, reti iya, saut Petara ngagai utai ke dipinta Elisa nya, au. Lalu, enda lama udah nya, lebuh seduai benung bejalai, “majak berandau,” siti utai ke ngalitka ati nyadi!—2 Raja 2:10, 11.

 Siti penampak ti amat terang manchar ba langit lalu majak semak. Kitai engka ulih ngambarka ribut pulas uchung sama enggau siti utai ti amat terang, benung mansang ngagai seduai, lalu engka utai ke dipeda seduai tu ngasuh seduai tekenyit. Utai ke dipeda seduai nya siti kerita perang ti beapi ke ditarit kuda ti beapi. Elijah nemu, maya iya patut mupuk udah datai. Kati iya niki kerita perang nya? Bup Kudus enda madah. Tang, Elijah ngasaika diri diangkat tinggi sama enggau ribut nya!

 Elisa meda aja, ati iya balat tekenyit. Ketegal iya ulih meda utai ti ngalitka ati tu nyadi, Elisa nemu, Jehovah tentu deka meri iya “dua kali lipat” pemerani ke bisi ba Elijah. Tang Elisa amat tusah ati lebuh berunding pasal nya. Iya enda nemu kini penunga kaban iya ti tuai tu, tang iya nemu diri nadai ulih betemu enggau Elijah baru. Iya ngangauka Elijah: “Apai! Apai! Penyaga orang Israel ti bekuasa!” Iya meda Elijah belubah-lubah lenyau enda ulih dipeda. Sepengudah nya, Elisa tusah amat ati, lalu nyarikka kelambi iya belah dua.—2 Raja 2:12.

 Maya Elijah mansang ke langit, kati iya bisi ningaka sabak ari kaban iya ke biak tu, engka ngasuh iya empu nyabak mega? Enda ngira nama ke nyadi, Elijah tentu nemu, kaban ke baka nya udah nulung iya betan napi sekeda utai ti tusah. Kitai ulih belajar ari teladan Elijah lalu ngaga kaul ti rapat enggau orang ke rinduka Petara sereta seruran deka ngenuluka peneka Iya!

 Kini penunga Elijah? Sekeda pengarap ngajar, Elijah dibai ke serega ngambika ulih enggau Petara. Tang tu amat enda ulih nyadi. Laban beratus taun pengudah nya, Jesus Kristus madahka, nadai orang udah kala niki ke serega kelimpah ari iya empu ke nurun ari serega.—John 3:13.

 Jehovah semina mai Elijah ngagai endur pengawa iya ke baru, ba menua perintah Judah. Bup Kudus madahka Elijah agi bekereja dia, indah lebih ari tujuh taun pengudah nya. Raja Jehoram ti jai benung merintah menua Judah maya nya. Iya udah jadi enggau anak indu Ahab seduai Jesebel. Nya kebuah runding seduai ke jai agi bisi. Jehovah ngasuh Elijah nuliska siti surat ke madahka ukum ti deka dikenataika ngagai Jehoram. Lalu baka ke dipadah, Jehoram mati enggau chara ti chukup ngenakutka. Bup Kudus indah madahka: “Nadai orang ngulitka iya lebuh iya mati.”—2 Bansa Israel 21:12-20.

 Amat bida utai ke dipeda ba lelaki ti jai tu enti dibandingka enggau Elijah! Kitai enda nemu baka ni tauka kemaya Elijah mati. Tang kitai nemu, iya enda mati baka Jehoram, ke nadai orang ngulitka iya. Elisa lelengauka kaban iya. Bala nabi ti tetap ati ke bukai mega engka sama lelengauka Elijah. Jehovah empu ngumbai Elijah nya berega laban kira 1,000 taun pengudah nya, Jehovah ngena seiku melikat ke baka gamal Elijah maya genera pasal Jesus ke berubah gamal. (Matthew 17:1-9) Kati nuan deka belajar ari Elijah lalu ngemansangka pengarap ke ulih tan taja pan napi penusah? Seruran ingat ngemansangka kaul nuan enggau orang ke rinduka Petara, betatika pengawa ke Jehovah, lalu suah besampi ari ati nuan. Awakka nuan meruan ba dalam ati Jehovah ti bepengerindu!