Handphone, siti perengka ti beguna, pan ulih nyadi siti perengka ti bahaya. Tu bepanggai ngagai chara nuan ngena iya. Baka ni nuan ulih ngajar anak chara ti betul ngena handphone? Chunto, ni pengelama sida ulih ngena handphone dalam sehari? a

•  Utai ke patut ditemu nuan

•  Utai ke ulih digaga nuan

•  “Apai indai ti bepengerindu, netapka atur”

•   Bisi handphone, semak agi ngagai bahaya. Baka ba artikel sebedau tu, “Bala Anak enggau Handphone—Begian 1: Kati Anak Aku Patut Ngembuan Handphone?” handphone ngenyenangka anak nuan bulih mayuh utai ba internet, enda ngira manah tauka jai.

   “Kitai engka enda sedar, handphone baka ke muka jalai ngagai orang ke jai nemu pasal anak kitai, tauka ngasuh anak kitai bulih runding ti salah.”—Brenda.

•   Anak begunaka iring. Orang biak dulu agi ngena perengka elektronik lalu ngena nya seumur idup sida. Tang, orang ke besai tuai baru aja berengkah belajarka utai tu. Tang ukai reti iya, apai indai enda nemu pasal teknologi, lalu ngumbai anak sida nemu agi, lalu nejuka anak sida empu ngaga pemutus ni maya anak sida ngena handphone.

   Enda bula, bisi nya anak pandai agi ari apai indai ngena perengka elektronik. Tang ukai reti iya, sida pintar ngena nya enggau chara ti betul. Nyadi, bala anak agi begunaka apai indai sida ngiring, pasal chara ngena perengka elektronik enggau betul.

   “Lebuh nuan meri handphone ngagai anak nuan tang enda ngajar sida chara ngena nya, nya sempama meri iya kunchi kerita lalu nyebut: ‘Jimat deriba,’ tang enda dulu ngajar iya chara deriba.”—Seth.

•   Pansik pasal handphone anak nuan. Uji pansik pasal handphone anak nuan, ngambi nuan ulih nulung iya ngena handphone nya enggau betul. Chunto:

   Nama setting ke ulih dikena apai indai natak jam tauka nyekat utai ke ulih dipeda tauka pansut ba handphone nya?

   Kati nuan nemu setting nya ukai seruran iya ulih dikena?

   Enti nuan nemu pasal handphone anak nuan, nuan ulih nulung sida ngena nya enggau chara ti betul.

   Ajar Bup Kudus: “Orang ke bepenemu-dalam bekuasa agi ari orang ke kering.”—Jaku Dalam 24:5.

•   Tatak. Tentuka ni bagi utai ke ulih enggau utai ke enda ulih. Chunto:

   Kati nuan ngemendarka anak nuan bayam handphone lebuh makai, tauka maya ngabas diri sebilik tauka bala kaban?

   Kati anak nuan patut mai handphone maya ngagai peninduk sida?

   Nama aplikasi ke dikemendarka nuan download sida?

   Berapa lama sida ulih megai handphone dalam sehari?

   Kati nuan bisi ngaga tatak jam ninting hari?

   Padahka atur ke udah ditetapka nuan ngagai bala anak, lalu beri meh disiplin enti sida enda nitih.

   Ajar Bup Kudus: “Anang enda disiplin anak.”—Jaku Dalam 23:13.

•   Matau. Nuan patut nemu password handphone anak nuan, lalu patau meh mesej, aplikasi, gambar, sereta laman web ke dipeda iya.

   “Kami madahka anak indu kami, kami seruran deka matau handphone iya. Enti kami nemu iya enda ngena handphone enggau chara ti betul, kami deka ngurangka agi jam iya mega handphone.”—Lorraine.

   Apai indai bisi hak nemu chara anak sida, ngena handphone.

   Ajar Bup Kudus: “Indah anak mit deh nemu ngayanka pendiau diri ari utai ti dikereja sida. Kita nemu enti sida nya betul ati sereta manah.”—Jaku Dalam 20:11.

•   Kemansangka pemanah anak nuan. Tulung anak nuan ngemansangka pengingin deka ngereja utai ti betul. Nama kebuah tu amat beguna? Laban, enti anak bebendar belalaika sesiti utai ari apai indai, iya deka ngiga chara ngereja nya. b

   Nya kebuah, kemansangka pemanah dalam anak nuan baka ulah ti enda bula, nagang diri, sereta ulih megai tanggung pengawa. Anak ke ngembuan ulah baka tu, ulih ngena handphone sida enggau chara ti betul.

   Ajar Bup Kudus: “Tang asi kering nya ke orang ke besai tuai, ke udah matihka diri ngelala bida entara utai ti badas enggau utai ti jai.”—Hebrew 5:14.