Lebuh anak nuan patut diau ba rumah aja, lalu nadai pengawa, iya engka nyebut. “Boring mat!” Nuan engka terus ngasuh iya meda TV tauka main game ke dikerinduka iya. Tang, uji perundingka sekeda penerang sereta chara ke dipadahka dalam artikel tu dulu.

•   Pemerindang jampat agi ngasuh seseiku orang berasai boring. Seiku apai ke benama Robert madah: “Sekeda anak mit ngasaika pengawa ninting hari nya boring. Ba sida, meda TV tauka main game nya best agi.”

   Barbara, iya nya bini Robert pan setuju. Ku iya: “Ba pengidup kitai, ngereja pengawa ninting hari nya begunaka buah runding sereta pengering, nyadi asil iya lubah dipeda tauka diasai. Nyadi, anak mit ke suah agi meda TV tauka main game, enda sabar lalu jampat berasai boring.”

•   Suah meda media sosial ngasuh seseiku orang ngasaika pengidup diri boring. Bala nembiak engka ngasaika pengidup sida enda ngerinduka ati, lebuh sida meda gambar tauka video ke ditepu bala kaban iya ba media sosial. Seiku nembiak indu ke benama Beth madah: “Kitai rindu amat ngumbai, ‘Semua bala kaban aku best amat! Tang aku, mina ba rumah aja.’”

   Nambahka nya, taja pan udah bejam-jam kitai meda media sosial, tang tetap meh berasai boring. Munyi ku seiku nembiak ke benama Chris: “Amat, media sosial ulih ngisi awak ke puang. Tang sayau amat, pengudah nya kitai nadai bulih penguntung ti ngemuaska ati.”

•   Boring ulih nyadi peluang. Seiku indai ke benama Katherine nerang, enti bala anak berasai boring, nya meransang sida ngayanka pengelandik ke bisi dalam sida. Chunto iya, iya madah: “Seiku anak mit ulih ngena kutak nyadika kerita, perau, bilun, tauka endur nyimpan utai. Indah sida pan ulih berunding, ngena kain pua nyadi kemah.”

   Sherry Turkle, iya nya pakar psikologi pan nyebut utai ti sama. Ba siti ari bup iya, iya ngambarka asai ati ti boring nya siti peluang kitai ngena imaginasi diri. a Nyadi, boring nya ulih nyadi peluang. Nitihka bup Disconnected: “Untak kitai ulih dilatih nyadi kreatif, lebuh kitai ngena imaginasi maya kitai berasai boring.” Tu baka buah isi mensia. Enti kitai selalu ngangkat utai berat, urat isi nya pan kering agi.

 Utai ke dipelajar: Lebuh anak nuan boring, kena meh peluang nya nulung iya mansutka pengelandik diri.

•   Enti ulih, asuh anak nuan bemain ba luar rumah. Barbara, ke disebut tadi madah: “Penampak mata panas sereta udara ti beresi ulih muai asai ati ti boring. Amat ngalitka ati enda? Sama mega, lebuh anak kitai bemain ba luar, untak sida nyadi kreatif agi!”

   Prinsip Bup Kudus: “Semua utai ti nyadi di dunya ti endang nyadi ba maya ti diletak. . . maya sinu, enggau maya gaga.”—Pengajar 3:1, 4.

   Perundingka: Nama patut digaga aku, ngambi anak aku bisi peluang bemain ba luar? Enti sema enda ulih pansut, nama idea ti kreatif ke ulih digaga anak aku dalam rumah?

•   Peransang anak nuan ibuhka orang bukai. Seiku indai ke benama Lillian meri penemu, “Ngereja utai ti manah ngagai orang bukai amat ngelantangka ati. Kitai ulih nulung mutung tauka nebas rumput enggau meresi rumah kaban kitai. Tauka, kitai pan ulih manduk pemakai sereta sangkai ba rumah sida lalu nanyaka berita sida.”

   Prinsip Bup Kudus: “Orang ke nulung orang bukai, deka bulih tulung ari orang.”—Jaku Dalam 11:25.

   Perundingka: Baka ni aku, nulung anak aku berasai lantang ati lebuh nulung orang bukai?

•   Ayanka teladan ti manah. Ulah sereta utai ke disebut kitai ninting hari deka ditunda bala anak. Seiku indai ke benama Sarah madah: “Enti kitai selalu besebana pasal pengidup diri, bala anak mega bisi runding ngumbai pengidup tu boring. Tang enti ulah enggau runding kitai positif, anak kitai pan sama.”

   Prinsip Bup Kudus: “Orang ke lantang ati endang seruran nyamai diau.”—Jaku Dalam 15:15.

   Perundingka: Baka ni gaya aku madahka utai ke nyadi ba pengidup ninting hari, ba mua bala anak? Nama utai ke dipelajar bala anak ari chara aku mutarka asai ati ti boring?

 Chara: Tulung anak nuan, berundingka sekeda idea ti kreatif. Seiku indai ke benama Allison madah: “Ba rumah kami bisi siti kutak kena nepuka idea. Nyadi, sapa-sapa ke bisi idea, ulih nepuka nya dalam kutak.