Bisi sekeda nembiak, senang bulaka apai indai sida. Bisi ke enda bepadah pansut begulai enggau bala kaban, udah nya pulai laun malam. Enti pia, nama patut digaga apai indai?

•  Kati anak aku rindu ngelaban?

•  Baka ni enti anak aku bula?

•  Salah sapa?

•  Chara nulung ngambi aku ulih pechayaka anak aku baru?

•  Ku apai indai

 Empai temu. Bup Kudus madah: “Anak mit endang selalu ngereja utai ti beli.” (Jaku Dalam 22:15) Reti iya, bala nembiak endang sigi selalu baka nya. Lutur Laurence Steinberg nulis, ‘Kesuah iya, bala nembiak enda berunding panjai, udah nya ngaga pemutus ti beli. Nya kebuah, kitai enda tekenyit enti sida ngaga penyalah.” a

 Anang berumban nyimpulka anak nuan sengaja deka ngelaban nuan. Nitihka pansik, taja pan mua sida baka ke enda besalah, tang iya ke bendar, sida agi berundingka runding apai indai. Taja pan nya engka enda dipeda ari gamal sida, sida engka nesal enggau penyalah diri. Pia mega, engka tusah ati laban udah ngasuh nuan asa.

•    Kati nya utai ke ngelingi? Bup Kudus madah: “Orang ke jai ngerusak moral ti menyana.” (1 Korint 15:33) Kelimpah ari kaban ke enggau begulai, media sosial mega ulih ngachau runding bala nembiak. Kingatka, sida bedau mayuh peneleba ba pengidup. Nuan enda tekenyit enti pemutus ke digaga sida nya salah. Tang, sida patut belajar ngemetulka penyalah diri, enti sida deka nyadi orang ke besai tuai ti penemu-dalam.

•    Kati nya salah aku? Kati nya ketegal aku meri mayuh atur, lalu ngujungka iya ngelaban? Tauka, kati aku kelalu nelap? Ari ke majak berundingka penyalah diri, manah agi nuan berundingka chara mutarka penanggul tu.

•   Nagang emosi diri. Anak engka ngumbai nuan tentu ringat. Nya kebuah, ari ke terus nganu, uji berandau enggau manah sereta tanya anak nuan kebuah iya ngereja nya. Nama utai ke diasaika iya? Kati iya berasai puang? Nadai kaban? Amat, semua nya engka semina nyadika kebuah aja. Tang, pengudah nuan berandau enggau anak, nuan deka nemu agi utai ke ditapi iya.

   Prinsip Bup Kudus: “Genap iku orang enda tau enda jampat mending, lubah mansutka jaku, lubah ringat,.”—James 1:19.

•   Tulung anak nuan berunding enggau manah. Tanya iya: Ari utai ke nyadi, nama utai ke udah dipelajarka nuan? Maya bukai, nama patut digaga nuan? Tanya ke baka tu ulih ngajar anak nuan berunding. Maya bukai iya tentu ulih ngaga pemutus enggau manah.

   Prinsip Bup Kudus: “Nguingka ati orang, ngerara, enggau meransang orang, ngena pengabis pengeliat ati nuan lebuh nuan ngajar.”—2 Timoti 4:2.

•   Meri disiplin ti ngena. Ngambika iya amat nemu pasal penyalah diri, disiplin ke diberi pan patut ngena enggau penyalah iya. Ngambika chunto, enti iya belalai ngena motosikal nuan, nuan ulih nagang iya ngena motosikal nya dalam sesiti timpuh.

   Prinsip Bup Kudus: “Kita deka ngetau utai ti ditanam kita empu.”—Galatia 6:7.

•   Beri meh peluang, nuan ulih pechayaka anak nuan baru. Amat, pengudah dikemulaka, enda senang deka pechayaka anak nuan tekala nya. Taja pia, iya patut diberi peluang, lalu nuan ulih pechayaka iya baru. Enti iya ngasaika nuan tentu enda pechayaka iya agi, iya pan lembau deka ngubah diri. Nya kebuah, beri meh peluang ngagai iya.

   Prinsip Bup Kudus: “Anang ngereja utai ti tau ngasuh anak kita ringat, enggai ke sida alah semengat.”—Kolosi 3:21.