Ketegal ulih mai penusah, mayuh apai indai enda ngemendarka nembiak bekenaka media sosial. Taja pia, enti sema nuan ngemendarka nembiak bekenaka media sosial, baka ni nuan ulih nulung sida nyeliahka kesan ti negatif sereta ulih ngena Internet enggau chara ti betul?

Ba artikel tu :

•  Utai ke pemadu penting ba anak nuan ke nembiak

•  Emosi sida

•  Ulah ke diayanka sida lebuh ngena Internet

•  Iring ke ulih diperundingka

 Nama utai patut ditemu: Media sosial ulih ngasuh gian. Nya kebuah, sida ke nembiak begunaka tulung nuan ngambika sida ulih nagang diri ari ngena kelalu mayuh awak ba utai tu.

 Prinsip Bup kudus: “Ngambika kita nemu ni bagi utai ke beguna agi.”—Pilipi 1:10.

 Perundingka: Kati media sosial ngachau maya sida patut tinduk, pengawa sekula, tauka maya begulai enggau diri sebilik? Bala pemansik madahka, bala nembiak begunaka kira-kira sembilan jam alai tinduk, tang enti sida ngena media sosial, pengelama sida tinduk nyau kurang ari tujuh jam.

 Nama ulih digaga nuan: Berandau enggau bala anak nuan ke nembiak, pasal utai ti pemadu penting ba sida, sereta baka ni sida ulih natak jam lebuh bekenaka media sosial. Gaga meh atur ke patut. Chunto iya, enda dikemendarka muka perengka elektronik ba bilik tinduk lebuh malam hari. Tuju nuan deka nulung anak nuan ke nembiak nemu nagang diri. Kualiti tu amat beguna ba sida, enda ngira diatu tauka lebuh sida mansang besai dudi hari.—1 Korint 9:25.

 Nama utai patut ditemu: Lebuh sida ke nembiak meda gambar ke udah diedit, sereta ngayanka gaya pengidup ti manah, ulih ngasuh sida ngasaika diri dikelaungka, irau sereta ditekan.

 Prinsip Bup Kudus: “Badu agi kepapas.”—1 Peter 2:1.

 Perundingka: Kati media sosial ulih ngasuh bala nembiak mandingka diri enggau orang bukai, lalu ngasuh sida ngasaika gamal enggau tubuh diri enda manah? Kati tu mega ngasuh sida ngumbai pengidup orang bukai amat gaga, tang pengidup sida sunyi aja?

 Nama ulih digaga nuan: Berandau enggau bala nembiak nama kebuah nya bahaya enti kitai mandingka diri enggau orang bukai. Kingatka meh, ba nembiak indu pekara tu serius agi, laban sida lebih berundingka runding orang bukai sereta pemanah gamal diri. Indah, enti pekara tu amat ulih ngachau iya, nuan ulih meransang iya ngetu ngena media sosial. Siku nembiak ke benama Jakob madahka: “Aku muai aplikasi media sosial aku sementara. Tu nulung aku ngatur jam ke utai ti penting enggau ngemetulka runding aku pasal diri empu sereta orang bukai.”

 Nama utai patut ditemu: Maya bekenaka media sosial baka ke begulai enggau orang mayuh. Nyadi, salah faham sereta laya ulih nyadi.

 Prinsip Bup Kudus: “Buai semua macham dendam, ati ti pedis, sereta ati ti ngeransi. . . . Tang kita patut manah ati sereta siru enggau pangan diri.”—Epesus 4:31, 32.

 Perundingka: Kati media sosial ngasuh bala nembiak bejakuka orang, bekelikuh tauka bejaku jai?

 Nama ulih digaga nuan: Tulung bala nembiak meretika prinsip ti manah maya bekenaka media sosial. Bup Digital Kids madahka: “Tu siti ari tanggung pengawa apai indai ke ngajar sida pengawa ti enda belempang ati enda tau diterima ba dini-dini alai—sekalika ba online tauka ba pendiau ke bendar.”

 Kingatka meh, medial sosial ukai utai ti pemadu beguna lalu ukai semua apai indai ngemendarka bala anak sida ngena nya. Enti sema nuan ngemendarka anak nuan ngena media sosial, nuan patut nentuka anak nuan nemu berunding, ngambika sida nemu nyekat jam ke dikena ba media sosial, ngiga kaban ti manah lalu nyeliahka diri ari utai ke enda menuku.