TULUNG KE DIRI SEBILIK
Chara Nulung Anak Nuan Ngaga Pemansang ba Sekula
Anak nuan enda rindu ngagai sekula lalu iya mega enda rindu ngaga kereja sekula tauka ulang kaji. Nama penyadi iya? Peresa iya enda manah pia mega ulah iya berubah. Baka ni nuan nulung anak nuan ngaga pemansang ba sekula?
Nama utai patut ditemu nuan
Nekan sida ulih mai penusah. Anak nuan udah berasai ditekan ba sekula, nya kebuah anang meh nekan iya ba rumah. Enti enda, iya engka deka bula, ngelalaika pemutus peresa ti enda manah, nyain riput kad diri empu, tauka enda nurun ke sekula tang limpang ke bukai ketegal deka ngerarika diri ari ditekan. Amat, enti nuan nekan sida, nya ulih mai penusah.
Selalu meri pemeri ukai chara ti manah. Seiku apai ke benama Andrew madah, “Kena meransang anak kami, kami meri iya pemeri enti iya bulih peresa ti manah.” Iya mega madah, “Tang, ketegal tu iya nyau kelalu beberatka pemeri nya aja. Lebuh iya bulih peresa ti enda manah, iya berasai asa amat laban iya enda bulih pemeri, tang ukai ketegal iya bulih peresa ti manah.”
Nyalahka pengajar enda ngajar enggau manah. Ketegal tu, anak nuan engka enda bebendar ngulihka peresa ti manah. Iya mega engka berunding, iya ulih nyalahka orang bukai lalu ngarapka sida mutarka penanggul iya. Asil iya, anak nuan enda belajar betanggungjawapka pengawa iya empu.
Nama utai patut digaga nuan
Tagang asai ati nuan. Enti nuan benung ringat, anang berandau pasal peresa enggau anak nuan. Seiku apai ke benama Brett madah, chara ti pemadu manah nulung anak iya nya, ulah ti nelap sereta ngayanka penyiru.
Prinsip Bup Kudus: “Jampat mending, lubah mansutka jaku.”—James 1:19.
Pansik pun penanggul. Kesuah iya, anak bulih peresa ti enda manah ketegal sida dikachau, pindah sekula, kelalu irau pasal peresa, penanggul ba diri sebilik, enda chukup tinduk, enda ngatur jam enggau manah, tauka enda ulih ninga enggau manah. Nya kebuah, anang beguai nyimpulka anak nuan nya ngelusu.
Prinsip Bup Kudus: “Peratika utai ti diajar ngagai nuan, nya baru nuan deka mujur.”—Jaku Dalam 16:20.
Nulung sida maya belajar. Gaga meh jadual kena belajar sereta nembuka kereja sekula. Sediaka endur belajar ngambika anak nuan ulih ngaga kereja sekula iya enggau nadai utai ngachau (nyengkaum TV tauka talipun binching). Tentuka awak belajar nya enda kelalu panjai ngambika iya enda leju. Hector, seiku apai ari Jerman madah, “Lebuh bisi peresa, kami ngaga ulang kaji mimit-mimit ninting haru, tang ukai nganti nyentukka maya hari peresa.”
Prinsip Bup Kudus: “Semua utai ti nyadi . . . nyadi ba mya ti diletak.”—Pengajar 3:1.
Peransang sida deka ngulihka penemu. Enti anak nuan nemu penemu ke diulih sida ba sekula ulih nulung sida ke diatu, iya engka deka agi belajar. Chunto, matematik nulung iya ngatur belanja.
Prinsip Bup Kudus: “Giga penemu-dalam enggau runding ti dalam . . . Rinduka penemu dalam nya.”—Jaku Dalam 4:5, 8.
Chara: Tulung anak nuan maya iya ngaga kereja sekula, tang ukai ngaga ke iya pengawa nya. Andrew madah, “Anak kami bepanggai ba kami nembuka kereja sekula iya tang enggai nembuka nya kediri empu.” Ajar meh anak nuan nembuka kereja sekula sida empu.