Mayuh orang ke besulu diau serumah sebedau kawin. Sida ngereja tu laban sida ngumbai chara tu ulih dikena sida nemu sekalika sida ulih begulai tauka enda. Pia mega, sida pan berunding, enti diau serumah sebedau kawin, senang agi tikah nya ulih mujur. Kati diau serumah sebedau kawin nya pemutus ti betul?

Ba artikel tu

•  Nama ajar Bup Kudus?

•  Kati diau serumah nya nyediaka nuan ke tikah?

•  Kati diau serumah ulih nulung nuan ngelimat duit?

•  Kati chara tu ulih nyeliahka nuan ari jadi enggau orang ke enda ngasuh nuan gaga ati?

•  Bisi pilihan ke manah agi?

•   Ajar Bup Kudus nagang orang bisi hubungan seks sebedau kawin. Ngambika chunto, dalam Bup Kudus madah, ‘Seliahka ulah seks ti kamah.’ (1 Tesalonika 4:3; 1 Korint 6:18) Tu nyengkaum hubungan seks entara siku lelaki enggau siku indu ke diau serumah taja pan sida bisi runding deka jadi pengudah nya. a Standard Bup Kudus ulih nyaga orang ke besulu nya ari kandung luar nikah sereta kesan ti enda manah ke bukai maya diau serumah sebedau kawin.

•   Atur tikah datai ari Petara. Lebuh Iya ngaga atur tu, ku Iya madah, “Nya kebuah lelaki deka ninggalka apai indai iya. Iya deka terus begulai enggau bini iya, lalu seduai iya deka nyadi siti tubuh.” (Pemungkal 2:24) Lebuh siku lelaki enggau siku indu jadi, tu ulih nulung sida ngembuan siti ruang bilik ti bepengerindu sereta tegap.

 Bisi orang madah, au. Sida ngumbai chara nya ulih nulung siku lelaki enggau siku indu bisi pengalaman begulai ngereja pengawa ba rumah, lalu ulih beratika sifat pangan diri ninting hari. Tang, resia ke ngemujurka diri sebilik nya, penetap ati.

 Baka ni orang ke besulu belajar deka terus begulai ba maya ti senang tauka tusah? Diau serumah sebedau kawin lebuh siku entara seduai ulih mutuska hubungan seduai ba sebarang maya, ukai chara ke ulih ngemujurka tikah. Iya ke amat, hubungan seduai ulih mujur enti seduai tetap ati ngagai pangan diri sereta bekerejasama mutarka penanggul.

 Iya ke amat: Ari ke nyediaka diri ke tikah, orang ke besulu ti milih diau serumah sebedau kawin, iya ke amat nyediaka diri beserara.

 Prinsip Bup Kudus: “Nama-nama utai ke ditanam orang, nya meh utai ke diketau orang nya.”—Galatia 6:7.

 Sekeda orang madah, au. Pansik ke digaga Pew Research Center ba Amerika Serikat madah, kira-kira empat ari sepuluh orang berengkah diau serumah laban sida pechaya tu nulung sida ngelimat duit. Taja pia, pengudah diau serumah dalam sesiti timpuh, nitihka pansik tu mayuh ari sida agi madahka diri enda sedia kawin ketegal sida enda chukup duit.

 Diau serumah sebedau kawin bisi kesan ke bukai, kelebih agi ngagai sida ke indu. Ngambika chunto, enti hubungan nya putus, kesuah iya orang indu meh ke patut ngemesaika anak.

 Iya ke amat: Kesan ti enda manah ketegal diau serumah sebedau kawin balat agi ari penguntung ke dijangka.

 Prinsip Bup Kudus: ‘Aku tu Jehovah Petara kita, ti deka ngajar kita utai ke penguntung kita.’—Isaiah 48:17.

 Sekeda orang madah, au. Nitihka bup Fighting for Your Marriage, “orang ke diau serumah sebedau kawin enda sedar tu ngasuh sida tusah agi ka mutuska hubungan nya.” Nama kebuah? Sekeda orang ke besulu ti diau serumah ngasaika sida amat enda ulih begulai enggau pangan diri. Tang, munyi ku bup nya tadi madah, sida patut begulai “laban sida bisi jelu ke patut dijaga begulai, bekunsika rumah, tauka enda nyangka bisi anak. Pia mega sida udah biasa diau serumah lalu enda ulih ngaga ubah ke manah ti patut digaga sida. b Pandakka jaku, orang ke berunding deka mutuska hubungan sida sebedau kawin, suah iya enda nyadi ngereja nya laban sida ngasaika senang agi terus diau serumah.”

 Iya ke amat: Ari ke nulung nuan ngaga pemutus ti betul, iya ke amat diau serumah ngasuh nuan tusah agi mutuska hubungan ti enda manah.

 Prinsip Bup Kudus: “Orang ke nemu berunding deka meda penusah datai, lalu belalai; tang orang ke enda berunding deka terus bejalai lalu tetempuhka penusah nya, lalu merinsa ketegal nya.”—Jaku-Dalam 22:3.

 Nuan ulih nyeliahka kesan ti enda manah ketegal diau serumah sebedau kawin lalu bisi mayuh agi peluang ngembuan tikah ti mujur. Baka ni? Nitihka standard Bup Kudus pasal tikah. Kena meh awak ti chukup kena ngelala orang ke deka enggau nuan jadi sebedau seduai diau segulai sebagai laki bini. Manah agi milih kaling pengidup ke ngembuan tuju ati ti sama sereta pengarap ti sama ari ke milih orang ke narit ati ari segi seksual.

 Bup Kudus ngembuan lalau ke ulih nulung nuan ngepunka tikah ti lantang sereta tegap. c Ngambika chunto, Bup Kudus ngembuan prinsip ke ulih nulung nuan . . .

•   nyeliahka diri ari enda tetap ati

•   nyadi kaling ti manah

•   bejimat enggau tanda bahaya ke nunjukka orang nya enda sesuai enggau nuan, maya seduai benung bekelala enggau pangan diri

 Kena belajar mayuh agi pasal topik tu, peda begian “Laki Bini & Ruang Bilik” ba jw.org/iba.

 Prinisp Bup Kudus: “Semua ayat ba Bup Kudus datai ari Petara magang, lalu beguna kena ngajar.”—2 Timoti 3:16.