Kati kaling pengidup nuan irau meda tebiat nuan lebuh ngirup ai bisa? Enti au, bisi sekeda poin ke ulih diperundingka nuan.

Ba artikel tu

•  Kelalu mayuh ngirup ai bisa ngachau tikah—ulih ngenataika bahaya

•  Kati nuan bepanggai ngagai ai bisa?

•  Bejimat enggau ulah ke enda ngaku

•  Utai ke ulih digaga nuan

 Kelalu mayuh ngirup ai bisa ulih ngenataika mayuh penanggul ba pengerai, nyengkaum penyakit jantung, ngachau pengerai ba ati, enggau kanser. Tang ngirup ai bisa enggau kelalu mayuh ukai aja ngachau pengerai; tu mega ulih ngachau tikah lalu ngujungka laki bini bejamah, penanggul ba ekonomi, enda setia ngagai pangan diri, sereta sarak.

 Bup Kudus madah, enti kelalu mayuh ngirup ai bisa nya baka, “ke dipantuk ular, lalu nyemburka rachun baka ular ti bisa.” (Jaku-Dalam 23:32, NWT) Baka ni nuan nemu diri bepanggai ngagai ai bisa?

 Tanya ba baruh ulih nulung nuan nemu sekalika nuan bepanggai ba ai bisa tauka enda:

•   Kati nuan tusah nagang diri ari ngirup ai bisa?

•   Kati nuan selalu berunding, kemaya nuan deka ngirup ai bisa nya baru?

•   Kati nuan ngirup ai bisa taja pan nya ngachau pengidup nuan—nyengkaum rumahtangga nuan?

•   Kati nuan asaika ka sakit lebuh nuan nguji ngetu ari ngirup ai bisa?

•   Kati kekadang nuan enggau kaling pengidup nuan bekerakal pasal penyampau ai bisa ke diirup nuan?

•   Kati nuan ulih ngirup mayuh agi ai bisa diatu enti dibandingka enggau suba?

•   Kati nuan belalai ngirup ai bisa, tauka ngelalaika ai bisa ba rumah tauka ba endur gawa?

 Enti saut nuan au ngagai siti tauka lebih ari tanya ba atas, nuan engka bepanggai ngagai ai bisa. Nuan engka udah gian ngirup ai bisa.

 Kati kaling nuan irau meda chara nuan ngirup ai bisa? Enti pia, nuan engka ngiga alasan ngambika ulah nuan enda berupai salah. Nuan engka nyalahka orang bukai, nyengkaum kaling nuan empu. Nuan engka nyebut:

•   “Enti nuan ngelayan aku enggau manah, aku engka enda ngirup ai bisa.”

•   “Enti nuan ngembuan bos baka aku, nuan pan ngirup mega.”

•   “Ukai nya aku aja ke ngirup, mayuh agi orang ngirup lebih ari aku.”

 Enti nuan nyebut jaku munyi tu, enda ke pengingin nuan ngirup ai bisa lebih penting agi ari pengingin nuan deka ngembuan tikah ti lantang? Ni bagi ke penting agi?

 Prinsip Bup Kudus: “Tang lelaki ke udah kawin seruran berundingka . . . deka ngelantangka ati bini iya.”—1 Korint 7:33.

•   Anang enda beberatka utai ke dikeirauka kaling nuan. Taja pan kaling nuan engka kelalu irau pasal isu tu, tang nuan agi ulih ngaga sekeda ubah. Enti nuan enda ulih ngaga ubah lalu majak ngirup ai bisa taja pan nya ngasuh kaling nuan irau, engka tu tanda iya ai bisa udah ngachau pengidup nuan.

   Prinsip Bup Kudus: “Awakka tiap iku orang seruran ngereja utai ke penguntung orang bukai, ukai ke penguntung diri empu.”—1 Korint 10:24.

•   Giga penemu. Ngambika ulih menang ba perang, soldadu patut nemu baka ni munsuh iya deka nyerang. Nuan mega napi penanggul ti sama—kena ngalahka munsuh nuan, nuan patut belajar pasal baka ni gian ngirup ai bisa ulih manjuk orang. Nuan mega patut belajarka chara ulih ngetu ari bepanggai ngagai ai bisa, lalu enda nyadi gian baru dudi hari.

   Prinsip Bup Kudus: “Terus nyeliahka pengingin ti bedosa ke beperang ngelaban kita.”—1 Peter 2:11.

•   Pinta tulung. Bisi mayuh program pasal nyaga pengerai ke beberatka chara mutarka tebiat ti kelalu mayuh ngirup ai bisa, nyengkaum proses pemulihan, endur berubat, enggau sepital. Nuan mega ulih nanya kaban nuan ke matang, ngambika iya ulih nulung nuan nemu kebuah ke bukai ke ngasuh nuan bepanggai ngagai ai bisa. Pia mega, nuan ulih talipun ngagai orang tu, enti nuan ngasaika diri deka berengkah ngirup ai bisa baru.

   Prinsip Bup Kuds: “Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah?”—Jaku-Dalam 17:17.

 Kelalu mayuh ngirup ai bisa nya penanggul ti enda senang diputarka. Nuan enda ulih mutarkanya ari semina macha artikel ti pandak aja, tauka semina nyebut, “Aku nguji ngurangka penyampau ai bisa ke diirup aku.” Tang nuan patut sedar, chara nuan mutarka penanggul tu ukai semina ngachau pengerai nuan, tang tu mega ulih meri kesan ba tikah nuan.

 Kena nemu mayuh agi penerang: Bacha meh artikel ba baruh, iya nya chara sekeda orang mutarka penanggul gian ngirup ai bisa.

 “Aku Enda Jai Baka Aku ke Suba”

 “Aku Enda Agi Berasai Malu Ngagai Diri Empu”

 “Kaki Lima Nyadika Rumah Aku”

 Pia mega, peda meh video ‘Aku Udah Leju Enggau Chara Pengidup Aku’