“Ukai kami enda nemu pornografi nya ulih mai kesan ti enda manah. Tang kami enda sedar anak kami senang tepedaka nya.”—Nicole.

Dalam artikel tu

•  Utai ke patut ditemu nuan

•  Chara ngelindung anak nuan ari pornografi

•  Enti anak nuan tepedaka pornografi

 Utai ke patut ditemu nuan

 Indah anak ke agi mit engka ulih tepedaka pornografi. Kemayaharitu, sekeda pansik nunjukka purata umur anak mit lebuh sida keterubah iya meda pornografi nya 11 taun.

 Anak mit engka ulih tepedaka pornografi taja pan sida enda begigaka nya. Ambika chunto, lebuh sida ngiga pansik ba Internet tauka meda media sosial, sida engka tetekanka link pornografi. Iklan pornografi engka tiba-tiba pansut lebuh sida main game ba online. Pornografi bisi mayuh macham bengkah, ke suah iya ba gambar enggau video. Taja pia, bisi mega cherita pornografi ke ulih dibacha sereta didinga ba online.

 Bala apai indai mega patut nemu, orang bukai ulih nganjung mesej ti ngundan pornografi ngagai talipun anak nuan. Lebuh 900 iku nembiak ditanya pasal topik tu, nyauka 90 peratus sida ke indu sereta nyauka 50 peratus sida ke lelaki madah, sida suah nerima gambar enggau video orang ke telanjai ari sida sekelas.

 Bansa pornografi ti tebilang, ke suah iya mandangka ulah seks ti kasar. Pornografi ke suah dipeda orang selalu iya ngundan ulah ti kasar, kelebih agi ngagai orang indu.

 Pornografi ulih ngemediska anak mit. Sekeda pansik madah mayuh anak mit ke meda pornografi:

•   tusah fokus belajar

•   napi pengirau ti balat, kemurungan sereta berasai nadai guna

•   ngumbai mejal orang ngereja ulah seks nya pekara biasa

 Reti iya: Lebuh anak mit meda pornografi sida deka bulih kesan ti enda manah, lalu apai indai nya orang ti pemadu manah ulih ngelindung sida.

 Prinsip Bup Kudus: “Kingatka pesan ti diberi aku ngagai kita sehari tu. Ajar pesan nya ngagai anak kita. Kita enda tau enda betanduka pesan nya lebuh kita di rumah, enggau lebuh kita bejalai kebukai, lebuh kita belelak, enggau lebuh kita gawa.”—Ulang Adat 6:6, 7.

 Chara ngelindung anak nuan ari pornografi

 Patut berunding dulu. Perundingka kemaya sereta ba dini anak nuan engka tepedaka pornografi. Ambika chunto, ba sekula, kati iya bisi ngena Internet maya kediri?

 Belajar meh pasal fungsi ba talipun anak a nuan ngambika nuan ulih nagang iya ari tepedaka utai ti enda manah. Lalu belajar mega pasal aplikasi sereta game ke bisi ba talipun iya. Ngambika chunto, sekeda aplikasi mesej bisi fungsi (senyapkan pemberitahuan) ke ngasuh mesej, gambar tauka video ti enda menuku lenyau pengudah mesej nya dipeda orang ke nerima. Lalu diatu majak mayuh game online ngundan pornografi tauka ngasuh orang ke main ngelakunka ulah seks ke bisi ba game nya.

 “Ari peneleba aku, enti anak nuan bisi talipun, nuan ke apai indai patut nemu chara ngena nya, sereta nemu ngaduka tetapan ngambika anak nuan enda tepedaka utai ke enda manah. Nuan mega patut nemu chara ngechek utai ti udah digaga anak nuan lebuh iya ngena talipun.”—David.

 Enggau naka ulih meh nyeliahka anak nuan ari tepedaka pornografi. Kereja utai ke ulih nuan kena ngurangka risiko nya. Ngambika chunto, aduka tetapan ba talipun anak nuan sereta ba semua perengka elektronik ba rumah nuan ngambika ulih nyeliahka pornografi. Pia mega, nuan patut nemu semua password ke dikena anak nuan.

 “Aku ngaduka tetapan semua perengka elektronik ke dikena kami sebilik, nyekat program TV ke ulih dipeda anak aku sereta nemu semua kata laluan ba talipun anak aku.”—Maurizio.

 “Aku enda ngemendarka anak aku meda video ba bilik sida enti pintu nya ditutup, lalu lebuh sida udah ba katil, aku enda ngemendarka sida megai talipun.”—Gianluca.

 Nyikap anak nuan sebedau iya tepedaka pornografi. Siku indai ke benama Flavia madah, “Sekeda apai indai enggai berandauka pasal pornografi enggau anak sida laban arapka anak sida nadai napi penanggul tu.” Lalu sekeda apai indai irau, ‘Enti aku berandau pasal pornografi, anak aku deka ngiga nya.’ Runding ke baka tu salah. Apai indai ke bepenemu-dalam deka ngajar anak sida kebuah pornografi nya bahaya sebedau anak sida tepedaka nya. Baka ni nuan ulih ngereja nya?

 Ajar anak ke agi mit utai ke patut digaga sida enti sida tepedaka pornografi. Ngambika chunto, sida ulih nutup mata sida tauka madamka perengka elektronik nya. Peransang sida madah ngagai nuan pasal utai ke dipeda tauka didinga sida. b

 “Kami berengkah berandau pasal kebuah pornografi nya bahaya lebuh anak aku agi mit. Lebuh iya beumur 11 taun, bisi iklan pornografi ke tiba-tiba pansut lebuh iya benung main game ba talipun iya. Ba iklan nya iya diasuh nganjung gambar diri empu. Ketegal kami udah berandauka pasal utai ke patut digaga, iya terus madah ngagai aku pasal utai ke nyadi.”—Maurizio.

 Tulung sida ke nembiak nulak penguji deka meda, ninga tauka macha pornografi. Ngambika chunto, nuan ulih nulung anak nuan nulis utai ke patut digaga iya enti iya tepedaka pornografi sereta kebuah iya patut ngereja nya. Pia mega, asuh iya nulis nama kesan enti iya sengaja meda pornografi, baka iya deka lenyau basa ke diri empu, apai indai enda pechayaka iya agi sereta kaul iya enggau Petara deka rusak. c

 “Seraya anak nuan mansang besai, tulung sida berundingka kesan ti enda manah enti sida meda pornografi, lalu tu ulih nulung sida nulak penguji nya.”—Lauretta.

 “Enti anak nuan mereti kebuah pornografi nya bahaya, sereta asai ati Jehovah pasal nya, sida deka senang agi nulak pornografi.”—David.

 Seruran berandau. Nuan engka tusah pechaya, tang kebendar iya anak nuan deka berandau enggau nuan pasal seks, nyengkaum pornografi. Pesuruhjaya Hak Anak Mit ba England ke benama Rachel de Souza madah, anak mit deka suah berandau pasal seks enggau apai indai sida taja pan sida agi mit. Sida deka berandauka topik tu sesuai enggau umur sida. Lebuh sida mansang besai, sida mega patut belajar mayuh agi pasal nya.

 “Lebuh aku mansang besai, apai indai enggai berandau pasal sekeda topik tu enggau aku. Aku ngarapka kami ulih bekunsika mayuh agi utai lebuh kami berandau. Diatu aku udah nyadi indai. Aku enggau naka ulih suah berandau enggau anak aku pasal seks enggau chara ti relaks.”—Flavia.

 Enti anak nuan tepedaka pornografi

 Anang jampat nganu. Enti nuan nemu anak nuan udah meda, ninga tauka macha pornografi, uji ngawal reaksi nuan. Iya engka udah berasai tusah ati sereta besalah ketegal utai ke nyadi. Enti nuan terus ringat ngagai iya, tu deka ngasuh iya balat agi tusah ati sereta enggai agi berandau enggau nuan dudi hari.

 Pansik utai ke nyadi. Ari ke ngumbai diri nemu semua fakta, tanya meh anak nuan baka ni iya ulih tepedaka pornografi. Ambika chunto, kati bisi orang nganjung gambar ngagai iya, tauka kati iya ngiga kediri empu? Kati nya keterubah kali iya meda pornografi, tauka kati iya udah kala meda nya sebedau tu? Kati perengka elektronik ke dikena iya bisi ngundan tetapan ke ulih nagang iya ari meda utai ti enda manah? Enti pia, kati iya ngiga chara bukai kena ngiga pornografi? Kingatka, tuju nuan nya dekaka anak nuan bejaku enggau jujur, ukai nasat iya.

 Kereja meh utai ti patut. Ngambika chunto, enti anak nuan enda sengaja tepedaka pornografi, nuan ulih ngaduka baru tetapan ba perengka elektronik iya.

 Enti nuan nemu iya sengaja ngiga pornografi, beri iya disiplin enggau chara ti bepengerindu. Tulung anak nuan keran deka nulak pornografi enggau berandauka ayat baka Jop 31:1, Masmur 97:10 sereta Masmur 101:3 enggau iya. d Padahka ngagai iya, nuan deka berandau pasal tu enggau iya ninting minggu ngambika ulih meda pemansang iya sereta kena nemu nama agi utai ke patut digaga nuan kena nulung iya.