Entara 1990 enggau 2015, sarak ke nyadi ba orang ke beumur 50 taun ke-atas dua kali lipat ba Amerika Serikat, lalu tu mega nyadi tiga kali lipat ba sida ke beumur lebih ari 65 taun. Nama kebuah utai tu majak balat nyadi? Baka ni nuan ulih nyeliahka tu nyadi ba tikah nuan?

Dalam artikel tu

•  Nama kebuah sida ke udah tuai deka sarak?

•  Utai ke patut digaga nuan

•  Utai ke ulih dikerandauka

•    Kesuah iya, sida ke udah tuai sarak ketegal kaul sida belubah-lubah enda rapat agi. Nyau kelama, utai ke diminat tauka hobi ba entara sekeda laki enggau bini mega enda sama agi, lalu sida nadai utai ti ulih digaga begulai. Tauka, ketegal laki bini udah lama megai tanggungjawap nyadi apai indai, sida nyau enda nemu chara ka begulai enggau pangan diri agi pengudah anak sida mansang besai lalu pindah ari rumah kena ngidupka diri.

•    Kemayaharitu, orang ke dikumbai bepenemu ba tikah ngasuh laki bini fokus agi ngagai utai ke diguna sida empu. Sida meransang laki bini nanya diri empu, ‘Kati tikah aku tu ngasuh aku lantang?’ ‘Kati tikah tu ngasuh aku nyadi orang ke manah agi?’ ‘Kati aku berasai dikesayauka kaling aku?’ Mayuh orang kemayaharitu ngumbai, enti saut nuan “enda” ngagai siti ari tanya tu, nuan patut ngereja utai ke ngelantangka nuan empu. Manah agi sarak lalu idup nitihka chara ke dikedekaka nuan.

•   Orang enda ngumbai sarak nya utai ti salah agi. Orang ke mansik pasal ulah mensia iya nya Eric Klinenberg nulis, “Suba, orang ke mutuska deka sarak patut ngembuan kebuah ti besai enti sida enda gaga ati idup segulai enggau kaling pengidup sida. Tang kemayaharitu lain agi. Laban orang kemayaharitu pechaya, utai ke pemadu penting nya nitihka chara ke dikedekaka nuan. Nyadi, enti nuan enda gaga ati sereta enda puas ati enggau tikah nuan, manah agi nuan sarak ari ke ngetanka diri dalam tikah nya.” a

 Amat, pengudah sarak penanggul ke ditapi tadi engka udah ulih diputarka. Tang penanggul ke bukai deka datai. Ngambika chunto, nitihka pansik, “orang sarak maya udah tuai bisi penanggul ba ekonomi kelebih agi ba sida ke indu.”

 Bisi siti da agi utai ke patut diperunding. Munyi ku jaku ke diambi ari bup Don’t Divorce, “Taja pan nuan nguji ngubah chara pengidup nuan, tang nuan agi orang ke sama. Enti mandingka chara nuan bejaku enggau kaling nuan suba, nama ubah ke udah digaga nuan? Nama reaksi nuan diatu enti bisi utai ke enda disetuju nuan?” b

•   Nerima ubah. Nadai kaul ke ulih mengkang sama belama iya. Kaul nuan enggau kaling nuan engka berubah pengudah anak seduai pindah tauka ketegal minat seduai enda sama agi. Ari ke ngarapka kaul seduai nya mengkang sama baka suba, manah agi seduai berundingka chara ngemanahka kaul seduai diatu.

   Prinsip Bup Kudus: “Anang sekali-kali nanya, ‘Nama kebuah utai menya manah agi ari utai ti diatu?’ Nya ukai tanya ti dipansutka orang ke nemu berunding.”—Pengajar 7:10.

•   Terus bekaban rapat enggau kaling nuan. Kati nuan ulih ngembuan minat ti sama ngagai utai ke diminat kaling nuan, tauka kati nuan ulih mai kaling nuan sama minat enggau utai ke diminat nuan diatu? Kati nuan ulih berundingka utai ti baru tauka utai ke sama diminat seduai lalu ulih digaga begulai? Ngambika seduai enda ngasaika pangan diri semina baka orang ke diau serumah aja, seduai patut ngembuan juluk ati deka ngena awak seduai begulai, lalu berasai baka laki bini.

   Prinsip Bup Kudus: “Awakka tiap iku orang seruran ngereja utai ke penguntung orang bukai, ukai ke penguntung diri empu.”—1 Korint 10:24.

•   Terus ngayanka basa ngagai pangan diri. Anang ngetu ngayanka basa taja pan seduai udah lama idup segulai. Bejaku enggau nelap ngagai kaling nuan, lalu ayanka basa ti sama baka seduai benung besulu suba. Sebut meh leka jaku “ulih nulung aku” enggau “terima kasih.” Suah agi ayanka meh pengerindu enggau asai ati ti beterima kasih nuan ngagai kaling pengidup nuan.

   Prinsip Bup Kudus: “Manah ati sereta siru enggau pangan diri.”—Epesus 4:32.

•   Ingatka kenangan ti manis. Peda meh album gambar kawin seduai begulai, tauka gambar kenangan manis seduai ke bukai. Enggau chara tu, nuan ulih ngetanka kaul seduai, mulaika baru pengerindu seduai ke suba sereta bisi basa ba tikah.

   Prinsip Bup Kudus: “Taja pia, tiap iku kita patut rinduka bini diri, baka kita ke rinduka diri empu, lalu bini patut balat bebasaka laki iya.”—Epesus 5:33.