Dalam siti survei, 97 peratus bala nembiak berumur urung belasan taun madahka sida bekena ke media sosial. Kati anak nuan keran nitihka orang ngaga pengawa tu mega? Enti pia, bisi sekeda pekara ke patut diperatika.

Ba artikel tu

•  Baka ni chara anak nuan ngena awak

•  Nama runding anak nuan pasal milih kaban

•  Baka ni gaya emosi anak nuan

•  Nama ulah anak nuan lebuh iya ngena online

•  Kati media sosial tu beguna?

•  Runding apai indai

 Bisi siti laman web ke dikumbai HelpGuide madahka, “Media sosial digaga kena narit minat nuan, ngambika nuan seruran deka online, enggau selalu deka muka talipun ketegal deka nemu nama utai ke nyadi.”

 “Ku jaku, aku semina deka meda media sosial dalam beberapa minit aja, tang nyau enda sedar aku udah meda nya bejam-jam. Tusah amat deka ngelengkaka talipun lalu ngereja utai ti beguna agi.”—Lynne, 20.

 Pikirka: Kati anak aku ulih ngawal diri lalu nitihka takat ke diberi aku lebuh iya ngena media sosial? Kati anak aku udah nemu berunding, ngaga takat ke diri empu lalu nitihka nya?

 Prinsip Bup Kudus: “Nya alai idup enggau bejimat, baka orang ke bepenemu-dalam, kena peluang kita enggau badas.”—Epesus 5:15, 16.

 Tuju media sosial digaga, ngambika orang ngasaika diri ngembuan mayuh kaban. Tang kesuah iya, kaban ke ditemu ba media sosial ukai kaban ti bendar.

 “Aku meratika, mayuh bala nembiak saru ngumbai enti majak mayuh ‘like’ tauka majak mayuh kaban ba media sosial sida, tu reti iya bisi mayuh orang ibuhka sida, taja pan sida enda entu ngelala pangan diri.”—Patricia, 17.

 Pikirka: Kati anak aku ulih faham, penyampau follower sereta like ke diulih sida ba media sosial nya enda penting? Baka ni iya tau bulih kaban ba dunya ti nyata ari ke ngiga kaban nengah media sosial aja?

 Prinsip Bup Kudus: “Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah?”—Jaku-dalam 17:17.

 Bala pemansik madahka, enti kelalu bekenaka media sosial, tu ulih ngasuh sesiku orang berasai sunyi, irau enggau berasai ditekan.

 “Kitai sigi berasai tusah ati lebuh meda gambar kaban kitai begulai enggau pangan diri, tang enda mai kitai.”—Serena,19.

 Pikirka: Kati anak aku nemu nagang diri ari kelalu berundingka diri tauka kelalu fokus ngagai diri empu aja? Tauka kati iya ulih nyeliahka diri ari ulah ti udu bepekit, tauka kelalu ka nunda pengawa ke digaga orang bukai ba media sosial?

 Prinsip Bup Kudus: “Anang sumbung; anang nyemekih pangan diri; anang ngining pangan diri”—Galatia 5:26.

 Ba media sosial, senang amat alai sesiku orang membuli tauka dibuli, nganjung mesej ke enda menuku tauka kamah, sereta meda utai ti lucah. Taja pan ukai anak nuan ke deka meda semua utai nya, tang kekadang iya tusah deka nyeliahka diri.

 “Aku meda utai ba media sosial muntang tauka senang nyadi utai ke enda manah. Mayuh leka jaku ke kasar sereta musik ti enda menuku.”—Linda, 23.

 Pikirka: Kati anak aku nemu ngena Internet enggau chara ti betul? Kati anak aku nemu nagang diri, sereta ulih nyeliahka diri ari meda tauka ninga utai ti enda manah sereta enda menuku?

 Prinsip Bup Kudus: “Tang pengawa bambai, enggau semua ulah ti kamah, tauka pengamu enda patut nyadi ba bala kita, . . . Anang bejaku kamah, tauka bejaku beli, tauka enda senunuh bejaku laban utai nya enda patut.”—Epesus 5:3, 4.

 Media sosial ukai utai ti pemadu beguna ba pengidup. Pia mega iya ukai utai ti ulih ngasuh pengidup gaga sereta nyamai. Mayuh bala nembiak sanggup idup tanpa media sosial, nyengkaum sida ke kala ngena nya suba, tang diatu sida mutuska badu ngena nya agi.

 “Kakak aku nerima kesan ti enda manah ketegal iya ngena media sosial. Pengudah aku meda utai ke nyadi ba iya, aku pan ngaga pemutus badu ngena media sosial. Kenyau ari nya, aku berasai gaga agi ati sereta ngasaika pengelantang ba pengidup ti bendar.”—Nathan, 17.

 Poin ti beguna: Sebedau ngemendarka anak nuan ngena media sosial, tentuka sida nemu berunding ngambika ulih ngena awak enggau manah, ngiga kaban ti bendar, sereta nyeliahka utai ti enda menuku.

 Prinsip Bup Kudus: “Orang ke pintar deka nyingkang enggau bejimat.”—Jaku-dalam 14:15.