Ngena teknologi ulih meri penguntung tauka ulih ngerusak tikah nuan. Baka ni asil iya ba tikah nuan?

•  Utai ke patut ditemu nuan

•  Utai ke ulih digaga nuan

•  Nama ku laki-bini ke bukai

•  Chara berandau

•   Ngena teknologi enggau chara ti manah ulih meri penguntung ba tikah. Ngambika chunto, sekeda laki-bini ulih begigaka pangan diri lebuh sida ba endur bukai.

   “Mesej ke pandak ti madah, ‘Aku sayauka nuan’ tauka, ‘Aku enda betah nuan’ ulih ngasuh nuan enggau kaling nuan semak agi.”—Jonathan.

•   Enti teknologi dikena enggau chara ti salah, nya ulih ngerusak tikah. Ngambika chunto, sekeda orang kelalu mayuh awak ngena perengka elektronik lalu masau jam tauka maya ke patut dikena sida enggau kaling pengidup.

   “Tentu bisi maya lebuh laki aku ka agi bejaku enggau aku enti aku enda ngena talipun.”—Julissa.

•   Sekeda orang ngumbai, sida ulih berandauka utai ti beguna enggau kaling pengidup ba maya ti sama maya sida meda perengka elektronik. Orang ke baka nya ngumbai, sida ulih ngereja utai lebih ari siti ba maya ti sama enggau manah. Tang, nitihka pakar sosial ke benama Sherry Turkle, nya enda ulih dikereja. Taja pan orang ngumbai ‘pengelandik’ nya manah, tang penemu nya salah. Ku iya, iya ke amat, ‘mayuh agi utai ti dikereja kitai ba maya ti sama, mayuh agi penyalah ke digaga kitai.’ a

   “Nyamai amat berandau enggau laki aku, tang ukai maya iya ngereja mayuh utai bukai. Lebuh iya ngereja mayuh utai, nya ngasuh aku ngasaika iya enda ibuh sekalika aku bisi tauka nadai ba dia.”—Sarah.

 Batang ajar: Chara nuan ngena teknologi ulih nulung tauka ngerusak tikah nuan.

 Ngemeratka utai ti pemadu manah. Bup Kudus madah: ‘Ngambika kita nemu milih utai ti pemadu badas.’ (Pilipi 1:10) Tanya diri empu, ‘Kati aku enggau kaling pengidup ngena mayuh awak ti patut dikena kami begulai ba perengka elektronik?’

 “Sinu amat meda seiku lelaki enggau seiku indu bepedaka talipun maya sida benung makai begulai. Seduai iya sama bela beberatka perengka elektronik. Kitai enggai nyadi ulun teknologi, lalu enda ingatka utai ti pemadu beguna, iya nya kaul enggau pangan diri.”—Matthew.

 Tetapka tatak. Bup Kudus madah: ‘Idup enggau bejimat, ukai baka orang ke beli, tang baka orang ke bepenemu-dalam. Kena semua peluang kita enggau badas.’ (Epesus 5:15, 16) Tanya diri empu, ‘Ari ke aku seruran bebalaska mesej seraya aku nerima nya, ulih aku netapka siti maya aku patut macha sereta malas mesej ti enda berumban?’

 “Aku ngasaika manah agi aku netapka silent mode lalu semina macha mesej nya ba maya ti ngena aja. Jarang amat orang talipun tauka ngirum mesej tauka e-mail ti berat, ke patut diperumbanka aku.”—Jonathan.

 Enti ulih, anang mai pengawa kereja pulai. Bup Kudus madah: “Semua utai ti nyadi di dunya ti endang nyadi ba maya ti diletak.” (Pengajar 3:1) Tanya diri empu: ‘Kati aku nejuka pengawa kereja ngachau awak enggau diri sebilik ketegal ngena talipun ba rumah? Enti pia, kati tu ngachau tikah aku? Nama runding kaling pengidup aku?’

 “Ketegal teknologi, kitai ulih kereja ba barang alai sereta barang maya. Aku bebendar nguji nyeliahka diri ari meda talipun tauka ngaduka pengawa kereja, lebuh begulai enggau bini aku.”—Matthew.

 Berandau enggau kaling pengidup nuan chara ngena teknologi. Bup Kudus madah: “Anang berundingka diri empu aja, tang berunding ke orang bukai.” (1 Korint 10:24) Berandau enggau kaling pengidup nuan chara ngena teknologi, enggau nama ubah ti patut digaga seduai enti nya beguna. Nuan ulih berengkah enggau chara berandau ba artikel tu.

 “Aku enggau laki aku terus terang enggau pangan diri, enti kami ngasaika seiku ari kami udah ngena kelalu mayuh awak ba talipun tauka tablet. Kami duai setuju tu ulih nyadika penanggul, nya kebuah kami nguji meretika penemu pangan diri.”—Danielle.

 Batang ajar: Tentuka nuan ukai ulun teknologi.