Apai indai ke sama bela gawa, mutuska nganjung anak sida ngagai endur nyaga anak mit tauka taska. Tang, kati tu pemutus ti betul?

•  Tanya ke ulih diperundingka

•  Utai ke ulih digaga nuan

 Ketegal pemutus tu, kati nya ngachau kaul aku enggau anak? Engka. Maya anak nuan mansang besai, untak sida pan deka mansang tauka belajarka mayuh utai. Chara nuan ngemesaika iya, bisi kaul enggau chara iya begulai enggau orang bukai. Nya kebuah, maya anak nuan benung mansang besai, beri meh mayuh awak begulai enggau iya.—Ulang Adat 6:6, 7.

•    Enti nuan deka nganjung anak ngagai Taska, tentuka nuan udah bisi chara ngemanahka kaul seduai.

 Kati anak nuan deka agi neladan orang bukai ari nuan empu? Engka. Bup Hold On to Your Kids madah: “Mayuh agi awak ke dikena anak nuan begulai enggau bala kaban iya, senang agi iya nunda sida.”

•    Enti nuan deka nganjung anak ngagai Taska, tentuka nuan agi ulih bejalaika tanggung pengawa nyadi apai indai. Ngambika nuan ulih nyaga sereta beratika ulah anak nuan.

 Kati endur nyaga anak mit tauka Taska ulih nulung anak nuan nelebaka diri tama sekula? Bisi orang nyaut, ‘Au.’ Tang, bisi mega ke ngumbai chara nya ulih nulung mimit, tauka nadai mai penguntung ngagai anak sida. Penelope Leach, seiku pakar psikologi anak mit madah: “Anang nipu diri, lalu ngumbai ‘pelajar’ nya meh kunchi pemujur ba pengidup. Bisi orang ngasaika, tumu agi anak dianjung ngagai endur ke baka sekula tauka sekula, asil iya manah agi. Enti pia, nuan engka enda beberatka tanggung pengawa, nuan empu ke patut nyadi ‘pengajar’ ke anak nuan, kenyau ari sida ada.”

•   Apai indai patut berunding dulu, kati nya patut tauka enda nganjung anak sida ngagai Taska.

 Kati nuan tauka kaling pengidup nuan ulih badu kereja ketegal anak? Ba sekeda ruang bilik, laki bini patut sama bekereja ngambi sida sebilik ulih idup senang. Tang, kati nya pemutus ti manah?

•   Laki bini ulih berunding chara ngatur belanja. Enggau chara tu, seiku ari seduai iya ulih ngetu gawa, lalu nyaga anak.

 Sebedau mutuska nganjung anak ngagai Taska, perundingka pemutus nuan nya enggau dalam. Nama patut digaga nuan, enti nuan bisi ati deka nganjung anak nuan ngagai Taska?

 Bup Kudus madah: “Orang ke pintar deka nyingkang enggau bejimat.” (Jaku Dalam 14:15) Peratika meh enggau dalam prinsip Bup Kudus tu, lalu perundingka sekeda chara ba baruh sebedau nuan nganjung anak ngagai Taska.

 Sekeda chara

•   Sekeda apai indai nganjung anak sida ngagai endur nyaga anak mit ke dipejalaika ba rumah sida empu. Kesuah iya, bisi seiku tauka beberapa iku penyaga, ke nyaga beberapa iku anak mit aja.

•   Bisi mega apai indai minta tulung ari bala kaban belayan, penyaga ke diau serumah, tauka orang gaji ke gawa maya sida bekereja aja.

 Semua chara tu bisi asil ti manah sereta asil ti enda manah. Nuan ulih nanya apai indai ke bukai, sekalika sida kala nganjung anak ngagai endur nyaga anak mit tauka Taska, tauka kati sida bisi chara bukai. “Nuan amat pintar enti nuan nemu minta jaku lalau.”—Jaku Dalam 13:10.

 Baka ni enti nuan udah mutuska deka nganjung anak nuan ngagai endur nyaga anak mit tauka Taska? Enti pia . . .

 Pansik pasal endur nya

•    Kati endur nyaga anak mit tauka Taska nya bisi lisin ari perintah? Kati penyaga ke gawa dia bisi latih? Nama rita pasal orang ke gawa dia? Kati endur nya ngembuan rita ti manah tauka enda?

•    Kati endur nya beresi sereta likun?

•    Nama bengkah main ke disediaka? a

 Pansik pasal penyaga dia

•    Nama latih ke diterima sida? Tu nyengkaum, kati sida bisi latih ngajar anak mit ke bedau sekula? Kati sida nemu meri bantuan kecemasan tauka CPR?

•    Kati nuan ulih nentuka penyaga dia nadai kala ngereja sebarang pengawa jenayah?

•    Kati endur nya selalu ngambi penyaga ti baru tauka betukar-tukar penyaga? Enti au, tu engka ulih ngachau anak nuan. Laban iya patut suah nelebaka diri enggau orang ke nyaga iya.

•    Kati penyaga dia chukup orang alai nyaga anak mit? Enti anak mit ke diibun dia mayuh, tang enda chukup penyaga, tu engka ngasuh anak nuan enda tentu dikeibuhka. Lalu pia mega, tu pan bepanggai ngagai umur sereta penau anak nuan.

•    Kati penyaga dia deka berandau betunga mua enggau nuan?