Mayau rindu nyaga pemeresi diri. Sida ngena 24 peratus ari jam sida kena meresi tubuh diri. Ketegal dilah sida ti amat ngalitka ati, mayau ulih meresi diri enggau manah.

 Perundingka: Dilah mayau ngembuan 290 papila. Gamal papila baka duri ti bingkuk ke belakang, lalu iya sekering kukut mensia. Tiap papila bisi alur ti nginsap ai liur enggau senang lebuh dilah mayau tama ke dalam mulut iya. Lebuh mayau nilat bulu iya, papila ba dilah iya mansutka ai liur nya ke atas kulit iya.

 Ninting ari, dilah mayau ulih mai kekira 48 mililiter ai liur ngagai kulit enggau bulu iya. Ai liur mayau ngembuan enzim ti ulih meresi utai ti kamah. Pia mega, lebuh ai liur mayau berengkah rangkai, tubuh mayau nya kurang angat. Tu amat beguna laban kelenjar peluh mayau mimit aja.

 Enti papila negu bulu ti tusut, papila nya deka tama agi ke dalam begian bulu nya, lalu narit begian bulu nya nyentukka iya enda tusut agi. Lebuh mayau meresi diri, begian ujung papila ngasuh kulit iya manah agi. Bala saintis nguji ngaga sugu buk ti sebaka enggau dilah mayau. Bebida ari sugu biasa, sugu buk tu senang diperesi lalu ulih nyugu buk ti tusut enggau senang. Bala saintis pechaya dilah mayau ulih nulung sida ngaga perengka ti manah agi kena nuchi utai ti bebulu. Sida mega ulih ngena utai ti dipelajar ari dilah mayau kena ngemanahka agi chara kitai nuangka losen tauka ubat ba kulit ti bebulu tauka bisi buk.

 Nama runding nuan? Kati dilah mayau nyadi pia aja, tauka ditempa?