Bala saintis madahka ukui ulih ngena penau sida nyium bau kena nentuka umur, penempa, sereta asai ati ukui bukai. Ukui mega ulih dilatih ngiga bom enggau dadah. Bebida ari mensia, ukui ngena idung kena “meda” utai ti ngelingi sida.

 Perundingka: Penau ukui nyium bau beribu kali lansik agi ari penau mensia. Nitihka pansik U.S. National Institute of Standards and Technology, ukui ulih nyium bau ti enda ulih ditemu mensia. Pengelansik ukui nyium bau “ulih disemaka enggau ulih ngasaika gula ti penyampau satu per empat sudu mit, ke dichampur ke dalam ai kolam renang ti ngemesai kolam renang Olimpik.”

 Nama kebuah ukui ulih nyium bau baka nya?

•   Idung ukui basah. Nya alai, idung sida senang agi nangkap bau.

•   Idung ukui bisi dua iti saluran udara—siti kena enseput, siti agi kena nyium bau. Lebuh ukui nyium bau, udara tama ngagai idung iya ti ngembuan reseptor bau.

•   Begian olfaktori mensia semina 5 sentimeter persegi. Tang, begian olfaktori ukui 130 sentimeter persegi tauka lebih.

•   Ukui ngembuan 50 kali mayuh agi sel-sel reseptor ari mensia.

 Tu nulung ukui nemu tiap iti utai ke bisi dalam sesiti bau. Ambika chunto, mensia ulih nyium bau sup. Tang, nitihka pansik sekeda pakar, lebuh ukui nyium bau sup, iya ulih nemu tiap iti utai ke bisi dalam sup nya.

 Bala saintis ba Pine Street Foundation, institusi ti ngaga pansik pasal kanser, madahka untak enggau idung ukui nyadika “siti ari perengka ti pemadu manah di dunya tu kena ngiga bau.” Bala saintis deka ngaga “idung” elektronik ti ulih ngiga bom, utai ke ditagang, sereta penyakit, nyengkaum kanser.

 Nama runding nuan? Kati penau ukui nyium bau nyadi pia aja, tauka ditempa?