Amat. Dalam Bup Kudus bisi madahka, mayuh orang ba hari ti penudi deka majak jai. Tu ngujungka standard moral ba dunya majak labuh, lalu mayuh orang jai enggau pangan diri. a (2 Timoti 3:1-5) Taja pia, dalam Bup Kudus mega bisi nerangka, ukai semua orang baka nya. Ari tulung Petara, bisi orang enggau naka ulih nulak pengawa ti jai, lalu ngubah runding sereta ulah sida ngambi ulih ngelantangka Petara.—Isaiah 2:2, 3.

Ba artikel tu

•  Munyi ku Bup Kudus, baka ni gaya runding sereta ulah orang kemayaharitu?

•  Nama empas iya ngagai orang bukai enti mayuh orang berundingka diri empu?

•  Nama kebuah ulah orang majak jai?

•  Baka ni ulah kitai lebuh meda orang majak jai?

•  Kati penyai tu enda nemu ngetu tauka majak balat?

•  Kati penyai orang ulih ngasuh utai charut lalu enda ulih ditagang agi?

 Bup Kudus endang udah madah, mayuh ulah ti jai deka nyadi pekara biasa kemayaharitu, laban mayuh orang berundingka diri empu. Sida ‘berundingka diri empu aja, enda nemu nagang diri, sereta semina deka ngelantangka diri lalu enda rinduka Petara.’—2 Timoti 3:2-4.

 Utai ke disebut ba Bup Kudus enda bula. Orang ba jeman kitai suah agi berundingka diri empu; sida mina ngemeratka pengelantang enggau pemuas ati diri. Penanggul tu majak balat nyentukka bisi orang nyebut, tu Jeman Aku tauka Jeman Aku Aku Aku. Mayuh orang mina kiruhka diri empu, nyentukka sida “begedika utai ti badas.” Sida mega “enda nemu meri terima kasih.” Sida enda beterima kasihka utai ke dikemisi, pan enda nemu beterima kasih ngagai orang bukai.—2 Timoti 3:2, 3.

 Ketegal berundingka diri empu, nyadi pansut meh ulah ke jai ti bukai. Bup Kudus endang udah madah, ulah ke jai tu udah teleba dikereja mayuh orang ba jeman kitai. Chunto iya:

•   Amu. Mayuh orang “angkunka duit.” Ba runding sida, pemujur seseiku orang nya dipeda ari asil utai ke diulih sida, tauka pengaya ke dikembuan sida.—2 Timoti 3:2.

•   Sumbung. Mayuh orang berasai “temegah, sumbung.” (2 Timoti 3:2, 4) Sida rindu madah tauka ngelakungka penau, pengelandik, sereta pengaya diri.

•   Bejai. Dini-dini alai, sigi bisi orang ke rindu “bejai orang” tauka “bejakuka orang.” (2 Timoti 3:2, 3) Sida ngereja nya ngagai orang bukai, pia mega ngagai Petara.

•   Kieh. Mayuh orang enda ulih bekerejasama, enda ulih beserakup, sereta kieh. (2 Timoti 3:2-4) Sida enggai sama-sama beaum ngambi ulih beserakup, tauka mutarka sesiti utai begulai. Sida pan selalu ngelanggar atur ke udah ditetapka.

•   Kasar. Mayuh orang “mangah” kemayaharitu. Sida amat jampat ringat, nyentukka sida suah ngereja utai ti jai.—2 Timoti 3:3.

•   Rindu ngelanggar atur. Jesus endang udah madah, ba jeman kitai “penyai deka nambah-menambah.” (Matthew 24:12) Iya pan bisi madah deka bisi “pengachau” ba mayuh endur.—Luke 21:9.

•   Kurang tauka nadai pengerindu dalam diri sebilik. Bala anak, “enda ngasika apai indai,” lalu mayuh orang “nadai nemu siruka” diri sebilik. Asil iya, mayuh diri sebilik enda dikeibuhka sereta dijamah.—2 Timoti 3:2, 3.

•   Baka ke bisi agama tang ulah jai. Mayuh orang mega “baka ke bepegai ba agama, tang sida besangkalka kuasa agama nya.” (2 Timoti 3:5) Ari ke nitihka peneka Petara, sida ngiga tuai pengarap ke semina madahka utai ke deka didinga sida aja.—2 Timoti 4:3, 4.

 Orang ke berundingka diri empu, suah ngasuh orang bukai berasai ditekan ba runding enggau emosi. (Pengajar 7:7) Chunto iya, orang ke amu, nadai kala berundingka pengerugi orang bukai. Ketegal nadai penyiru, enggau senang orang kasar enggau ruang bilik diri, nyentukka orang ke diperinsa sida balat tusah ati, indah bisi ke deka munuh diri. Kelimpah ari nya, orang ke enda tetap ati, udah nelihka ati lalu ninggalka lita ti lama alai suman.

 Bup Kudus nerangka kebuah iya:

•   Orang enda rinduka Petara sereta pangan diri. (Matthew 24:12) Ketegal nya, mayuh orang majakka penyumbung.

•   Sitan udah diburu ari serega, lalu iya semina ulih rerayau ba dunya aja. (Pemandang 12:9, 12) Kenyau ari nya, iya ngemansangka ulah ti jai ke ngasuh mensia majak sumbung.—1 John 5:19.

 Jaku Petara nangkan kitai: “Anang begulai enggau sida!” (2 Timoti 3:5) Ukai reti iya, kitai nyau nadai ulih begulai enggau orang. Tang, kitai enggai bekaban rapat enggau orang ke sumbung sereta enda rinduka Petara.—James 4:4.

 Penyai tu ulih ngetu. Bup Kudus madah, deka bisi “orang ke tusah ketegal semua utai ti jai.” (Esekiel 9:4) Sida ukai orang ke berundingka diri empu. Tang sida deka nitihka standard Petara ba pengidup. Jaku sereta ulah sida amat bebida enggau mayuh orang kemayaharitu. (Malaki 3:16, 18) Chunto, sida bebendar ngembuan kaul ti manah enggau semua orang. Sida mega enggai masuk champur ba pengawa perang tauka ngereja ulah ti kasar.—Mikah 4:3.

 Enda. Penyarut tauka pengachau ba dunya tu enda nyadi nyentukka semua utai ke badas abis lengis. Enda lama da agi, Petara deka munaska orang ke majak enggai betatika standard Iya. (Masmur 37:38) Iya deka ngenataika dunya baru. Reti iya, orang ke manah ati deka diau ba bumi tu belama iya. (2 Peter 3:13; Masmur 37:11, 29) Tu ukai semina jaku ti sengapa aja. Indah diatu, bisi orang ke udah ngubah pengidup sida, nitihka peneka Petara laban sida belajarka Bup Kudus.—Epesus 4:23, 24.