Pengerami Easter enda bepelasarka Bup Kudus. Enti nuan mansik sejarah pasal pengerami Easter, nuan deka nemu, pengerami nya bisi kaul enggau pengawa ngulihka mayuh anak ke diintu orang jeman kelia. Peratika sekeda utai tu.

1.   Nama: Nitihka Encyclopædia Britannica: “Nama asal Easter dalam jaku English enda ditemu. Ba abad ke-8, paderi Anglo-Saxon ke benama Venerable Bede ngambi leka jaku nya ari Eostre. Iya nya, dewi musin bungai enggau maya tawas pagi.” Bisi mega ngumbai Easter nya bekaul enggau Astarte, iya nya dewi Fenisia. Lalu Astarte pan mai reti ti sama enggau dewi Babilon, iya nya Ishtar.

2.   Arnab, ribit: Jelu tu ngambarka peridi, ti “datai ari adat jeman kelia, nyadika tanda ba menua Eropah sereta Timur Tengah, maya orang ke nadai pengarap ngintu pengerami sida lebuh musin bungai.”—Encyclopædia Britannica.

3.   Telu: Maya pengerami Easter, bala anak mit deka ngiga telu Easter ke dikumbai sida dibai arnab Easter. Tang enti nitihka Funk & Wagnalls Standard Dictionary of Folklore, Mythology and Legend, nya ukai “semina main ke bala anak mit, tang nya pengawa ngulihka mayuh anak ke kala diintu orang jeman kelia.” Sekeda adat agi pechaya, telu Easter ulih “mai pengelantang, pengelikun, pengerai, sereta dijaga enggau pengawa ajih.”—Traditional Festivals.

4.   Gari ti baru: “Maya nyambut Eastre tauka dewi musin bungai Scandinavia, orang ke ngena gari ti baru dikumbai enda bebasaka pengawa nya, lalu ulih mai nasit ti jai.”—The Giant Book of Superstitions.

5.   Sembah maya tawas pagi: Pengerami tu bekaul enggau pengerami ke nyembah mata panas. Kesuah iya, pengerami tu diintu “maya ekuinoks musin bungai. Tuju tu diintu maya tu, laban sida deka ngelaluka mata panas lalu nerima tenaga ari mata panas kena bulih utai idup ke baru.”—Celebrations—The Complete Book of American Holidays.

 Nitihka asal penatai Easter, The American Book of Days nerangka, “Endang amat, Gerija dulu kelia kala namaka pengerami ti salah, lalu nyengulaika ajar nya ngagai orang Kristian.”

 Bup Kudus ngingatka kitai, anang nyembah Petara ti bepelasarka adat tauka sesiti pengerami ke enda diterima Iya. (Mark 7:6-8) 2 Korint 6:17 mega bisi nerang, “seraraka diri ari sida”, lalu “anang negu utai ti enda tuchi.” Orang ke deka ngelantangka ati Petara, sigi enggai malut diri enggau pengerami Easter.