Bup Kudus nadai nyebut pasal Halloween, iya nya pengerami ke diintu mayuh orang kena 31 Oktober ninting taun. Lalu, pengerami tu enda sejalai enggau ajar Bup Kudus.

Ba artikel tu

•  Sejarah enggau adat Halloween

•  Kati kitai patut nemu pasal asal penatai Halloween?

•  Nama kebuah pengerami tu dikumbai Halloween?

•   Samhain: The World Book Encyclopedia madahka, “Halloween datai ari pengerami Samhain, iya nya “pengerami ke diintu orang Celt lebih ari 2,000 taun suba.” Maya pengerami tu, orang Celt pechaya orang ke mati deka begulai enggau orang ke agi idup. Nya kebuah, maya pengerami Samhain, orang ke agi idup deka ngabas orang ke udah mati.—Peda “ Ari ni Asal Penatai Halloween?”

•   Gari ke dikena maya Halloween, gula batu, sereta “trick or treat” a: Nitihka siti pansik, sekeda orang Celt pechaya, enti sida ngena gari ke ngenakutka, “bala antu deka nyangka sida sama bela antu” lalu enda ngachau sida. Bisi mega meri gula batu ngagai bala antu, ngambika bala antu enda ringat lalu ngachau orang. b

   Ba jeman Pertengahan Eropah, tuai pengarap Katolik mega ngintu pengerami tu. Lalu ngasuh orang ke sama pengarap enggau sida, ngagai rumah ke rumah bekenaka gari ke ngenakutka, sereta bepintaka pemeri.

•   Antu, puntianak, serigala jadian, ahli sihir enggau zombi: Semua leka jaku tu endang sigi udah lama dikaitka enggau roh ti jai. Bup Halloween Trivia ngumbai, antu-antu tu “raksasa roh ti jai” tauka “supernatural monsters,” ke bisi kaul enggau pemati, orang ke mati tauka takutka pemati.

•   Entekai Halloween, tauka jack-o’-lanterns: Ba jeman Pertengahan Britain, orang “ngabas ari rumah ke rumah minta pemakai lalu malas nya enggau chara besampika orang ke udah mati.” Sida bebaika “tanglung lalu dalam tangkung nya bisi lilin, ke nandaka roh ti tekurung.” (Halloween—From Pagan Ritual to Party Night) Sekeda pansik madahka, tanglung nya dikena muru antu. Dalam urung taun 1800 ba Amerika Utara, lobak ti segala enda dikena agi. Sida nukar nya ngena entekai laban entekai senang agi diukir sereta dikurik.

 Au. Taja sekeda orang ngasaika pengerami Halloween nya pengerami ke ngagaka ati, lalu enda ngemediska orang, tang pengawa ke digaga maya ngintu Halloween, enda sejalai enggau ajar Bup Kudus. Halloween bisi kaul enggau pengarap pelesu pasal orang ke mati enggau roh ti jai.

 Peratika ayat Bup Kudus ba baruh tu, ti nunjukka runding Petara pasal pengerami ke bekaul enggau Halloween:

•   “Anang betilitka nasit, tauka beburung, tauka bedukun, tauka bemanang, tauka bekenaka pengaruh, tauka betanya ngagai antu, tauka betanya ngagai semengat orang ke udah mati.”—Ulang Adat 18:10-12.

   Reti: Petara enda setuju enti kitai begigaka orang ti udah mati, tauka indah pepura ngereja nya.

•   “Orang ke mati nadai nemu utai.”—Pengajar 9:5.

   Reti: Laban orang ke mati nadai nemu utai, nyadi sida enda ulih bejaku enggau orang ke agi idup.

•   “Aku enggai kita bisi nama-nama kaul enggau bala melikat ti jai. Kita enda tau ngirup ari mangkuk Jehovah, lalu ba maya ti sama, ngirup ari mangkuk bala melikat ti jai.”—1 Korint 10:20, 21.

   Reti: Enti kitai deka ngagaka ati Petara, kitai enda ulih bisi nama-nama kaul enggau roh ti jai.

•   “Ngambika kita ulih bediri tegap ngelaban panjuk Sitan ti pintar nipu. Laban kitai ukai bibat ngelaban mensia, tang . . . ngelaban bala melikat ti jai ba serega.”—Epesus 6:11, 12.

   Reti: Orang Kristian patut ngelaban roh ti jai, lalu nunjukka diri nadai kaul enggau pengerami nya.