Bup Pemandang nerangka pasal siku “indu sundal ti bekuasa” lalu nama iya “siti misteri: ‘Babilon ti Besai.’” (Pemandang 17:1, 3, 5) Indu tu ngambarka semua pengarap ti pelesu ba serata dunya ke udah “nyilih pemendar pasal Petara enggau pemula.” a (Rome 1:25) Taja pan semua pengarap nya bisi utai ke enda sebaka, tang semua pengarap nya ngelimpangka orang ari nyembah Petara ti bendar, Jehovah.—Ulang Adat 4:35.

Chara ngelala Babilon ti Besai

1.   Babilon ti Besai nya siti lambang. Bup Pemandang nerangka mayuh utai “ngena tanda,” nyadi kitai ulih nyimpulka Babilon ti Besai nya siti lambang, ukai siku indu mensia ti amat. (Pemandang 1:1) Kelimpah ari nya, iya “duduk ba atas mayuh ai,” ti ngambarka “orang mayuh sereta orang ke datai ari bemacham bansa, menua, enggau jaku.” (Pemandang 17:1, 15) Indu mensia ke amat enda ulih ngereja nya.

2.   Babilon ti Besai ngambarka siti gerempung ba serata dunya. Iya dikumbai “nengeri ti besai ke bisi siti perintah ti bekuasa atas bala raja ba dunya.” (Pemandang 17:18) Nyadi iya mesti bisi ba serata dunya sereta amat bekuasa.

3.   Babilon ti Besai nya gerempung pengarap, ukai siti gerempung politik tauka gerempung ke bedagang. Nengeri Babilon kelia nya siti nengeri ti kuat ba agama lalu tebilang enggau pengawa bemanang sereta bekenaka “puchau enggau pengaruh.” (Isaiah 47:1, 12, 13; Jeremiah 50:1, 2, 38) Indah, orang ke diau dia megai pengarap ti pelesu ke sengaja ngelaban Jehovah, Petara ti bendar. (Pemungkal 10:8, 9; 11:2-4, 8) Bala raja Babilon enggau sumbung ngemesaika diri lebih agi ari Jehovah enggau sembah ke diberi ngagai Iya. (Isaiah 14:4, 13, 14; Daniel 5:2-4, 23) Baka nya mega, Babilon ti Besai ditemu ari “pengawa [iya] ke bekaul enggau melikat ti jai.” Tu terang nunjukka, tu siti gerempung pengarap.—Pemandang 18:23.

    Babilon ti Besai ukai gerempung politik laban Bup Kudus madahka, “bala raja ba dunya” nyabak tusah ati lebuh meda iya dirusak. (Pemandang 17:1, 2; 18:9) Nya mega ukai gerempung ke bedagang laban Bup Kudus nunjukka iya bebida ari “orang ke bedagang ba dunya.”—Pemandang 18:11, 15.

4. Gambar diambi enggau pemendar ari British Museum

     Babilon ti Besai endang chun kena ngelambangka pengarap pelesu. Ari ke meransang orang semak enggau Petara ti bendar, Jehovah, pengarap ti pelesu ngelimpangka orang lalu meransang sida nyembah petara ke bukai. Bup Kudus madah, tu baka ke “nyundalka diri enggau petara”‏ ke bukai. (Peda nota kaki ba Adat Lewi 20:6 enggau Pemansut 34:15, 16) Mayuh pengarap pelesu agi ngajar ajar ti bepun ari Babilon jeman kelia, nyengkaum ajar pasal triniti, semengat ke enda nemu mati, sereta ngena patung tauka gambar ba sembah. Pengarap tu mega nyampurka sembah sida enggau pengerindu sida ke dunya tu. Bup Kudus nyemaka ulah ti enda tetap ati tu baka pengawa butang.—James 4:4.

    Pengarap ti pelesu ngembuan mayuh pengaya sereta rindu ngayanka nya. Tu sama enggau utai ke dipadah Bup Kudus pasal Babilon ti Besai, ke “ngena gari ke bewarna ungu enggau mirah gelap sereta ngena perengka emas, batu ti berega, enggau mutiara.” (Pemandang 17:4) Babilon ti Besai nya pun “utai ti keji ba dunya,” iya nya ajar enggau ulah ke ngenyaika Petara. (Pemandang 17:5) “Orang ke datai ari bemacham bansa, menua, enggau jaku” ngambarka semua orang ke nyukung pengarap ti pelesu, iya nya Babilon ti Besai.—Pemandang 17:15.

 Babilon ti Besai betanggungjawapka pemati “semua orang ba dunya ke udah mati disayat.” (Pemandang 18:24) Sepemanjai sejarah mensia, pengarap pelesu ukai semina nyungkak orang beperang sereta ngemediska orang bukai, tang mega enda ngajar pemendar pasal Jehovah, Petara ti bepengerindu. (1 John 4:8) Ketegal tu, mayuh orang mati.

 Ba mata Petara, “dosa iya [Babilon ti Besai] udah betugung nyentukka serega.” (Pemandang 18:4, 5) Petara ringat ngagai pengarap pelesu ketegal udah ngenyaika nama Iya sereta nesatka orang ke nitihka pengarap nya.

 Bup Kudus madahka, Petara udah “netapka ukum ke deka ninggang” Babilon ti Besai. (Pemandang 18:20) Ngena jaku sempama, Bup Kudus madahka Petara deka ngemunaska semua pengarap pelesu. (Pemandang 18:8) Iya deka ngasuh siku jelu ti siga ke bewarna mirah gelap (ke ngambarka siti raban politik ti bekuasa) ngemunaska pengarap pelesu abis lengis. (Pemandang 17:16, 17) “Baka nya meh Babilon, nengeri ti besai nya, deka ditikauka enggau jampat, lalu iya enda ulih ditemu agi.” (Pemandang 18:21) Nya meh kebuah orang ke deka ngelantangka ati Petara mesti “pansut ari bala sida” sereta nyeraraka diri ari pengarap pelesu.—2 Korint 6:14-17.