Enda. Bumi tu enda dirusak, ditunu ba api, tauka diganti enggau bumi ke bukai. Bup Kudus bisi nulis, Petara nempa bumi nyadika endur mensia diau belama-lama iya.

•   “Orang ke lurus deka bempu menua tu lalu diau ditu belama iya.”​—Masmur 37:29.

•   “[Petara, NW] udah ngengkahka dunya tegap ba pugu iya, lalu iya enda dikinsitka.”​—Masmur 104:5.

•   “Dunya mengkang enda berubah.”​—Pengajar 1:4.

•   “Iya nempa lalu ngaga dunya. Iya ngaga dunya tegap sereta tan. Iya nadai ngaga dunya nyadi endur ti sunyi nadai mensia, tang nyadi endur alai mensia diau.”​—Isaiah 45:18.

 Petara enda ngemendarka mensia ngerusak bumi tu enggau chara ngamahka dunya, perang, tauka chara bukai. Tang, Iya deka “ngerusak sida ke nyadi pengerusak dunya!” (Pemandang 11:18) Baka ni Petara ngereja tu?

 Petara deka nganti perintah mensia ke enda ulih nyaga bumi enggau siti Perintah ba serega ti sempurna. (Daniel 2:44; Matthew 6:9, 10) Jesus iya nya Anak Petara, deka nyadi Raja ba perintah nya. (Isaiah 9:6, 7) Lebuh Jesus ba bumi, iya ngaga pengawa ajih ti nunjukka iya bisi kuasa atas kuasa alam. (Mark 4:35-41) Lebuh Jesus nyadi Raja ba Perintah Petara, iya deka ngena kuasa iya ngaduka baru bumi tu baka ba Kebun Eden kelia.​—Matthew 19:28; Luke 23:43

 Enda, Bup Kudus nadai ngajar pasal utai tu. Penemu ti salah tu bepun ari saru penemu pasal siti ayat ba 2 Peter 3:7, ke madah: “Langit enggau dunya ti diatu mengkang digalau ngambika sida dirusak ngena api.” Peratika dua iti poin ke manah ti ulih nulung kitai nemu agi reti ayat nya:

1.   Dalam Bup Kudus, leka jaku “langit”, “bumi”, enggau “api” mai mayuh macham reti. Ngambika chunto, Pemungkal 11:1 madah: “Terubah iya kelia, orang di dunya tu bejaku ngena siti aja bansa jaku.” Leka jaku “dunya” tauka bumi ditu mai reti “orang/mensia.”

2.   Kitai ulih nemu reti langit, bumi, enggau api ba ayat 2 Peter 3:7 ari beratika nama utai ti dipadah dalam ayat nya. Ayat 5 enggau 6 nyebut pasal Bah Besai ke nyadi maya jeman Noah. Semua utai ke idup ba maya nya abis dirusak magang, tang bumi kitai mengkang bisi. Reti iya “dunya/bumi” ke dirusak ditu mai reti mensia ti jai ke idup jeman nya. (Pemungkal 6:11) Pia mega, “langit” reti iya mensia ke merintah ba jeman nya. Tu reti iya, semina orang ke jai dirusak tang ukai bumi kitai. Noah sebilik ulih selamat lebuh dunya ke jai nya dirusak, lalu sida agi terus diau ba bumi pengudah Bah Besai.​—Pemungkal 8:15-18.

 Sama baka Bah Besai ba jeman Noah, pengerusak ke digambarka “api” ba 2 Peter 3:7 mega mai reti pengerusak ngagai dunya orang ke jai , ukai bumi. Petara besemaya deka ngenataika “langit ti baru enggau dunya ti baru”, sereta “endur alai pengelurus diau.” (2 Peter 3:13) “Dunya baru” tu, reti iya mensia mayuh ti baru, ti deka diperintah “langit baru”, iya nya baruh Perintah Petara. Perintah nya deka ngenataika bumi Paradais.​—Pemandang 21:1-4.