Au ulih. Jesus nunjukka, bala murid iya ulih nerima chara berubat laban iya kala madah, “Orang ke gerai enda begunaka lutur, tang semina orang ke sakit.” (Matthew 9:12) Taja pan Bup Kudus ukai bup pasal pengerai, tang dalam nya bisi mayuh prinsip ke ulih dikena maya nerima chara berubat, lalu ngelantangka ati Petara.

Tanya diri empu

 1. Kati aku nemu reti chara berubat ke diperundingka? Bup Kudus ngelalau kitai ngiga penerang ke ulih dipechaya, tang ukai “arapka sebarang utai.”—Jaku Dalam 14:15.

 2. Kati aku patut ngiga penemu lutur ke bukai? Enti nuan bisi penyakit ti raya, manah agi betanya ngagai mayuh lutur.—Jaku Dalam 15:22.

 3. Kati chara berubat nya bisi ngelanggar ukum dalam Bup Kudus, iya nya “enda tau makai darah.”—Kereja Rasul 15:20.

 4. Kati chara berubat nya bisi bekaul enggau pengawa bemanang? Bup Kudus amat begedika pengawa “engkeramba, bemanang.” (Galatia 5:19-21) Kena nemu sekalika chara berubat nya bisi bekaul enggau pengawa bemanang tauka enda, peratika sekeda tanya tu:

•   Kati orang ke ngubat nya ngena chara bemanang?

•   Kati orang ke ngubat nya bisi madahka, penyakit ke dikembuan nuan nya ketegal bisi antu tauka bisi orang sengaja deka ngemediska nuan ngena chara bemanang?

•   Kati ubat ke diberi nya bisi bekenaka puchau, piring, tauka utai bukai ke bekaul enggau pengawa bemanang?

 5. Kati aku kelalu beberatka pasal pengerai diri? Bup Kudus bisi nangkan kitai, “Awakka semua orang nemu penyiru kita.” (Pilipi 4:5) Enti kitai bisi penyiru, kitai deka beberatka pekara ke beguna agi, baka utai ke diguna ba pengarap.—Pilipi 1:10; Matthew 5:3.