Peratika sekeda chara ti ngena nitihka lalau ari Bup Kudus:

1.   Ba maya ti ngena. Kitai patut bebasa sereta begulai manah enggau orang ke sama gawa. Tang, anang kelalu bugah enggau sida, ngambi nya enda ngasuh sida teperasa.—Matthew 10:16; Kolosi 4:6.

2.   Begari enggau manah. Ngena baju ke kelalu seksi, ngasuh runding orang bukai enda manah pasal kitai. Bup Kudus meransang kitai ngena gari ti “penumbas iya sereta menyana.”—1 Timoti 2:9.

3.   Bejimat milih kaban. Enti nuan rindu begulai enggau orang ke rindu betundi pasal seks, orang bukai engka ngumbai nuan pan sama baka sida.—Jaku Dalam 13:20.

4.   Enda ngena jaku ti kamah. Enti randau nya nyau ngujungka jaku ti kamah, seliahka meh diri.—Epesus 5:4.

5.   Seliahka endur ti tau ngemedis. Chunto, nuan patut bejimat enti bisi orang ke sama gawa mai nuan ba endur gawa nya lama agi enggau nadai kebuah.—Jaku Dalam 22:3.

6.   Nemu nyaga diri sereta beterus terang. Enti nuan dikachau ngena chara seksual, padahka enggau terus terang nuan enda rinduka ulah iya. (1 Korint 14:9) Ngambika chunto, nuan ulih madahka iya, “Anang negu aku, aku enda rindu.” Nuan mega ulih nulis surat ngagai orang nya, padahka asai ati nuan, lalu terangka nuan enggai iya ngulang ulah iya nya agi. Padahka standard moral sereta pengarap nuan ngagai iya.—1 Tesalonika 4:3-5.

7.   Ngiga bantu. Enti orang ke ngachau nya enda ngetu, padahka penanggul tu ngagai kaban ke ulih dipechayaka nuan, diri sebilik, orang ke sama gawa, tauka orang ke kala nulung mansa ke dikachau ngena chara seksual. (Jaku Dalam 27:9) Mayuh orang ke kala nyadi mansa seksual madahka, sampi nya meh ke pemadu nulung sida. Taja pan nuan engka bedau kala besampi, nuan ulih andal, Petara Jehovah deka nulung nuan, laban Iya ‘Petara ti pun semua pengelantang.’—2 Korint 1:3.

 Dikachau ngena chara seksual ngasuh endur gawa nya nyadi endur ke enda selamat ngagai bejuta iku orang, tang Bup Kudus ulih meri bantu.