Bup Kudus nadai enggau nyemetak madahka pasal Dinosaur. Taja pia, Bup Kudus madahka kitai, Petara udah nempa “semua utai,” nya alai, dinosaur nya mega utai ke digaga Petara. a (Pemandang 4:​11) Taja pan Bup Kudus enda enggau terang nyebut pasal dinosaur, jelu ke disebut ba baruh tu engka nyengkaum dinosaur:

•   “Jelu ti besai sereta nyelai di tasik”​—Pemungkal 1:​21; New American Bible.

•   “Semua bansa jelu ke ngerayap.”​—Pemungkal 1:​25, NW.

•   “Jelu siga ke ba dunya.”​—Pemungkal 1:​25, NW.

Kati dinosaur nya asil evolusi ke datai ari jelu bukai?

 Rikut fosil nunjukka dinosaur pansut tekala nya, ukai belubah-lubah nengah evolusi. Utai tu ngena enggau utai ke dipadahka dalam Bup Kudus, iya nya semua jelu digaga Petara. Chunto, Masmur 146:6 ngambarka Petara nya “ke ngaga langit, tanah enggau tasik enggau semua utai dalam sida.”

Kemaya bisi dinosaur?

 Bup Kudus nerangka semua jelu ba tasik enggau ba tanah digaga ba hari kelima enggau keenam. b (Pemungkal 1:​20-​25, 31) Enti nitihka utai ke ditulis ba Bup Kudus, dinosaur engka kala idup ba siti timpuh ti panjai.

Kati Behemot enggau Naga nya dinosaur?

 Ukai. Taja pan jelu tu bisi disebut ba bup Jop, tang nya enda ulih diterangka enggau silik. Behemot tu dikumbai badak ai lalu Naga nya dikumbai baya. Jelu ke disebut tu ngena agi enggau utai ke digambarka dalam Bup Kudus. (Jop 40:15-​23; 41:​1, 14-​17, 31) Enda ngira utai ke diterangka tu betul tauka salah, tang “Behemot” enggau “Naga” ukai dinosaur. Tu ketegal Petara ngasuh Jop empu beratika jelu tu, tang ba jeman Jop, jelu dinosaur udah nadai agi.​—Jop 40:16; 41:8.

Nama nyadi ngagai dinosaur?

 Bup Kudus nadai nerangka kebuah dinosaur nadai agi. Tang, Bup Kudus madahka semua utai ke digaga “ulih peneka” Petara, nya alai Petara tentu bisi kebuah ngaga dinosaur maya nya. (Pemandang 4:​11) Lebuh peneka Iya udah nyadi, Petara ngemendarka dinosaur nadai agi.