Nitihka penemu ari Bup Kudus, semua utai ke digaga ba dunya, semina mensia aja ke niki ngagai serega lalu penyampau sida mega bisi tatak. (Pemandang 14:1, 3) Ba serega, sida deka merintah nyadi raja sereta imam begulai enggau Jesus. (Luke 22:28-30; Pemandang 5:9, 10) Mayuh ari mensia ke bukai, deka diangkatka idup baru ba Paradais di dunya.—Masmur 37:11, 29.

 Bup Kudus nadai kala nyebut jelu tupi ulih niki ngagai serega tauka bisi serega ke ukui. Nama kebuah? Laban jelu enda ulih ngereja nama-nama utai ke tau ngasuh sida ‘dikangauka Petara.’ (Hebrew 3:1) Iya nya: belajar pasal Petara, bisi pengarap ngagai Petara, sereta ngasika pesan Petara. (Matthew 19:17; John 3:16; 17:3) Semina mensia aja ke ditempa ti ulih idup belama iya.—Pemungkal 2:16, 17; 3:22, 23.

 Nambahka nya, ngambi ulih niki ke serega, semua utai ke ditempa patut diangkatka idup baru. (1 Korint 15:42) Dalam Bup Kudus bisi nulis beberapa iti pengangkat ari mati. (1 Raja 17:17-24; 2 Raja 4:32-37; 13:20, 21; Luke 7:11-15; 8:41, 42, 49-56; John 11:38-44; Kereja Rasul 9:36-42; 20:7-12) Tang, semua pengangkat ari mati ke kala nyadi nya ke mensia, ukai ke jelu.

•  Nama nyadi ngagai jelu pengudah sida mati?

•  Kati jelu ulih ngereja dosa?

•  Kati ulih jelu diperinsa?

 Bup Kudus ngajar, mensia enggau jelu sama bela ‘utai idup’. Nya kebuah, nyawa mensia enggau nyawa jelu nya sama. Mensia enggau jelu sama bela datai ari dua bengkah pekara tu: “amau tanah” enggau “seput pengidup”.—Pemungkal 1:24; 2:7; Penyampau 31:28.

 Bup Kudus mega madahka mensia enggau jelu sama bela ulih mati. (Pemansut 23:12) Lebuh mati, mensia enggau jelu deka pulai baru ngagai tanah. (Pengajar 3:19, 20) Pandakka jaku, sida nadai agi.

 Enda. Dosa nya pengawa, asai ati, tauka runding ke enda sejalai enggau pesan Petara. Utai ke ditempa dikumbai ngereja dosa enti iya bisi pengingin tauka deka ngereja utai ti salah. Tang, jelu nadai pengingin ke baka nya. Sida semina nitihka naluri. (2 Peter 2:12) Pemanjai umur sida mega bisi tatak. Nyau pengujung, sida tetap mati taja pan nadai ngereja dosa.

 Enda ulih. Taja pan Petara ngasuh mensia bekuasa atas jelu, tang Iya enda ngemendarka sida merinsa jelu. (Pemungkal 1:28; Masmur 8:6-8) Petara ibuhka tiap iku jelu, nyengkaum burung ti mit. (Jonah 4:11; Matthew 10:29) Iya ngasuh penyembah Iya, nyaga jelu enggau manah.—Pemansut 23:12; Ulang Adat 25:4; Jaku Dalam 12:10.