Enda. Bup Kudus enggau terang madahka Petara nempa mensia enggau bemacham bengkah “bansa” jelu enggau utai tumbuh. a (Pemungkal 1:12, 21, 25, 27; Pemandang 4:11) Bup Kudus madahka semua mensia peturun ari Adam enggau Hawa. Seduai iya mensia ti keterubah. (Pemungkal 3:20; 4:1) Bup Kudus enda nyukung teori “evolusi teistik,” iya nya teori ke ngumbai Petara ngena evolusi nempa bemacham utai idup. Bup Kudus mega enda mantah penemu bala saintis ke madahka bisi bemacham bengkah ba siti-siti bansa utai idup.

•  Kati Petara nempa utai idup nengah evolusi?

•  Kati evolusi sejalai enggau ajar Bup Kudus?

•  Baka ni enggau utai tumbuh enggau jelu ke ulih berubah nitihka gaya utai ke ngelingi sida? Kati tu bukti ke nunjukka evolusi nya amat?

 Orang ke pechayaka Petara ngena evolusi nempa utai idup ngembuan penemu ti bebida pasal chara Iya ngereja nya. Nitihka Encyclopædia Britannica, rambai jaku “evolusi teistik” reti iya “Petara ngena pekara semula jadi ngaduka utai idup ba dunya tu.”

 Evolusi teistik mega nyengkaum penemu ti baka tu:

•   Semua utai idup datai ari aki ini ti sama menya kelia.

•   Siti bansa utai idup ulih ngena proses evolusi berubah nyadi utai idup ke bebida.

•   Petara meh ke ngasuh proses tu nyadi.

 Nitihka teori evolusi teistik, cherita pasal utai ti ditempa ba bup Pemungkal enda entu betul. Tang, Jesus madahka utai ke ditulis ba bup Pemungkal nya endang fakta sejarah. (Pemungkal 1:26, 27; 2:18-24; Matthew 19:4-6) Bup Kudus madahka sebedau Jesus datai ke dunya, iya diau ba serega enggau Petara lalu nulung Petara nempa “semua utai.” (John 1:3) Ketegal nya, ajar pasal Petara ke nempa bemacham bansa utai idup nengah evolusi nya enda sejalai enggau ajar Bup Kudus.

 Bup Kudus nadai madahka penyampau bengkah ke datai ari siti-siti bansa idup. Ajar Bup Kudus enda belaban enggau fakta ke madahka sekeda bengkah utai tumbuh enggau jelu ke ditempa Petara deka berubah nitihka gaya endur tauka utai ke ngelingi sida. Utai tumbuh enggau jelu tu mega deka berubah lebuh sida beterenah enggau beranak. Sekeda orang ngumbai semua bengkah ti bebida tu nunjukka proses evolusi. Tang, ubah tu enda ngasilka bansa utai idup ti baru.