Orang ngena ajar Jesus Kristus kena numbuhka mayuh macham pengarap “Kristian”. Tang dalam Bup Kudus nyebut, semina siti aja pengarap Kristian ti bendar. Peratika tiga iti kebuah iya.

1.   Jesus madahka diri ngajar “pemendar”, lalu orang Kristian abad keterubah mega madahka diri ngajar “pemendar”. (John 8:32; 2 Peter 2:2; 2 John 4; 3 John 3) Tu nunjukka, pengarap ke ngajar ajar ti enda sama enggau ajar Jesus, ukai pengarap Kristian ti bendar.

2.   Bup Kudus ngajar, orang Kristian patut “besetuju enggau pangan diri”. (1 Korint 1:10) Tang mayuh ari pengarap Kristian, ngajar utai ti enda sama, indah pasal ulah ke patut dikembuan orang Kristian. Pengarap Kristian ke baka nya, ukai pengarap Kristian ti bendar.—1 Peter 2:21.

3.   Jesus endang udah madah, deka bisi mayuh orang ngaku diri orang Kristian tang sida enda ngereja utai ke diasuh iya. Jesus enda nerima sida. (Matthew 7:21-23; Luke 6:46) Sekeda orang enda nemu nama utai ke bendar diajar dalam Bup Kudus, laban ditipu tuai pengarap ke semina deka ngulihka penguntung diri empu. (Matthew 7:15) Sekeda orang mega milih kediri empu, ni bagi pengarap kedeka sida. Laban pengarap nya ngajar utai ke diterima sida, tang ukai utai ti bendar ke datai ari Bup Kudus.—2 Timoti 4:3, 4.

 Ba sempama gandum enggau rumput, Jesus madahka deka mayuh orang ninggalka pengarap Kristian ti bendar, lalu ngerembaika ajar ti salah. (Matthew 13:24-30, 36-43) Nyau kelama, pengarap Kristian ke bendar enggau ke pelesu majak tusah deka dikelala. Jesus mega madah, orang ke baka nya deka nyadi majak mayuh pengudah bala nabi udah nadai. (Kereja Rasul 20:29, 30) Ajar sida enda sama, tang semua nya endang sigi “ngachau pengarap”.—2 Timoti 2:18.

 Jesus mega nambahka, bida entara pengarap Kristian ti bendar enggau ke pelesu deka dipeda. Tu ulih dipeda ari diatu, iya nya ba pengujung dunya tu.—Matthew 13:30, 39.