Bup Kudus seruran ngumbai Jesus ‘Anak Petara.’ (John 1:49) Leka jaku ‘Anak Petara’ madahka, Petara nya Penempa tauka Pun semua pengidup nyengkaum Jesus. (Masmur 36:9; Pemandang 4:11) Bup Kudus nadai ngajar Petara nya sebaka enggau apai mensia ke ulih meri peturun.

 Bup Kudus mega ngumbai bala melikat ‘anak Petara.’ (Pemungkal 6:2) Pia mega Bup Kudus madahka, mensia ti keterubah iya nya, Adam, dikumbai ‘anak Petara.’ (Luke 3:38) Ketegal Jesus utai ti keterubah ditempa Petara empu, nya kebuah Jesus anak tuai Petara.

•  Kati Jesus diau ba serega sebedau datai ke dunya?

•  Nama utai digaga Jesus sebedau iya datai ke dunya?

 Au. Jesus nya betubuh roh ti diau ba serega sebedau iya ada nyadi mensia ba dunya. Jesus empu madah: “Laban Aku udah datai ari serega.”—John 6:38; 8:23.

 Petara nempa Jesus sebedau Iya nempa utai bukai. Bekaul enggau Jesus, Bup Kudus madahka:

•   “Iya Anak ke terubah diadaka ari atas semua utai ti digaga.”—Kolosi 1:15.

•   Iya ‘ti pun semua utai ti udah digaga Petara.’—Pemandang 3:14.

 Jesus udah ngamatka jaku ke udah ditulis pasal “peturun orang ke dulu kelia.”—Mikah 5:2; Matthew 2:4-6.

 Iya bisi penuduk ti tinggi ba serega. Jesus nunjukka bisi penuduk ti tinggi lebuh iya besampi: “Apai, muliaka Aku di mua Nuan Empu ngena mulia ti dikemisi Aku di mua Nuan sebedau dunya digaga.”—John 17:5.

 Iya nulung Apai iya nempa semua utai. Jesus gawa enggau Petara “baka orang ke landik.” (Jaku Dalam 8:30) Bekaul enggau Jesus, Bup Kudus madah: “Laban semua utai ti di serega enggau di dunya udah digaga ulih Kristus.”—Kolosi 1:16.

 Petara bekereja nengah Jesus maya Iya nempa utai bukai. Tu nyengkaum semua melikat, pia mega semua utai ba dunya raya. (Pemandang 5:11) Kerejasama entara Petara enggau Jesus sempama arkitek enggau orang ke nirika bengunan. Arkitek ngaga pelan; orang ke nirika bengunan ngasuh pelan nya nyadi.

 Jesus nya Jaku. Pia mega, Bup Kudus ngumbai Jesus nya “Jaku.” (John 1:1) Tu nunjukka, Petara ngena anak Iya meri penerang sereta iring ngagai bala melikat ke bukai.

 Jesus mega nyadika pengari Jaku Petara ngagai mensia ba dunya. Petara mega ngena Jesus nyadika pengari Jaku lebuh meri iring ngagai Adam sereta Awa ba kebun Eden. (Pemungkal 2:16, 17) Jesus engka seiku ari melikat ke ngiring bansa Israel kelia maya ba menua puang. Lalu jaku ke dipadahka Jesus patut dititihka sida.—Pemansut 23:20-23. a