Roh kudus Petara nya, kuasa kudus ke dikembuan Petara. (Mikah 3:8; Luke 1:35) Petara meri kuasa Iya ba sebarang endur ti dikedekaka Iya ngambika ulih ngereja tuju Iya.—Masmur 104:30; 139:7.

 Dalam Bup Kudus, leka jaku “roh” disalinka ari leka jaku Hebrew ruʹach enggau leka jaku Gerika pneuʹma. Kesuah iya, leka jaku tu dituju ngagai kuasa kudus Petara. (Pemungkal 1:2) Tang, Bup Kudus mega ngena leka jaku tu ba konteks ke bukai. Ambika chunto:

•   Seput.—2 Samuel 22:16; Pemandang 13:15.

•   Ribut.—Pemungkal 8:1; John 3:8.

•   Nyawa, tauka pengering ke dikembuan utai ti idup.—Jop 34:14, 15.

•   Perangai seseiku orang.—Penyampau 14:24.

•   Utai roh, nyengkaum Petara enggau melikat.—1 Raja 22:21; John 4:24.

 Semua tu dituju ngagai utai ti enda ulih dipeda. Tang, asil ari utai nya endang ulih dipeda. Baka nya mega, kuasa Petara, “baka ribut, ke enda ulih dipeda, enda ulih dipegai, tang amat bekuasa.”—An Expository Dictionary of New Testament Words, ditulis W. E. Vine.

 Bup Kudus ngambarka kuasa kudus Petara baka “jari” Iya. (Masmur 102:25) Seiku orang ke landik betukang ngena jari iya gawa. Pia mega, Petara ngena kuasa Iya ngaga utai tu:

•   Dunya raya.—Masmur 33:6; Isaiah 66:1, 2.

•   Bup Kudus.—2 Peter 1:20, 21.

•   Kereja ajih sereta pengawa nginjil ke digaga nembiak Petara maya jeman kelia.—Luke 4:18; Surat Kereja Rasul 1:8; 1 Korint 12:4-11.

•   Kualiti manah ke diayanka orang ti ngasika Iya.—Galatia 5:22, 23.

Roh kudus nya ukai orang

 Bup Kudus madahka kuasa kudus Petara nya baka “jari,” tauka “seput.” Nya alai, tu enggau terang nunjukka kuasa kudus Petara nya ukai seseiku orang. (Pemansut 15:8, 10) Jari seseiku tukang enda ulih gawa enti nadai tubuh, tauka runding tukang nya. Nya alai, roh kudus Petara enda ulih nyadi enti enda diasuh Petara. (Luke 11:13) Bup Kudus mega nyemaka roh kudus Petara baka ai, lalu ngaitka iya enggau kualiti baka pengarap sereta penemu. Semua tu nunjukka roh kudus nya ukai orang, tang kuasa kudus Petara.—Isaiah 44:3; Surat Kereja Rasul 6:5; 2 Korint 6:6.

 Nama Petara nya Jehovah lalu anak Iya, Jesus Kristus, baka ke ditulis dalam Bup Kudus. Tang, Bup Kudus nadai nyebut pan pasal sapa nama roh kudus. (Isaiah 42:8; Luke 1:31) Sebedau Stepen mati, iya diberi genera pasal utai ti nyadi ba serega. Maya nya iya meda dua iku orang, ukai tiga. Bup Kudus madahka: “Stepen, penuh laban Roh kudus, engkadah ke langit, lalu meda mulia Petara, enggau Jesus bediri muak ari kanan Petara.” (Surat Kereja Rasul 7:55) Roh kudus Petara udah diberi ngagai Stepen, ngambika iya ulih meda genera nya.

 Penemu ti salah: “Roh kudus” nya, sebegian ari Triniti, baka ke dipadah ba Matthew 28:19, 20.

 Utai ti bendar: Ba Matthew 28:19, 20 “Apai, Anak enggau roh kudus” disebut begulai. Sekeda orang ngumbai tu bejaku pasal Triniti. Tang, bacha meh ayat nya ke diri empu. Kati ayat nya bisi nyebut pasal sida tiga nya seiku petara ti sama, lalu bela meruan belama, ngembuan kuasa, penuduk enggau penemu-dalam ti sama? Nadai. Pia mega, nadai ayat bukai ke nyebut sida tiga nya seiku.

 Penemu ti salah: Bup Kudus madahka, roh kudus nya ngembuan kualiti baka mensia. Tu nunjukka roh kudus nya seiku orang.

 Utai ti bendar: Kekadang Bup Kudus madahka roh kudus ngembuan kualiti baka mensia. Ambika chunto, Jesus madah roh kudus nya seiku “penulung” ke ulih meri bukti, iring, bejaku, ninga, madah, beri puji, sereta ulih nerima siti-siti utai. (John 16:7-15) Taja pia, utai tu nadai nunjukka roh kudus nya seiku orang. Bup Kudus mega madahka penemu-dalam, pemati, enggau dosa bisi kualiti baka mensia. (Jaku Dalam 1:20; Rome 5:17, 21) Ambika chunto, Bup Kudus madahka penemu-dalam ulih “ngereja utai”, lalu Bup Kudus madahka dosa ulih manjuk, munuh, sereta ngemansangka pengingin ke utai orang.—Matthew 11:19; Rome 7:8, 11.

 Penemu ti salah: Baptisa dalam nama roh kudus nunjukka roh kudus nya seseiku orang.

 Utai ti bendar: Kadang-kadang Bup Kudus bisi ngena leka jaku “nama” kena nunjukka kuasa. (Ulang Adat 18:5, 19-22; Ester 8:10) Ambika chunto, ba jaku Melayu orang bisi nyebut “atas nama agama.” Tang, tu ukai reti iya agama tauka pengarap nya seiku orang. Pia mega, seiku orang ke dibaptisa “dalam nama ” roh kudus Petara nunjukka diri ngaku kuasa sereta utai ke digaga roh kudus kena bejalaika peneka Petara.—Matthew 28:19.

 Penemu ti salah: Bala rasul enggau murid Jesus kelia pechaya roh kudus nya seiku orang.

 Utai ti bendar: Bup Kudus nadai nyebut pasal utai nya, pia mega, enggau sejarah. Encyclopædia Britannica madahka: “Penemu ke madahka roh kudus nya seiku orang baka Petara . . . bepun maya aum ba Constantinople kena taun 381 M..” Aum tu nyadi kira-kira 250 taun pengudah rasul ti penudi mati.